Shikongo okwa gandja uupyu koKavango

0
430
Shikongo Israel okamati komimvo 19 hoka oko ka li omudhani dhingi muudhano woThe Namibian 2016 mboka wali wa dhanenwa koRundu.

OSHAKATI-Omumati ngoka a li ta dhana nawa pethimbo lyuudhano wekopi lyoshifo sho The Namibian ndyoka lya sindanwa po kOshana pethimbo lyooPaasa oka li ka yi kundathana na Kundana nokuholola a longo okwaadha esindano ndyoka.

Shikongo Israel omunamimvo 19 nomulongwalongi moshiputudhilo sha Hifikepunye Pohamba mOngwediva momvula yotango oye a toolapo epapa lyomudhani dhingi guudhano mbuka nokwa ulikwa oye omudhani enyakwa dhingi momaudhano geli ga tatu pethimbo lyethigathano ndika.

“Oha ndi dhana ndi itulamo ethimbo kehe na oha ndi itsu omukumo opo ndi longe nuudhiginini ethimbo kehe mokapale nopondje yokapale, nokwiiyutha komalombwelo gwomudheuli noku tula miilonga shoka ta lombwelendje,” Israel ta ti.

Israel ngoka a ulike ohokwe yokudhanena osipana yoYoung Chiefs yomOshakati okwa ti oshitalenti she shoku dhana etanga ote shi topola neilongo lye noha topola ethimbo nawa opo a kale te shi enditha nawa koombinga adhihe sho ngashiingeyi eli moshiputudhilo shopombanda na okwa hala oku ninga omulongisikola.

Kepulo kutya osipana yini muuyuni a hala okudhanena, Israel okwa li endelele okutothamo osipana yaEngland Liverpool, nokwa ti omudhani ngoka ha landula muuyuni oPhilip Countino gwoLiverpool

“Eithano lyokatanga kokoompadhi ehupi shili ashike ngele owa longo nuudhiginini ota li vulu oku eta elunduluko ewaanawa monkalamwenyo, ta ti ngele owa mono ompito yoku dhana moEurope aadhani oyendji oha ya kwata 1.5 omilliona koshiwike miimaliwa ya Namibia ta ti ngele aamati ooyakwawo nau longe nuudhiginini opo wu ka likole sha momaudhano.

 

LEAVE A REPLY

Please enter your comment!
Please enter your name here