Uumutse waSWA/Namibia itawu ka longa mo2017

0
256

Windhoek

AaNamibia oshowo aakalimo mboka ye na uuthemba wokukalelela muka, ndele natango oha ya longitha uumutse wa SWA/Namibia oya indilwa opo ya ninge omaindilo guumutse uupe wa Namibia mbala.

Eindilo ndika olya ningwa koMinista Yiikwameni Nomatembukilomo, Pendukeni Iivula- Ithana a ti okuhulithapo elongitho lyuumutse mbuka otaku pe ooyene yawo ompito oku opaleka omapuko ngoka ga li ga nyolwa mwaambuka unene ngele tashiya pomaukwatya gawo ngaashi edhina nenge ofani.

Pethimbo ndika konyala aaNamibia omayovi 70 000 ohaya longitha natango uumutse wa SWA/Namibia ongo omukalo gokudhimbululwa kutya oyo oolye. Oshikondo shIikwameni osha pe aakwashigwana mbaka sigo omasiku 31 Maalitsa 2017 opo ya kale yi imonena uumutse wa Namibia uupe.

Uuministeli mbuka owa ti otau hulithapo elongitho lyuumutse mbuka opo oshilongo shikale tashi tsu kumwe naashoka hashi longithwa paigwana shoku kumika oshilongo kehe shi longithe ashike okamutse koludhi lumwe meni lyoongamba dhoshilongo shoka.

Minista Iivula-Ithana okwa gandja nokutseyitha etokolo ndika pethimbo a li ta popile omutengenekwa mwaalu gwiimaliwa yuuMinisteli we megumbo lyOpashigwana omasiku ngaka. A ti oku wete kutya uumutse wumwe mbuka uukulu owuna omapuko kombinga yomaukwatya gooyene yawo goshili, onkene uuna ooyene mbaka ya ningi omaindilo guumutse uupe nena mbaka otaya vulu okuopaleka omapuko gomaukwatya gawo ngoka.

Iilonga yoku gandja uumutse uupe komwaalu ngoka gwaantu mboka ha ya longitha mbuka sigo oompaka ota yi longwa koshitopolwa shoku shangitha oshigwana kohi yUuministeki wIikwameni. Oshitopolwa shika osha pewa omutengenekwa mwaalu gwiimaliwa yoodola N$186  oomilliona okukaleka embo lyomwaalu gwoshigwana mondjila.

Iivula Ithana okwa ti oshitopolwa shika otashi tsikile noku kwatela komeho  etulomiilonga lyondunge yomiyalu dhasimana melongelokumwe nolutu lwOmiyalu lwaNamibia nenge Namibia Statistics Agency opamwe wo nomalutu galwe ngoka genasha nuuwindji womwaalu gwaantu moshilongo. Oongudu ndhika ohadhi tsakanene omathimbo nomathimbo noku gandja omishangwahokololo kwaashoka shaningwa po.

Uuna uumutse uukulu tawu hulithwa okulongithwa otashi ka kala konima yomimvo omilongo 27 okuza sho oshilongo shamanguluka. Shika osha hala okutya , aakwashigwana mboka ya li haya longitha uumutse mbuka oya li ye na ethimbo lya gwana oku kiikongela uumutse uupe waNamibia lya manguluka.

Pethimbo ndika ohashi kwata ethimbo efupi lela uuna omuntu a thanekwa okamutse opo eke ka taleko hoka a thanekelwa okuyeleka nomimvo dhapiti sho uumutse wa li hawu kwata ethimbo okulongwa nokutuminwa kooyene.

LEAVE A REPLY

Please enter your comment!
Please enter your name here