Aana ya Lubowski oyi ilongekidha okuyakula Namibia

0
284

Omutseyiveta nomunawino momathaneko gopashimaliwa, Almo Lubowski omwanamati gwanakusa Anton Lubwoski, okwa ti ye pamwe nomumwayinakadhona aakwashigwana yaNamibia no yi ilongekidha okukwathela meyokomeho lyoshilongo pamahupilo nopankalathano.

Toivo Ndjebela Omudhindi gwiikundaneki mongundu ya NEPC ndjoka tayi wilike iifo iimwainathana (New Era naKundana) okwa popi na Lubowski okuza ko Cape Town shaSouth Africa.

Kundana (Ku): Ngiika owa li omushona pethimbo Ho a mana oondjenda. Oshike to dhimbulukwa kombinga ye?

Almo Lubowski (AL): Okwa li ashike kuna omasiku gatatu opo ndi gwanithe oomvula omulongi na yimwe, sho Tate a dhipagwa. Otandi dhimbulukwa kutya Tate okwa li omuntu omunene iitegelela. Kali ha geye mbala, unene tuu natse aanona ye. Okwa li ena ohole ohokwe nomunashili, oshoka okwa kala aluhe he tu lombwele shoka tashi inyenge naashoka a li ta ningi.Onda li ndishi onkalo yopolitika moNamibia nomoSouth Africa.

KU:Oto mu hokolola ngiini, okwa li omuntu a tya ngiini?

AL:Oku gwedha kwaashoka nda tumbula nale pombanda, ye okwa li omuntu omunandhilo  ena omadhiladhilo ogendji Okwa li ena etegameno kombinga yemanguluko lya Namibia oshowo eyambulepo lyaantu uuna oshilongo shamanguluka. Shika okwa li a tegelela shi ningwe okupitila melongo. Okwa li e hole Namibia nokwa li a hala opo evi ndika li adhe omuthika omwaana gweyokomeho lyuudhilila. Oshinima shika okwa li he shi kondjele nomukumo.Okupopya paumwene , tate okwa li omukuluntu omwaanawa, nando okwa li iipyakidhila ongomutseyiveta okwa kala aluhe he tu monene ethimbo okukala natse.

KU:Owa li wu na omimvo ngapi  pethimbo Ho a si?

AL: Ngaashi ndeshi popi petameko onda li nda gwanitha omimvo 11 omasiku gatatu konima yeso lye, ye omumwamemekadhona Nadia  okwa li ngiika ena oomvula omugoyi oshoka pokati ketu na ye ope na

oomwedhi 18.

KU: Pethimbo sho Ho a si aakuluntu yeni oya li ye na aanona yangapi?

AL: Ongame nomumwamemekadhona Nadia atuke.

KU: Aanona omuli peni ngashingeyi?

AL:Atuhe otuli mo Kapa.Meme ka kwali ena ehogololo limwe lyaashi okuthigapo oVenduka oomwedhi ndatu konima yeso lyatate.Tse ongofamili ka twa li twa mono ekwatho lya sha. Meme kali ena iilonga ya sha nefamilia lyetu alihe olya li moSouth Africa. Otwa li twa pumbwa oku ya hoka  oku ka kwathelwa.

KU: Oto dhimbulukwa shike shoka Ho a longela Swapo oshowo Namibia?

AL:  Ngaashi ndati  onda li ndishi nawa iilonga ye yopolitika, ongomumatyona ondali nda kala piigongi oyindji yoSwapo moKatutura. Ookuuka lwopehulilo okwa li iipyakidhila nomalongekidho  ta longekidha omagumbo, iihauto  niipoleki[furniture] yaagaluki mwakwatelwa Omuperesidende Sam Nujoma.Otandi  dhimbulukwa nesiku a yile noohailwa ye oku kiishangitha molwomahogololo gomumvo 1989 muJune omumvo ngoka.

KU:Okwe shi ende ngiini okutopola ethimbo lye pokati kiilonga ye ofamilia ye oshowo uunandjungu mopolitika we?

AL: Osha li sha kindja,  nameme oye a li mewiliko lyegumbo esiku kehe, ihe nando ongeyi Tate okwa mono ompito  oku kala natse. Otwa kala ha tu yi komafudho pamwe noku tyapula ethimbo lili nawa. Uuna itaa longele kombelewa nena ota longele megumbo. Okwa li ena ombelewa onene megumbo. Okwa kala iipyakidhila ethimbo alihe. Okwa longo nuudhiginini  okusoshimpwiyu kutya Namibia olya manguluka, ihe nando ongaaka okwa kala e hole efamilia nuuna  a li ta vulu okwa li etu monene ethimbo okukala natse. Kandali nande esiku limwe ndu uvite kutya kepo kakele ashike kutya ye okwa li iipyakidhila noonkondo.

KU: Aantu ye ni, ya simana mboka ya li mekwatathano  na Ho, mboka wa tsakaneka paumwene?

AL:Okupopyapo yamwe mboka a longa na yo  ongaashi  nakusa Danny Tjongarero, Ben Ulenga, Toivo ya Toivo,Libertina Amathila, Hage Geingob, Theo-Ben Gurirab, Hidipo Hamutenya na yalwe. Ayehe mbaka onda tsakanena na yo. Oye shi ndje nawa nefamili lyetu nawa.

