Ondungethaneko yuuwanawa ya Harambee

0
261

Oshiwike sha yi otwa nyolele kontompolwa yotango yondungethaneko ndjika kutya omolwashike ya pumbiwa. Montompolwa ontiyali otatu shanga kutya ondungethaneko ndjika oya kankamekelwa kwaashoka sha longwapo moNamibia sigo oompaka.

Ondungethaneko yoHPP [nenge omathaneko goku etela omukwashigwana kehe onkalo ombwaanawa gaHarambee], oya tungilwa keyokomeho ndyoka lyalongwapo sigo oompaka kaaNamibia. Onkene otuna omatompelo okutyapula oshowo okukala netegameno lyonakuyiwa.Otuna einekelo kutya otatu sindana mokukondjitha oluhepo nokwaathike pamwe unene tuu uuna twa tala kwaashoka twa longapo omimvo 26 dhapitipo.

Ondungethaneko HPP oya ndjandjukununamo  oonkatu ndhoka tadhi katukwa uule womimvo ne tadhi landula okugwanithapo omauvaneko getu.

Omasindano ngoka twa adha sigo oompaka otaga monikila momalutu ga kola ngoka ga tungilwa kekotampango ewanawa muuyuni, omahupilo geli miikaha iiwanawa, oshowo eyokomeho ewaanawa li na sha nonkalathano.

Otushishi kutya oshindji osha pumbwa okulongwa natango meyokomeho lyopankalathano opo pwaa kale nando omuNamibia uuvite eethiwa nenge kee ni we na ye meputuko oshowo muuwanawa mboka tawu zi mokuputuka.

Otuna omutungilo gwewiliko gu li nawa.

Nena ota tu popi Afrika Epe , Afrika moka omaumbeko gomapangelo koonkondo ihaa ga uvika mo we. Afrika lyomahogololo gopaudemokoli, moka aawiliki yAfrika, aakulu ya simanekwa noku yelwa, no ye li miipundi ye vululuko nombili miilongo yaandjawo. Namibia oshitopolwa sha Afrika epe na ishewe okuna ehala li iwetikile menenevi ndika lyuukwatya uupe.

Shotango ooshoka kutya omutungilo gwewiliko gwa Namibia nuudemokoli we owa kola. Osha taambwako kutya omalutu hoka kwa tungilwa uudemokoli, ngaashi ewiliko lyooveta, epangelo, nemanguluko lyoohandimwe, ngaashi okukala newi lyamanguluka, oyo iinima ya pumbiwa okufala nokukalekapo  eyokomeho lya kwatelamo ayehe moshilongo. Uule womimvo omilongo mbali netata dha pitipo oshilongo oshe shi pondola okutulapo omikanka dhakola dhuuthemba wemanguluko mbuka.

 Okukala noshinakugwanithwa okwo emanya lyokolonela mewiliko lili nawa.

Shika otashi ti oohandimwe , omahangano nenge oshigwana oshina oshinakugwanithwa mukehe shoka ta ya ningi nenge taya longo. Omathimbo gamwe nenge olundji ota ya vulu okupulwa opo ya tye sha kushoka yo ya longo nenge inaa ya longa.Uuna pwaana oshinakugwanithwa, shika otashi fala keyo pombanda miilonga yuulingilingi moshilongo, mbyoka hayi eta enaipalo mekoko neyokomeho lyomahupilo.

Namibia oshilongo shuudemokoli womahogololo, moka aakwashigwana oyo aawiliki no ye na ompiti omalupita konima yomimvo ntano kehe oku tala kutya aawiliki yopapolitika oya longa shoka yo ya hogololelwa.Shika oha ye shi ningi puuketha womahogololo.

Okukala noshinakugwanithwa pomuthika gwopombanda okwa kolekwa komalutu ngaashi, ndoka lwokuninga Ooveta, Olutu ndoka halu tula ooveta miilonga, Okabinete nOmuperesidente, Olutu olufatululi lwooveta  ndoka olwo  talu wilike oompangu adhihe moshilongo. Omalutu ngaka gatatu kehe limwe ohali ningi omatokolo galyo itaali nwethwamo kolutu olukwawo. Oshikwawo, Ekotampango olyuutha pu kale omalutu ngaashi Ohahende Ndjai, Omuyaluli Ndjai, Okommissi yOkukondjitha Uulingilingi noshowo ombelewa yOmbudsman okukwathela opo moshilongo mukale ombepo yeinekelo nomu inekelwa kehe a kale ena oshinakugwanithwa.

Okukala noshinakugwanithwa okwa nkondopekwa ishewe kolutu olutine ndoka olwo oshitopolwa shiikundaneki, naambika oyo yimwe yi na emanguluko lyuudha  menenenivi ndika pahapu dhehangano lyaatoolinkundana yedhina. “ Reporters Without Borders.”

Okutala meyokomeho mokukaleka omutungilo gwepangelo gwakola, Omuperesidende Omutiyali gwaNamibia, Hifikepunye Pohamba, oye omuwiliki omutine omuAfrika a pewa ombandi yaMo Ibrahim mewiliko muAfrika.

