Ewiliko negandjo lyomayakulo lili nawa

0
232

Ontompolwa ndjika ota yi popi nkene oshilongo tashi ka longa okuhuepopeka uunashinakugwanithwa oshowo okulonga pwaana eholeko lya sha, Ota yi popi wo nkene tapu huepopekwa okulonga noshowo egandjo lyomayakulo okuza kiikondo ayihe yepangelo  nomoshigwana. Ota yi tala wo nkene taku nawapalekwa  ewiliko lyiiyemo moombelewa adhihe dhepangelo naandhoka dhomalutu gopapangelo.

Opena etsokumwe kutya ewiliko lili nawa olyo oshinima sha simana okukalekapo eyokomeho pamahupilo. Oshimwayina naashika osho okulonga nondjungu kwepangelo.

Moshipopiwa she shOnkalo yoshilongo shotango petameko lyewiliko lye Omuperesidente Geingob okwe shi popile kutya ewiliko lili nawa meyokomeho olya simana. Onkene okwa ti opena okukondjithwa uulingilingi.Nonando Namibia okuli nawa momambo gomahangano  gopaigwana ngaashi Mo Ibrahim Foundation, Heritage Foundation,  Transparency International,Afro-Barometer Survey oshowo  Reporters Without Borders, kombinga yewiliko lili nawa, natango opena omashongo ge na oku kondjithwa.

Okukala noshinakugwanithwa nokulonga puuyelele

 Okutala konkalo

Nonando opena omutungilo guunashinakugwanithwa, opena eitaalo kutya uunashinakugwanithwa itawu adhika miitopolwa ayihe yoholomende. Uunashinakugwanithwa otashi ti okukala wu na oshinakugwanithwa kushoka to longo nenge to ningi noshowo okugandja iizemo yiilonga yoye pamukalo inaagu holama. Mo Namibia oohandimwe ohaya longo shi iwetikile okupitila meuvathano lyiilonga, ndika lya kwatelamo niilonga yuuminista okuza omumvo 2015.

Uunashinakugwanithwa ohawu ulikwa wo pomuthika gwomahangano okupitila momishangwahokololo dhiikondo ya yooloka hadhi gandjwa pethimbo lyokutula omitengenekwa mwaalu dhiimaliwa mOparliamende omumvo kehe. Oshikwawo iikondo ayihe ohayi gandja omishangwahokololo dha konakonwa kaayaluli ndhoka  wo hadhi gandjwa moParliamende.Ngele momishangwa muka omuna iinima yaa uvitikeko, aanambelewa aakuluntu yomiikondo mbyoka ohaya ithanwa opo ya fatululile iilyo yokommittee yoParliamende.

Ota ku tiwa omuthika guunashinakugwaithwa ogu li pevi, molwashoka omauvathano gokulonga iha ga dhengele poondondo adhihe dhuuwiliki mepangelo.Oshikwawo omalalakano naashoka shina okulongwa ethimbo lyontumba ina yi tothwamo nawa noshuukilila meni lyeuvathano lyiilonga. Oshowo iha pa ningwa etalululo lyiilonga yaanambelewa.

Onkalo ndjika ota yi lunduluka pethimbo lyo Harambee. Molwashoka oshinakugwanithwa shika oshipe okulongwa kepangelo , otwa thaneka oku katuka oonkatu dhili nawa moku tula miilonga omathaneko ngaka .

Oshinima oshikwawo sha kwatathana nuunashinakugwanithwa osho okulonga puuyelele. Utya uuna itaapa longwa puuyelele nena nuunashinakugwanithwa itawu kalapo. Iilongo mbyoka yi na okulonga puuyelele kwa nkundipala, oyo wo yi na uunashinakugwanithwa wu li pevi. Shika otashi uvikako oshoka uuna itaapa longwa puuyelele nena ota pa holoka omadhiladhilo goku ningila koombunda nenge ngoka geitaalo kutya iinima ita yi longwa nawa. Onkene opo uunashinakugwanithwa wu kolekwe oshapumbiwa okuhuepopaleka okulonga puuyelele.

