Ondungethaneko yelikolo Harambee oya shike

0
256
Ondungethaneko yelikolo Harambee oya shike

Namibia okwa ya komeho koombinga adhihe dhonkalamwenyo okuza tuu sho a manguluka papolitika omumvo 1990. Pomumvo gwemanguluko omahupilo oga li omashona naantu oyendji oya li kondje yiinyangadhalwa yopamahupilo moshigwana. Oluhepo pethimbo ndyoka miitopolwa yimwe olwali lwalula pethimbo pwali pwa ningwa omayalulo gotango gopashigwana omumvo 1993/1994. Onkene opena eyooloko enene pokati kaNamibia pethimbo lyemanguluko na Namibia lyonena.

Pethimbo ndika aanona oyendji oye li moosikola okuyeleka nonakuziwa, aaNamibia oyendji otaya mono omiti dho ku ya kaleka momwenyo ishewe iiyalo ngaashi oondjila niikwamatungo yilwe oya nenepekwa noku andjaganekwa noonkondo.

Ayihe mbika oya vulika molwewiliko, omathaneko oshowo esindano moku tula omathaneko geyokomeho ngaka miilonga. Omathaneko moNamibia oga kankamekelwa kOndjodhi yokomumvo 2030 ndjoka tayi lalakanene okutula Namibia pomuthika gwoshilongo shahumakomeho nosha tungala okuya pomumvo ngoka. Ihe nando eyokomeho itali ende lyuukilila ngaashi twa dhiladhila kapena omalimbililo oshilongo otashi inyenge shi li mondjila ombwaanawa.

Ngele ota tu ti otuli mondjila ndjoka twa hala, omolwashike twa pumbwa ondungethaneko ompe nenge ondungethaneko ndjika otayi etapo elunduluko mondjila yeyokomeho ndjoka twa landula?Aawe Ondungethaneko yuuwanawa noyelikolo yoHarambee  oya ngongwapo okukwathela  Omathaneko gopashigwana oshowo Ondjodhi  2030. Ndjika ondungethaneko ya odheka nokutothamo  iilalakanenwa miimpungu yontumba mbyoka yapumbwa okumanithwa mbala. Shimwe shomwaambika ooshoka kutya ondungethaneko ndjika oyi na okukala tayi vulu okulundululwa nuupu. Ondjodhi yetu inayi lunduluka, tse otuli uupathi momukalo  gwetu okwaadha omalalakano getu.Uuyuni mboka wetu kundukidha otawu lunduluka ethimbo alihe, mwaambuka omuna omanwethemo gopondje ngoka tse itaatu vulu okulundulula naangaka ota ge tu gumu noku tu ndjungandjunga omathimbo nomathimbo. Onkene shika otashi pula tse tu kale tatu vulu okulundulula omukalo ngoka tatu ende nago oku adha iilalakanenwa yetu yeyokomeho, no itaatu kanitha ondjila yetu oku adha ethikilo.Onkene ondungethaneko yaHarambee oyo omukalo ngoka tatu longitha oku etapo elunduluko momathaneko getu uuna shapumbiwa.Uuyelele uupe owa ulike kutya eyokomeho miimpungu yimwe yomathaneko gopashigwana geyokomeho omatine olya ende kashona.

Mwaashika Ondungethaneko HPP oyi na ekwatathano nomutengenekwathaneko gopokati. Otayi landula oopoloyeka ndhoka dha tothwamo momathaneko geyokomeho Omatine oshowo omitengenekwathaneko dhapiti ndhoka dha ningilwa omakonakono ngoka haga ulike kutya ndhika otadhi vulu okutulwa miilonga.Oopoloyeka ndhika odha kwatelamo iimpungu yiikwankondo, omeya, niiyenditho. Eeno iilonga ngaashi mbyoka yokutunga ondjila yopokati koVenduka nOkahandja oku yi ninga yoopate mbali ombinga nombinga oya tamekwa nale nookuli, molwashoka oya monika tayi vulu okulongwa, omanga enenepeko lyetuliloskepa lyaMbaye lili poku manithwa. Iilonga yimwe inayi longekidhilwa iimaliwa yiigwanapo molwashoka otayi ka manithwa kombanda yomimvo ndatu moka hamu tengenekelwa omutengenekwa mwaalu. Onkene moshinima shika mbika ohayi talululwa omathimbo nomathimbo opo iipumbiwa oshowo ethimbo lyoku yi manitha oha li lundululwa.

Ondungethaneko ndjika ita yi ikwatelele ashike komutengenekwathaneko goshimaliwa opo yi sindane noku adha omalalakano ga yo. Oshoka monkatu yotango iilonga kohi yayo oyo okulundulula, kumwe hoka inaaku pumbwa elongitho lyoshimaliwa, kakele kokulonga iilonga neendelelo.

Oshiholelwa ngaashi okushonopeka ethimbo ndyoka hashi kutha okushangitha ongeshefa, shika inashi pumbwa okulongitha oshimaliwa, osha pumbwa ashike okuhwepopeka  omukalo ngoka hagu longithwa nethimbo ndyoka hashi kutha opo ongeshefa yi shangithwe.Shika oshafaathana wo nokulundulula ewiliko melanditho lyiikwankondo okukuthapo omukalo gwomulandi gumwe nokuhumitha komeho aayetipo yiithikamena yiikwankondo oyendji. Omalunduluko ngaka otaga etapo uuwanawa wa gwedhwapo sho taga tulapo onkalo ombwaanawa koongeshefa noku hila aapunguli mboka taya etamo iimaliwa, nongeyi otaya kuthako omutenge gumwe komapepe gepangelo.

Ondungethaneko ndjika oya kankamekelwa kedhiladhilo lyegumbo Namibia. Ndjika oya zimina kutya itatu tamekulula, ndele otatu tsikile okutunga egumbo lya Namibia ndyoka lye edhilila ayehe lya kankamekelwa  komukanka gwakola gwombili, edhiminathanepo, egameno nengungumano. Otwa hala okuweetapo ethimbo lyeyambeko moka omuntu kehe ta mwenya monkalo yili nawa ta vulu oku ilandela nokwi imonena iipumbiwa yesiku kehe yili nawa.

Ondungethaneko oya kankamekelwa koongudhi ne , kokutya ewiliko lili nawa tali longo nawa, eyokomeho pamahupilo, eyokomeho pankalathano neyokomeho miipumbiwanima nenge miilongitho , ngaashi iikwamatungo, oondjila , omakwatathano gopaungomba, nayilwe mbyoka oshigwana tashi pumbwa opo shikale tatu ti osha huma komitse.

Pehulilo omalalakano omashona moongudhi ndhika oshowo iilonga mbyoka yi na okuningwapo oyo okutu eta popepi neuvaneko lyelikolo lili nawa ndyoka tali kala nuukwatya ngaashi iinima tayi ningwa inaa yi holama, onkalo mEvi lyOmapenda  moka mwaana omuntu tasi kondjala molwashoka keena iikulya oshowo onkalo moNamibia moka kehe omukalimo ena egumbo lili nawa oshowo omuntu kehe ta vulu oku mona omayakulo gapumbiwa, ngaashi, omeya, nayilwe.

LEAVE A REPLY

Please enter your comment!
Please enter your name here