Haufiku a popile epya lyomuChina

0
291

 

Oshakati

Minista yUukalinawa nIilonga yonkalonawa oya popile omukwashigwana gwaChina ngoka ta limi mepya lyomahangu lili momukunda Omakuku moshitopolwa shaMusati.

Bernard Haufiku okwa indile aaNamibia ya kune tango iihape niingumutulu yawo yene moku dhika po iikunino yawo pomagumbo pehala lyokukala ashike ta ya kondjitha mboka taya longo evi, omanga yo itaye li longitha.

Haufiku okwa ningi eindilo ndika mEsiku lyuundjolowele mUuyuni ndyoka lya dhimbulukiliwe mOshakati konima yomasiku. Okwa ningi wo eindilo ndika sha landula omanyenyeto gaakwashigwana mboka yaa uvitile omukwashigwana gwaChina ombili ngoka ta longo iihape mepya eli hehela anuwa moshitopolwa Omusati.

Haufiku okwa ti, aakwashigwana yiilongo yilwe  otaya kuthapo evi lyetu lyuunamapya molwashoka tse aaNamibia itatu li longitha sha nenge itatu longitha oonzo dhetu dhopaushitwe.

Sho a popitha edhimbuluko lyEsiku lyuundjolowele mUuyuni , Haufiku okwa gamene aaChina a ti “Onda lesha miikundaneki yopankalathano  kutya aantu oya geela AaChina mOmusati….Ihe ngame otandi pula kutya omolwashike?Oshike shapuka ngele Aachina otaya longo oshikunino moshilongo shetu?Unene tuu ngele tse itatu longitha oonzo dhetu dhopaushitwe, nena yalwe ota ye kedhi longitha,” Haufiku  ati.

Okwa gandja oshiholelwa sho Kavango Uzilo shoka shina evi ewanawa  nomeya  ndele pakutala kwe , evi ndyoka itali longithwa nawa.

“Onda taakana okuza ko Andara mo Kavango Uzilo muna oshitopolwa shevi oshinene ihaashi longithwa sha. Pethimbo ndika omeya momulonga ota ga kungulukamo guuka kombanda yomituni dhago ta ga hepa ashike no itaaga longithwa sha ta ga faalele wo ashike noohi odhindji. Tse otatu kondjele ashike okukala miipeleki nomoombashu miilando omanga twali tatu vulu okulongitha evi lyetu okulonga iikulya”Haufiku  a ulike.

“Ngame otandi indile nokukumika kutya iikulya mbyoka tayi pungulwa moompungulilo ndhoka dha thanekwa, oopelesenda ando omilongo 80 nayi kale mbyoka ya longwa paushitwe. Inatu pitika nando opo tu pewe mbyoka ya lundululwa pamutungilo gwayo[GMO],” osho a londodha.

Okwa ti iikulya mbyoka ya longwa mu ka mwakwatelwa naambyoka yopamuthigululwakalo oyi na uundjolowele okuyelaka naambyoka hayi landwa koositola . Iikulya ngaashi mbika oha yi kwatha okukondjitha omavu ngoka ihaaga taambathanwa ngaashi osuuka ,ethindakano lyombinzi oshowo iitiyanathigo ngele itaayi longo nawa.

Haufiku, okwa ti konyala oopelesenda 95 dhaavu yosuuka oyena ndjoka yomongundu ontiyali, hayi vulu okukeelelwa.Naandjika olundji ohayi etwa kiikulya  yapuka oshowo okwaa idheula palutu.

Haufiku okwa li a popile omuChina ngoka ena oshikunino mepya lyomahangu moshitopolwa shaMusati mOmakuku. Epya ndika omuChina oteli longo muukumwe namwene gwalyo Omusita gwongelki yaElcin , Josef Shikuma ngoka pethimbo ndika oye ta wilike egongalo lya Elcin Eheke moshitopolw a Oshana.

Oshigwana shomOmusati osha li tashi nyenyeta konima sho omunandjungu gumwe a thaneke okavideo  kehala ndyoka oshowo sho oshifo Kundana sha shanga ehokolo olyo tuu ndika.Aaleshi oya li ya ti aaChina otaya kuthako oongeshefa dhaavalelwamo.Yamwe oya ti epya lya Shikuma olili mehala lyaayehe onkene itali vulu okuhehelwa. Omusita Shukuma okwa fatululile Kundana kutya ye ina gandja epya lye li longithwe kaaChina ndele okuli muukumwe nayo okulonga iihape  nepya ndika olye sigo onena.

 

 

 

LEAVE A REPLY

Please enter your comment!
Please enter your name here