Aasitangombe  mOhainghete  taya kongo epopilo

0
344
Oongombe tadhi napa mehala lyuulithilo muuzilo woshitopolwa Oshikoto moka  mu na aanahambo taya ti oyena uumbanda woku monithwa oshiponga kooyakwawo mboka ya pewa oondjembo nomalombwelo opo ya yahe aantu mboka taya taakana moohambo dhawo yaana epitikilo lyoku shi ninga.

 

OHAINGHETE – Aatonateli yiimuna oyendji momukunda Ohainghete moshikandjo shaNalusheshete ota ya pula opo ya popilwe muudhigu mboka yena.

Oyendji yaanahambo mbaka oya pewa iilonga kooyene yoohambo okutonatela iimuna yawo, yo ta ye yi sile oshimpwiyu kaayi halakane.

Gumwe ngoka ali a popi uudhigu mboka yena okwa holola kutya opuna aanafaalama yamwe anuwa ya thigila aanahambo yawo oondjembo, noye ya lombwela kutya moofaalama dhawo inamu endwa nando okomuntu ngele shika osha ningwa mbaka na ya yahe ngoka ta ya adha te endemo.

“Oshinima shika oshetu limbilika ngaashingeyi oshoka otuna owala uumbanda no inatu tseya shoka tashi ka holokapo komasiku gokomeho, sigo oompaka inatu uva omuntu a dhipagwa ashike otuna uumbanda mboka,” aanahambo ta ya popi ngaaka.

Ta ya hokolola woo kutya ethimbo limwe ohaya kala ya kanitha iimuna yawo no yena oku enda noofaalama ndhoka dhili pomudhingoloko ngoka, yo ya tale ngele iimuna yawo omo yili.  Oya gwedhapo kutya shino osheya ningila oshidhigu oshoka oya tila okuya moofaalama dhaantu yo ya ninge iihakanwa yokuyahwa.

Onkee ota ya pula Elelo lyopamuthigululwakalo lyaNdonga opo li idhopemo moshinima shika, lyo li yemo olunyala noku tala nkene aatonateli yiimuna mboka  ta ya vulu okukwathelwa.

Oya pula woo aaleli yopamuthigululwakalo ya kale noku talelapo omikunda ndhoka dhili moshikandjo shaNalusheshete yo taya ningi iigongi ya pulakene shoka tashi inyengemo. Mboka yali ya eta uuyelele mbuka poshitaafula oya holola kutya oonkalamwenyo dhawo odhili muudhigu uuna ya kanitha iimuna yawo oshoka ota ya tila okuya moofaalama dhaantu, yo ya tale ngele iimuna yawo omo yili nenge oya gama ombinga yini.

Aatonateli yiimuna mboka oya tsikileko ya ti oshinima shino shomatilitho hapo sha tameke ashike anuwa osha tameka nale moshikandjo shaNalusheshete, onkee anuwa iimuna mbyoka taya tonatele ohayi sile owala moofalama ndhoka etayi olelemo.

Elenga enene moshikandjo Onalusheshete Eino Shondili Amutenya olya ti  oshinima sha tya ngaaka oshipe  momakutsi galyo  no lya pula mboka ta ya ningilwa omatilitho ngoka ya kale ye shi lopota mbala.

“ Konyala ngele omuntu okwa kanitha iimuna ye opuna omilandu ndhoka hadhi landulwa, ashike ito vulu oku keelela omuntu a konge iimuna ye mofaalama yoye, okuna okupopya naangu ta tonatele ofaalama yontumba, ye ta pewa epitikilo a yemo ye ta tala mpoka hapu nu iimuna ngele omo yili, ashike omatilitho ngono omawinayi no ta ga teyapo ombili yoshigwana shetu, elongelokumwe olyo lya pumbiwa unene,” Amutenya  ta ti ngaaka.

 

LEAVE A REPLY

Please enter your comment!
Please enter your name here