Aakulupe yi idhipaga momeya

0
388

 

ONANKE – Aakulupe taku hokololwa kutya oyali okumee komiihole yomomukunda Onanke mOndonga oya si sho yi iyumbile mondama yomeya oshiwike sha ziko. Oshiningwanimwa shika oshali sha ningwa mEtine lya ziko poowili dhokomatango.

Otaku hokololwa kutya Ananias Armas Niinkoti gwoomvula 65 na kuume ke komiihole Secilia Tomas gwoomvula 53, oyali  ya ka shinga puundunda pOnanke mpono ya konekiwa anuwa ya lita ya nyenyeta, ashike mboka ya li puundunda ina ya tseya kutya ookuume mbano oyali taya nyenyetele shike.

Otaku fekelwa omusamane a li a undula kuume nontoondje, no yali ya zipo puundingosho mpoka yi lambathana. Mwene gwomukunda Onanke Nikanor Paulus okwati ye ka adhika elipo puundunda ethimbo oshiningwanima shika sho tashi ningwa.

Okwaaha shiwo kwaantu nani sho ya zipo puundunda omukulukadhi anuwa okwa zipo tati oteki imangeleka, okwayi owala anuwa u ukilila mondama yomeya moka eti iyumbilemo nokashako ke kuusila hoka ali a humbata komutse.

“Omusamane okwali naye a hulako oongaku dhe eta tula okaplastika kena oothewa mpoka i ihulile oongaku pooha nomeya ando mutu nelalakano a ka kwathele mukwawo emu kuthe mo momeya ashike ayehe oya tonwa komeya noya hulitha ngaaka. Otwali twa mono okanona taka matuka nani okeya ke tu lombwele kutya oka mona aantu tayi iyumbile momeya moka,” Paulus ta ti.

Okanona hoka ka adhika taka takamitha iimuna pooha dhondama okali kaka hokolola shoka sha ningwapo, aakwashigwana sho ye keya oyaadha aantu mbaka ya hulitha nale no inaya vula oku ningaposha.

Ookuume mbaka otaku hokololwa oyali haya takamitha omagumbo ga yoolokathana pOnanke, nolundji ohaya monika anuwa yeli pamwe puundingosho owo tuu mboka. Aanamukunda oya hokolola kutya ondama ndjoka oyali ya hupwa kaantu mboka yali haya longo opate, mo omo ya kala taya kutha omavi nopethimbo ndino ohayi longithwa okupungula omeya pethimbo lyomvula go ga longithwe kiimuna naantu yopomudhingoloko omo haya nwetha iimuna yawo.

Opolisi moshitopolwa shaShikot sho ya koleke oshiningwanima shika, oya kunkilile mboka yeli moohole yi ikaleke kokule niinima iiwinayi. Taya pula uunona wi ikaleke kokule noondama dhomeya, wo waa ha kale noku dhanena omeya.

LEAVE A REPLY

Please enter your comment!
Please enter your name here