Oshikwawo aaNamibia ayehe ohaya kuthombinga  moshinima shuudemokoli, noshigwana shaakiintu yetu inashi edhililwa pondje mopolitika. Omolwetokolo lyongundu tayi pangele okukala nomwaalu gu thike pamwe gwaakiintu naalumentu  momahala guuwiliki  mongundu.Shika osha tula Namibia ponomola ontiyali muAfrika noponomola ontine muuyuni.Ekalepo lyaakiintu moParliamende otali koleke eitaalo ndyoka tuna mokukwatelamo ayehe oshowo okupa ayehe ompito yithike pamwe.

Omahupilo getu otaga wilikwa nawa

Namibia okwa dhikapo omahupilo  geli nawa. Oshilongo osha kala noku mona ekoko momahupilo galyo noopelesenda 5 komumvo momimvo ntano dhapiti mokati kekoko ndika omahupilo oga li pombanda noopelesenda 6,4 omumvo 2014.

Oongunga dha Namibia ongoshitopolwa  shiilikolomwa moshilongo kadhili unene pombanda nonando oshilongo oshali sha gumwa kenaipalo lyomahupilo muuyuni oshowo osha longitha iimaliwa oyindji opo shi etepo ekoko momahupilo noompito dhiilonga, oongunga nando odha londo sigo opoopelesenda 37 membo lyiimaliwa lyomumvo 2015/2016 ndhika otadhi ka shunithwa pevi okuya kohi poopelesenda 30 okuya pehulilo lyetulomiilonga lyondungethaneko ya Harambee omimvo ne tadhi landula.

Otwa ndhindhilike wo omwaalu omunene gwiimaliwa ta yi pungulwa moshilongo miikandjo yomahupilo ya yooloka oyindji yomwaambika  oya pungulwa moshikondo shoomina shoka tashi tyapula  onkalo yomalanditho ombwaanawa muuyuni.

Onkalo yomahupilo moNamibia oyili nawa miikondo ayihe yomahupilo kombanda yaashoka shoomina. Aapunguli moshilongo ina ya thiminikwa oku kalekaa iimaliwa yawo mbyoka ya longitha okupungula muka oku yi fala kegumbo nenge okuyi nanamo moshilongo noku yi tumina palwe.

Ooveta dhetu odha gamena uuthemba waapunguli aakwiilongo moNamibia. Omahangano gopaimaliwa mwakwatelwa ngaashi ndyoka lyIimaliwa lyOpaigwanwa [ International International Monetary Fund] noshowo Ombaanga yUuyuni[ World Bank ] oga pandula Namibia  momukalo ngoka ye a wilike omahupilo ge .Oshikwawo Namibia okwa tulwa pomuthika guli nawa komahangano ngoka haga tala nawa onkalo yomahupilo miilongo ngaashi  Fitch na Moody, shoka tashi ti iimaliwa yaakwiilongo mbyoka ya pungulwa muka oyili miikaha iiwanawa.

Tse otatu sindana mekondjitho lyoluhepo nuuwinayi kehe wopankalathano

Aakwashigwana iha ya li ekotampango kutya oli kale lya nyolwa nawa shi thike peni. Iha ya li woo ewiliko ewanawa noshowo emanguluko lyiikundaneki. Oshikwawo oshigwana ihashi ipalutha nengungumano lyomahupilo ngaashi tashi ulikwa kengushuluko lili pevi nenge koongunga dhili pevi. Onkene nonando okwa yiwa komeho moshitopolwa shuudemokoli oshowo pamahupilo, opena okwaathike pamwe okuwinayi kwopankalathano moNamibia hoka kwa kwatelamo okwaathike pamwe paiyemo, oluhepo, onkalo yokwaana iilonga yili pombanda unene tuu mokati kaagundjuka.

Omolwetompelo ndika epangelo olya igidha iita nolugodhi okukondjitha oluhepo oshowo okushonopeka eshongo lyiiyemo oyindji yi li miikaha yaantu aashona yowala.

Opo li tungile komukanka omwaanawa gwewiliko nengungumano, oholomende  oya tokola oku etela aaNamibia ayehe uuwanawa wopankalathano oshowo wopamahupilo, moku thikamekapo omahupilo ga kwatelamo aantu ayehe. Opo shika shi adhike osha pumbiwa okulonga iinima yontumba. Otuna okukokeka omahupilo noopelesenda dha pitilila puntano. Onkene ongepangelo tse otwa thaneka okukala nekoko lyomahupilo komumvo lyoopelesenda heyali nenge dhi vulepo. Otwa hala okumona omukalo gwomahupilo ga kwatelamo ayehe, taga lunduluka moshili taga longitha aantu oyendji melalakano lyokunenepala. Eyokomeho momahupilo  olina okuhumitha komeho omukalo goku gwedhako ongushu kiinima yomoshilongo, okunenepeka iilonga  yopamahupilo  shoka twi itaala tashi ka fala meetepo lyoofabulika odhindji pamwe neetepo lyoompito dhiilonga.

LEAVE A REPLY

Please enter your comment!
Please enter your name here