Akapandi a pula aanangeshefa ya kale haya hungile

0
498

ONDANGWA – Omunangeshefa a tseyika nawa moshilongo, John Akapandi Endjala, okwa li a indile aanangeshefa moshilongo ashihe ya kale ha ya hungile yo yi ikunde iinima ya pamba oongeshefa dhawo nonkene yena okudhi humitha komeho.

Akapandi okwali a popi ndhika pohotela pEkamuti mOndangwa mOlyomakaya ga piti sho a li ta popitha mboka ya li puulalelo wowina omolwomauliko gIipindi mOndangwa ngoka taga tameke oshiwike tu uka.

Oye woo uulikwa a ninge omunani gwiipindi mbika yo 2016. “Onda hala opo tse aanangeshefa tu imange kumwe tse tu yambuliipo oongeshefa dhetu dhomoshilongo, noku kokeka woo oshilongo shetu paliko,natu kale hatu ningi oohungi moka tatu kunduthana  noku paathana omayele omawanawa ngoka taga yambulapo oongeshefa, ngele itatu imanga kumwe nena noongeshefa dhetu otadhi sipo,” Akapandi ta londodha.

Okwa gwedhapo kutya ngele itaya kala ta ya hungile nena oongeshefa dhawo otadhi hulile ondjilakati, ta ti oshilongo ohashi tungwa kooyene yasho, no ina ya kala ya tegelela aantu ta ya zi kondje yiilongo nomafuta oyo ye ya tunge Namibia, a uvaneke kutya yo ota ya longo yaana ezimbuko ya kwathe mokuyambulapo oshilongo paliko.

Omunangeshefa nguka okwa tseyika koyendji moku yambidhidha oosikola oshowo mboka ya pumbwa omakwatho, Akapandi okwa pula opo kehe ngoka ena ongeshefa a kale noku gongala mpoka pwa gongala aanangeshefa yo ta ya kundathana noku topolelathana  uuyelele kombinga yongeshefa.

“Elongelo kumwe mongeshefa olyo ashike tali tu fala komeho, itashi kwatha sha wu kale wuna oongeshefa odhindji ngwee itoo longele kumwe na yakweni, otwa pumbwa oku kala woo ta tu gandja omakwatho kwaamboka ye ga pumbwa dho oongeshefa dhetu dhi yambekwe, shino otatu shi gandja nelalakano lyoku gandja sha moshigwana shono osho hashi tu yambidhidha moongeshefa dhetu,” Ta gwedhapo ngaaka.

Okwa pula woo aakwashigwana opo ya tsikile noku yambidhidha oongeshefa dhomoshilongo dho dhi yambukepo, yo taya nkondopaleke oshilongo paliko, okwali woo a kumike mboka yena ohokwe yongeshefa ya longithe ompito yo ya totepo oongeshefa dhawo, oshoka po oshilongo shi kale shina eliko ewanawa otashi pitile owala  mokungeshefa noshowo mokundulukapo iinima.

 

LEAVE A REPLY

Please enter your comment!
Please enter your name here