Okulonga puuyelele okwa simana okushonopeka onkalo yokulya oompanda mbali nenge ndjoka yoku zala omagala gaali miinakugwanithwa. Namibia sigo oompaka oye oshilongo moAfrika hashi longo puuyelele oshowo muuyuni. Transparency

International sho a tala elongo puuyelele miilongo 180 muuyuni okwa tula Namibia pondondo 45 ongoshilongo shalonga puuyelele muuyuni. Ondondo ndjika oya ulike einyengo lya Namibia nomahala omulongo okuyeleka nomumvo 2014. Namibia okuli pomuthika gumwe na Mauritius poshikolo oshititatu mokulonga nawa muAfrika.

Oku inyenga nomahala omulongo mo 2015 okwa holoka sho Omuperesidente a ulike omaliko ge nogomukadhi, oshowo a tseyitha omauvathano giilonga yOominista.

Omalalakano niizemo ya Harambee kombinga yewiliko ewanawa

[HPP01]

Omalalakano moku hwepopeka uunashinakugwanithwa oshowo okulonga puuyelele pethimbo lyondungethaneko ndjika ogo.

Oku yeluthapo omuthika gwetu moshuuliki sho Mo-Ibrahim shuunashinakugwanithwa okuza piitsa 65  mo 2015 oku ya piitsa ngele iishona omilongo 90 okuya pehulilo lyethimbo lyoHarambee.

Okuhwepopeka omuthika gwetu okuza puutine tse tu ninge oshilongo hashi longo nawa puuyelele muAfrika payalulo lya Transparency International. Okukalekapo ehala lyetu ongoshilongo shina emanguluko lyiikundaneki moAfrika ngaashi shuulikwa kaakundaneki yaanangamba [Reporters Without Borders.]

Oonkatu tadhi katukwa okwaadha mbika.

Oonkatu ndhika oshowo iilonga mbika otayi ka longwa okusoshimpwiyu kutya omalalakano ngaka guunashinakugwanithwa nokulonga puuyelele oga gwanithwapo pethimbo lya Harambee:

 

➜➜ Ondungethaneko yokukondjitha uulingilingi

Ondungethaneko ndjika okukondjitha uulingilingi okuza mo 2016-2019  ota yi ka tulwa miilonga ayihe ethimbo lyo Harambee.

 

Ethaneko ndika olya koneke kutya uulingilingi otau holoka momalupe ogendji onkene ndika otali kwata omahala ngaka.

  • Okunenepeka omuthika guunashinakugwanithwa gwaanapolitika.
  • Oku keelela uulingilingi moombelewa dhepangelo, muuministeli, momahangano oshowo mwaangoka gepangelo.
  • Okunkondopeka oonkambadhala dhoku keelela uulingilingi.
  • Okutulapo elongo lyaandjagana lyokukondjitha uulingilingi.
  • Okukeelela uulingilingi moshikondo shopaumwene noshowo

Oku longa pamwe noshigwana oshowo iikundaneki mokukondjitha uulingilingi.

➜➜ Okuholola iiyemo oshowo omaliko puuyelele

Omukalo gwokutseyitha iiyemo nomaliko puuyelele otagu tsikile ethimbo lyoHarambee.

Aanambelewa ayehe miikondo yoshigwana ota ya ka gandja omatseyitho ge nasha noongeshefa dhawo oshowo kehe mpoka ha ya mono iiyemo kakele kiilonga ya holomende. Shika otashi ningwa kiilyo yoParliamende pamautho goompango dhegumbo ndyoka omanga iilyo yoKabinete otayi tseyitha omaliko gayo  kOmuperesidende ngoka oye ha gandja iilonga kooMinista. Aanambelewa aakuluntu otaya ka tegelelwa wo ya gandje uuyelele komaliko gawo noshowo oongeshefa ndhoka ye na , nongele okwa ndhindhilikwa kutya ita ya vulu okukala niilonga ayihe mbyoka nena mbaka ota ya ka indilwa opo ya ninge ehogololo pokati kiilonga yoholomende nenge ya thigepo mbyoka ya ka longele omahangano gawo yene ethimbo alihe.

