Va fya eshi va lya ondongi  eli fila

0
403

Ovaneumbo vavali ova fya omanga va hetatu vali va kwatelwa meembete, konima eshi vati va lya ombelela yondongi.

Oshiningwanima eshi osha ningilwa pomukunda Onkani moshikandjohoololo Otamanzi.

Ovo va fya ovo omunamido 82 Teofelus Malakia nokatekulu Jesaya Nakafingo komido Nhano.

Oshiningwanima eshi ota shi yelekwa nashikwao sha ningilwe mo 2012, eshi natango okaana kafile novanamukunda vakwao veli 44 vomOshipumbushomugongo nokOndelekalama va twalelwe koshipangelo eshi va lile ombelela yandongi eli fila.

Moshiningwanima nee eshi sha xuuninwa otaku hokololwa mwene weumbo meekulu Saimba Kaapangelwa (66) a landa ombelela ya ndongi elifila poushiinda.

Ovaneumbo ava vati ova lya ouvalelo wombelela oyo nolwishi. Mokati koufiku, ova ka tameke tava ehama.

Kavali tava dulu oku mona omakwafo ouhaku oufiku oo shaashi oka kilinika kokOnkani iha ka longo oufiku.

Ongula eshi va pita ovo va nangala vena onghungo noshimela ova pita va yuka koshipangelo.

Omanga veli koshipangelo, vati ova lombwelwa onghundana kutya omukulupe Teofilus oo eli mumwaina wa meme Kaapangelwa okwa xulifa.

Opolifi no ambulance oya ya noku kufapo omudimba naavo tava ehama noku va twala koshipangelo kOshikuku.

Konima yefiku ovaneumbo ovashiinda ova ka kala tava kongo okaana Jesaya oko kali kaya kokinda efiku olo. Ove keke litwa moixwa ka xulifa nale

Otaku hokololwa kutya ovanamukunda vakwao navo ova landa noku lya ondongi oyo ashike ina  va ningasha.

Opolifi mOmusati oya koleka oshiningwanima eshi.

 

LEAVE A REPLY

Please enter your comment!
Please enter your name here