Oshigwana osha loloka ihe iikololokosha hayo ekandule po lyomukundu

0
240

Omainyengo niikolokosha tayi holoka mpaka naampeyaka moshilongo omolwa ompumbwe yevi otayi uvitha nayi, nondjila ndjoka oshigwana sha hala oku kutha onga onkambadha yoku kandula po omukundu nguka ota yi limbilike, na otashi viulika yi kale yina ondilo noshilanduli oshinene shi vulithe ompumbwe yevi.

Eeno shili oshigwana oshi li muudhigu wokwaana evi nenge uupambu mpoka tashi vulu oku tunga omalukalwa. Oohandimwe mboka yena evi noya tunga omahala mpoka ya edhilila aantu, ota ya futitha aantu oshimaliwa shili pombanda noonkondo.

Shono tashi holola kutya aantu ota ya mono iihuna oshoka oshitopolwa oshinene shiiyemo yawo ota ye shi ukitha kevi, nenge komalukalwa moka yena oku kala oonkalomwenyo dhawo adhihe.

Shi tashi yemateke ooshoka kutya mboka yena oshinakugwanithwa shoku gandja evi koshigwana ota ya landitha evi kondilo, omanga yo yeli mona oshali, na oya tula mo ashike oshimaliwa shoku li longidha. Ishewe aatungi  noositola dhiitungitho nadho odhina ondilo.

Omagumbo ngoka geli po ga tungwa nale ga thikama ogo nee ngena ondilo i yemateka. Onkalo ndjika ota yiipulitha omuNamibia ngoka ena iiyemo yopokati nenge iishona afa okadhila kokashanda ngoka haka yimbi taka ti “ndi valela peni? Komututu omayoka, pevi omaanganime,”. Ano omuntu kena mpoka tiigameke. Okurentinga oku na ondilo. Ye ishewe ngele okwiitula mokuretinga kena esiku a kale ena egumbo lye mwene, ye ita gongelesha. Ngele okwa tokola tunge egumbo, evi olina ondilo, ondando yiitungitho -memaakukwee, nofuto yomutungi iha yi popiwa nee manga. Utye nee andola landa egumbo, mboka ta ya landitha omagumbo ota ya tula ondando komagumbo ndyoka ya hala nokape na ngoka ta ti kosha oshoka kapena oveta ndjoka tayi tala noku ngambeka oondando dhakeshe tuu shoka moshilongo.

Onkalo yili ngeyi oyo ta yi etitha olungwenye moshilongo, noku eta opo oshigwana shiikuthile oveta miikaha sho pamukalo go kwiikuthile omavi nooplota miilando yimwe.

Okwiikuthila evi huka iha ku ya oshali, ihe gumwe nenge oyendjo oye na okuku futila oshinima shika shili kondje yoveta. Oshampa to longo oshinima shili kondje yoveta, nena owuna owala oku tukulula iikolokosha pokati koye noveta.

Yo iikolokosha yoludhi kehe oyina ondando, na luhapu ofuto (ha alushe yoshimaliwa) ndjoka to futu pethimbo mpoka nokonima yiikulokosha, olundji oyi li pombanda noonkondo.

Iikolokosha olundji ohayi ngumagula nokonima yayo, oshigwana oshina oku tungulula, nokutungulula, omakuma nonkalonawa yaantu ohaku kosho ondilo, shi vulithe nokuli ondando ndjoka oshigwana shali ta shi futu pethimbo ndjoka sha li monkalo ndjoka shali sha tala ondhigu.

Ihe oshinenenene shivulithe iikwao ooshoka kutya kape na ndo ondando yimwe yivulithye ondando ndyoka una oku futa ngele wa kanitha omwenyo gwomuntu. Omwenyo oshinima shina ondilo noonkondo na kapena nande oshingoli nenge oshisiliveli shoka tashi vulu oku futa oomwenyo dhoka hadhi faalelwa pethimbo liikolokosha.

Omidhi dhonkalo ta yi etithwa kiikolokosha yevi, odha pumbwa oku tetwa tashi tamekele kaaleli naatoti-mpango moshilongo.

Oshili oshinakugwanithwa shepangelo okutala kutya ondando yevi noyomagumbo mwa kwatelwa omungome wesiku kehe oya ngambekwa.

Oshili woo oshinakugwanithwa shepangelo okutala kutya evi olya mamgulikila kehe omukwashigwana gwaNamibia, na kehe gumwe ota vulu okukala ena omuzile pombanda yomutse gwe.

Aatoti-veta oye na oku sa oshimpwiyu kutya kehe omukwashigwana okuna ehogololo, lyoku kala ena egumbo lye mwene nenge oku rentinga. Shi vulithe sho aakwashogwana oyendji ya thiminikwa opo ya kale taya rentinga nando inaaya hala, kwaamboka yena iimaliwa ta ya vulu okulanda evi.

Ihe oshinenenima kwaayihe mbika osho oonkundathana pokati kepangelo noshigwana, na kehe gumwe iiyuthe koshizemo shoonkundathana ndhoka.

 

LEAVE A REPLY

Please enter your comment!
Please enter your name here