➜➜ Elongitho lyiiyemo yoshigwana oshowo uunashinakugwantithwa pashimaliwa.

 

  • Otatu ka soshimpwiyu kutya iikondo yepangelo ita yi ka pitilila ondondo yokulongitha oshindji nooperesenda mbali ngaashi shuuthwa moveta yiimaliwa. Otatu ka etapo wo ewiliko lyomayalulo lyopashikako kehe momumvo gotango gwa Harambee.

Ota tu  ka adha omuthika gwetulomiilonga lyomutengeneko gweyokomeho noopelesenda 95, moku kala ta tu gandja omishangwahokololo koshikako kehe kwaashoka sha longwapo.Otatu ka landula omautho goveta ompe yi na sha negandjo lyootendela kaaningi yomaindilo giilonga mbyoka. Iikondo ayihe, omalutu agehe oshowo omahangano agehe goholomende ogena okulandula omautho ngoka.

Moshinima shika omautho agehe nomilandu utho adhihe otadhi ka ngongwapo  nokutseyithwa meni lyoomwedhi ndatu sho ondungethaneko yaHarambee ya tulwa miilonga. Nomombepo ya Harambee omautho nomilandu ndhoka, otadhi ngongwapo moku kundathana wo naayehe ya gumwa kudho. Olutu olugandjimayele kombinga yomilandu otalu dhikwapo  meni lyoomwedhi ndatu momvula yotango yeyo miilonga lyaHarambee kokutya nduka otalu kala lwa tameka iilonga oku ya mu Juni 2016 omanga euliko lyEwilikongundu lyopokati li na sha nootendela otali manithwa omanga Desemba 2016 inaagu shangwa .

 Okuhwepopeka elongo puuyelele

Oshikondo Shiimaliwa otashi dhikepo olutu lwa shewa ndoka talu kala noku konakona omapulo genasha netalo oshowo egandjo lyootendela naanduka otalu kala ha lu gandja iizemo koshigwana kombinga yomapulo gasho.

  • Ita pa ka pitikwa we egandjo lyiilonga inaa shi pitila mokutendela, sho hapa etwa omatompelo kutya omayakulo gontumba oga pumbiwa meendelelo, shika itashi ka pitikwa we.

➜➜ Opo egandjo lyiilonga yopashigwana likale puuyelele Oshikondo Shiimaliwa otashi ka etapo omukalo gwopakompiuta moshinima shika pehulilo lya Desemba nuumvo.

 

➜➜ Okumona uuyelele kaakwashigwana:

Opo oshigwana shi vule okumona uuyelele  mboka sha pumbwa okuza kepangelo, Oshikondo shomauyelele nomakwatathano gOpaungomba otashi ka tulapo omathaneko opo aapopiliko yiikondo ayihe yepangelo ya kale yena oshinakugwanithwa oshinene shoku andjaganeka uuyelele  koshigwana, Yo ndjika ota yi kala yatulwa miilonga okuya pehulilo lya Juni 2016. Oshikwawo methaneko muka omuna okukwatelwa epitikilo lyoshigwana oku imonena uuyelele okuza koholomende.

 

➜➜ Okugamena aagandji yuuyelele

Opo shoka sha tumbulwa pombanda shi tsikile noku kalapo, omutungilo gwewiliko otagu kolekwa moku etapo oveta yokugamena aagandji yuuyelele okuya muSeptemba 2016.

 

➜➜ Okukala nontseyo  kombinga yetoto lyooveta oshowo omilandu.

