Minista Sioka a patulula okinda pOkaku

0
393

OKAKU – Minista yUukashike kOokantu nOnkalo nawa yuunona Doreen Sioka okwa patulula okinda ndjoka tayi ithanwa Kapya Kamupolo Kindergarden oshiwike sha yi pOkaku.

Sioka oshiwike osho tuu shoka okwali a egulula pambelewa ombelewa yopashitopolwa yoUministeli wUukashike kookantu pOmuthiya oshowo okinda moshikandjohogololo Etayi. Pethimbo ta egulula okinda ndjika okwa ti ookinda odho unene tadhi dhana onkandagala onene melongo lyopetameko lyomunona.

“Uunona awuhe mboka wuna oomvula okutameka po 0-6 owa pumbwa elongo ndika lyoshikunino opo sho tawu ka ya koongundu dhilwe owa pyokoka nawa. Uunona mboka we enda mookinda ohawu ningi nawa miilongwa yawo naaluhe ohawu kala wu wete ondjila nkene tawu longo iilongwa yawo.          Onkene osha simana opo aavali ya tume uunona wawo kookinda manga kuyele wo wu kale wa mona elongo lyopetameko,” Minista a ti.

Okwa tsikileko a ti uuministeli we owi ilongekidha okugandja omakwatho mpoka tawu vulu , unene melongo lyuunona. Sioka ta ti ota ya tsikile no ku longela kumwe nUuministeli wElongo yo ya kwashilipaleke kutya uunona auhe owa mona elongo ndyoka lyopetameko, wo tawu tsikileko ishewe noondondo dha landula.

Minista ta gwedhapo kutya opena unene ompumbwe yookinda moshigwana, naakwashigwana oya pumbwa ya kwathele moku etapo omanongelo ngaka yo taya kwashilipaleke kutya aanona oya mona elongo, yo ya ka ete iizemo iiwanawa moondondo ndhoka tadhi ya pitika ya ye kiiputudhilo yopombanda.

“Konima yoomvula omulongo dha piti Uuministeli mbuka wUukashike kookantu nonkalo nawa yuunona owa kala tawu longo nuudhiginini opo ya nkondopaleke noku indjipaleka omiyalu dhookinda moshilongo ashihe, noku gandja woo omayakulo ngoka golela. Onkene  otandi indile omahangano kehe,aavali oshowo aakwashigwana tu kwashilipaleke kutya ookinda miitopolwa yetu odhina iilongitho ya gwana, yo aanona ya longwe nawa,” Minista ta gwedhapo ngaaka.

Omulongi gwokinda Irja Nghipandulwa okwali a holola kutya okinda ndjika oya totwapo mo1994, mono ya kala haya longele kohi yomuti, ne thimbo limwe a ka kala ha longele mongeleka yawo. Okinda ndjika pethimbo ndino oyina aanona yeli 45.

“Onda pandula unene sho nda tungilwa okinda yandje yi li pamuthika gwoshinanena, sho ndili ngeyi ondu uvite uuntsa nuunambano oshoka otwa pewa woo iidhanitho niikwathitholongo mbyoka ya pumbiwa moku gandja elongo poonkatu dhopetameko, aavali oyendji oya holola eitulemo lyawo naashino osha kumike ndje ndi tsikile noku gandja elongo,” Ta gwedhapo ngaaka nenyanyu.

Ngoka a li nale kansela gwaKaku, Joseph Kapya Endjala oye a lukilwa okinda ndjika, Endjala okwa li a etele mbushe omagano ngoka ga kale taga longithwa melongo lyopetameko lyokanona. Ehangano lyaCAFO mewiliko lya meme Hileni Nashongo olya li lya gandja iipundi yuunona oshowo iitaafula.

 

Kindergarden Kindergarden2

LEAVE A REPLY

Please enter your comment!
Please enter your name here