KU:Aawiliki yo Swapo no yepangelo oha ya kwatathana na ne omathimbo ge thike peni unene mokudhimbulukwa  esiku a dhipagwa?

AL: Halundji naanaa. Otwa li tu uvanekelwa iigongi, oshowo oonkundathana okutala nkene ngame oshowo Nadia ta tu vulu okulongitha uunongo mboka tse tuna moNamibia.Tse otwi ilongekidha no tatu vulu okulonga sha moshilongo nuunongo mbuka, ndele inatu mona natango oompito dhetu egulukila.Opena ashike yamwe yomwaalu omushona mboka tuna ekwatathano na yo.

KU: Ekwatho nenge eyambidhidho lini efamili lyeni lya mono okuza kepangelo nenge koSwapo  konima yeso lyaHo?

AL:Inatu mona nando ekwatho nenge eyambidhidho lyasha. Ihe shoka tse twa hala okukundathana newiliko lyonena lyoSwapo opo tu tale nkene tse tatu vulu okulongitha  uunongo wetu. Tse otuna elago molwashoka otwa longwa nawa okupitila moshimaliwa shekwashilipaleko lyonkalamwenyo ndjoka nakusa tate a li ena oshowo okulonga nuudhiginini kwa meme.Ngame ondina onzapo yuutseyiveta  oshowo owino momathaneko gopashimaliwa, omanga mumwameme Nadia okuna onkatu  yoMaster mElongo lyOmunona lyopetameko. Otuna uunongo nontseyo yagwana yi na oshilonga. Tse itatu indile tu pewe mokana ihe tse otwa hala oonkundathana okumona oompito  moka tatu  vulu okulongitha  uunongo wetu nowino yetu ndjoka tatu futilwa nawa molwiilonga mbyoka.

KU:Ofamili yeni  oyi na owino ya sha kutya olye adhipaga Ho pamukalo gwoshiyakela?

AL:Otwi itaala kutya etompelo ndyoka  lye mu dhipagitha omolwashoka kutya okwa li a tindi okulongela kumwe naayamba oohandimwe mboka ya li yena elalakano opo omahalo gawo gokutsikila ngaashi ya kala ga gwanithwe moNamibai lya manguluka.Ye kali iilongekidha  okutsa kumwe naambaka oku landithapo oshilongo ando komuniimaliwa oyindji kokutya oshilongo shi kale tashi wilikwa pahalo lyaaniimaliwa, sho shika osho she mu dhipagitha.

KU: Paveta nopamulandu guuyuki oshike shaningilwa oonaku mu dhipaga, opwa li ngaa omakwato nenge iihokolola mompangu?

AL:Aawe kapena nando ogumwe a tamanekelwa oshinima shika.

KU: Oha mu longo shike aanona ya Lubowski?

AL; Ngame omunawino mooveta nomomathaneko gopashimaliwa. Ondina ongeshefa yandje mwene yokugandja omayele. Omumwamemekadhona oye Omukuluntupithi gwehangano Anton Lubowski Education Trust.Ehangano ekwatheli, nomasiku gokomeho otatu ke li shangitha nomoNamibia no ta tu ka konga omakwatho gopashimaliwa opo ihe ota tu tameke noopoloyeka  dhelongo ngaashi ndhoka ta tu longitha moSouth Afrika.

KU: Ne, aakwashigwana  yoshilongo shini?

AL:Molwashoka ngame onda valelwa moNamibia pethimbo eli muukoloni wa South Afrika , otashi ti ngame onda valelwa miilongo mbika iyali onkene ondina uukwashigwana wiilongo mbika.

KU;Uunake wi ihulile okutalelapo Namibia?

AL:Onda li moNamibia mu Febuluali nuumvo.Ohatu talelepo kuku  moShiwakopo omathimbo nomathimbo.

KU: Oho landula shoka tashi ningwa moNamibia, nongele osho oshilongo owe shi talako ngiini kombinga yewiliko lyasho oshowo ehumokomeho?

AL:Ohandi landula shoka tashi ningwa moNamibia esiku kehe. Ondina etegameno enene nolili pombanda kOmuperesidende ngoka ta wilike oshowo kUuperesidende we. Ondi itaala kutya osha pumbiwa opo aakwashigwana noshowo aagundjuka ya tsikile noku indila epangelo li gwanithepo omauvaneko galyo.Kakele koku ninga ngaaka na ya uveko wo kutya Omuperesidende okuna iinima oyindji mbyoka  a pumbwa okulonga momahala nenge miimpungu ya yooloka.Omuperesidende omuwiliki a longwa  oshowo omulumentu ena owino ndjoka a mona miilonga  ishewe okwa tula wo miilonga  aaniilonga ye na owino momahala ga simana. Otandi dhimbulukwa Omuperesidende Hage Geingob pethimbo ngame ndali omushona, omumwamemekadhona okwa li ehole okukuutumba komatundji ge. Ondina etagameno ewanawa na Namibia kohi yewiliko lye , naashoka nda hala oku ithanwa ku ye opo ndi ye ndi kwathele okuhumitha komeho eputuko lya Namibia. Onkene otandi indile neifupipiko enene ehiyo lyOmuperesidende opo ndi vule oku mu hokololela elongo lyandje nuunongo wandje mboka tashi vulika tawu pumbiwa kelelo lye.

Almo-Lubowski

LEAVE A REPLY

Please enter your comment!
Please enter your name here