Omusita a ti kashishi oshili kutya aaChina oya hehela epya lye

0
242

Windhoek

Omusitagongalo Josef Shikuma ngoka a li miikundaneki oshiwike shayi sho anuwa a gandja epya lye li longithwe kaaChina pOmakuku , okwa ekelehi ehokololo ndyoka a ti kali shi lyoshili  nolya nyateka edhina nondhilo ye ombwaanawa.

Shikuma, ngoka a talelepo oombelewa oonene dhehangano lyo New Era Publication Corporation konima sho Kundana a nyanyangidhile  ehokololo ndyoka iiwike iyali ya piti okwa ti evi ndyoka tali popiwa olye lyomehala lyaayehe eli pelwe omumvo 1997, nokwa kala ha longo iikunwa pangeshefa yuunamapya okuza omumvo 2000. Omathano oshowo okavideo koshikunino shika oga li, nokali taka monika kointanet , ta ka hololola anuwa nkene aaChina ya pitikwa okulonga mepya ndyoka molupe lwoku li hehela shaali pampango.Ehokololo ndika olya uvitha Omusita Shikuma nayi.

Shikuma okwa ti ye okwa tamekele oshikunino  shika mo 2000  ha kunu iihape, epungu oshowo iihape yilwe, nelalakano oku yi landitha koohandimwe , aanangeshefa oshowo iiputudhilo. Momumvo 2004 okwa yi melongelokumwe nomuChina, ngoka a li ena ontseyo yili pombanda muunamapya oku yeleka na ye. “Omulongelikumwe nangame gwongashingeyi oye omutiyali molwashoka ngwiyaka gotango okwa li iikuthamo melongelokumwe lyopangeshefa ndika omimvo odhindji dhapitipo,” osho a ti a dhenge omuthindo mpoka kutya nando ota longele kumwe naaChina kapena nando esiku limwe  ye a tokolele opo evi lye eli gandje kwaambaka ya kale ta  ye li hehela kuye ngaashi sha hokololwa.

“Epya ndika kalishi lyaaChina, ihe evi lyaayehe ndyoka ngame nda pewa pampango moka nda tungila egumbo lyandje.Ondili nine wo oombapila adhihe dhopaveta okuulika kutya ndika olyandje.Kandina uunongo washa kombinga yokutya ndika oli niwe kaaChina ta ye li hehela okuza kungame,” osho a ti.

Shikuma, omusitagongalo megongalo Eheke  mOngelki OnkwaEvangeli paLuteri yomuNamibia ELCIN okwa ekelehi ishewe omalundilo ngoka taga ti  aaniilonga poshikunino shoka  oha ya futwa oondjambi ooshona. “Ondina aaniilonga omilongo mbali aalumentu naakiintu aaNamibia mboka haya futwa konyala oodola dhi vule  eyovi limwe komwedhi,” osho a popi uushili mboka.

Shikuma okwa ekelehi wo omipopyo kutya oshikunino shika ohashi longitha omeya okuza mokanala shaali pampango, a ti ye okwa kala ha longitha omeya gomokanala okutekala  oshowo okulongitha iinima yilwe ndele ina uva nando onale omuntu ta ngungutula oshinima shika. “Omukalimo kehe moshitopolwa shika okushi iilonga yandje yuunamapya wopangeshefa okutameka omumvo 2000. Onda talelwapo wo kaanapolitika  okutala iilonga yandje, onkene kehe gumwe okushishi kutya oshike tashi longwa mpaka. Eeno ongeshefa sho opo nda tameke kaya li pomuthika ngoka yili ngashingeyi, sho tayi longo nawa , shono tayi hedha nawa komeho ngashingeyi omolwashike  ya ninga oshinima shokupopiwa?” Shikuma, okwa nyenyetele wo Kundana  sho inee mu pa ompito opo a gandje ombinga ye, yehokololo omanga ndika inaali nyanyangidhwa.

Opena wo onkundana ta yi inyenge ko intanet nongundu  yo Affirmative Action Repositioning okupitila momuwiliki gwayo Job Amupanda anuwa oya pangula ongeshefa ya Shikuma montaneho. Omusita Shikuma okwa ti  ohenda unene sho kaapena nando omuntu a pula uuyelele wa gwana kuye omanga inaa komenda koshinima shika shongeshefa ye oshowo okuluudhika edhina lye. ‘Ongeshefa ndjika oyoludhi lwelongelo kumwe ngaashi twa kumikwa kepangelo okushi ninga.

 

 

LEAVE A REPLY

Please enter your comment!
Please enter your name here