Opo oshigwana naamboka ya gumwa koontotwaveta yaa, yakelwe kooveta nomilandu ndhoka epangelo, otali hwepopeke omukalo gwokuninga ooveta gweeguluka opo kaagu etepo onkalo ndjoka yehilathano yokutya oyo ya taalela tse. Mwaashika Oshikondo Shuuyuki  melongelokumwe nombelewa yAhende Ndjai  ota yi tulapo omusholondondo  gwiipumbiwa mbyoka yi na okutalika uuna ooveta tadhi totwapo naanguka oguna okukala gwa tulwa miilonga okuya mu Juni nuumvo. Opo oshigwana shikale neinekelo  metoto lyooveta  otashi kala tashi dhengele  koshikondo kehe opo shi gandje uuyelele koshigwana konima yokushi pula omayele  kombinga yoveta ndjoka.Otapa ka ningwa wo ekonakono lyaandjagana lyooveta adhihe dhongashingeyi okutala kutya odhini tashi vulika dhili omainda okwaadha omalalakano gopashigwana, dho ndhika odho tadhi ka talwa nawa opo dhi lundululwe ngele otashi vulika.

➜➜ Ewiliko paintanet:

Okuhumithakomeho elongo lyopuuyelele otatu ka andjaganeka elongitho lyuutechnologi oku kala miikondo ayihe oshowo  yepangelo, nomalutu gopapangelo okuya pomumvo 2020.Ombelewa yOmuprima Minista pamwe nOshikondo Shomauyelele ongo omalutu gepangelo ge na sha nomathaneko oshowo etulo miilonga lyomakwatathano gopashinanena agehe goholomende ota ga ka gandja ethaneko nkene omakwatathano ngaka taga gandjwa okuya mu Juli 2016.

Iikondo ayihe yepangelo  showo omalutu gepangelo ota ga ka kwatakanithwa  newiliko lyopa intanet pethimbo lya Harambee.

Ota ku tamekwa niikondo mbika momumvo gwiimaliwa 2016/0217 Ombelewa yOmuprima,Oshikondo Shiimaliwa,Oshikondo shiikwagumbo nOmatembukilomo; Oshikondo shUukalinawa nIilonga yOnkalonawa,Oshikondo Shehumithokomeho lyuuhambudhi, Iipindi neyokomeho lyoongeshefa ooshona nodhopokati,Oshikondo shElongo, Uunkulungu nOmithigululwakalo, Oshikondo shUunamapya, Omeya nOmakuti, Oshikondo shOmidhingoloko, nOmatalelopo; Oshikondo shElundululo lyevi naashoka Shuuyuki.

➜➜ Okukala kwepangelo mointanet:

Opo epangelo li kale popepi noshigwana otatu soshimpwiyu kutya omapandja galyo  gokointanet oge li pamuthika noshowo ota ga kala haga tulwa uuyelele uupe olundji.

Omulandu mwaashika otagu ka ngongwapo kOshikondo Shomauyelele okuya pu Juli 2016.

➜➜ Okulongitha omakwatathano gopankalathano

Otatu soshimpwiyu kutya aapopiliko yoholomende otaya vulu okuya momahala gomakwatathano gopankalathano ngoka gena oshilonga miilonga ayihe yepangelo. Oshikondo shOmauyelele otashi ka gandja omulandu gwelongitho lyomakwatathano ngaka okuya pehulilo lya Juli 2016.

➜➜ Elongitho lyomakwatathano koshigwana  Ota tu soshimpwiyu kutya oshigwana otashi vulu okulongitha omakwatathano ngaka uuna ngaka gena ondando yili nawa go ishewe ngaka otaga vulu okumonika komukwashigwana kehe.Oshikondo shOmauyelele otashi ka gandja Omulandu oshowo omathaneko nkene nguka tagu tulwa miilonga okuya pehulilo lya Kotoba 2016.

 

LEAVE A REPLY

Please enter your comment!
Please enter your name here