Oosipana mbali dhokoNooli dha kaleka omahala gadho moliha

0
258
Omudhani gwokomeho gwo Young Chiefs Shipalanga mokambindja okambulawu ngoka ena oompadhi hadhi endelele okwa li gumwe gwomaadhani mboka yali ya kutha Young Chiefs muudhigu ehuliloshiwike lyazako.

 

ONGWEDIVA-Oliha yo MTC Namibia Premier League oya li ya hulu ehuliloshiwike lyazako moka oosipana dhimwe dhali dha mono omasindano, nadhilwe odha li dha gumo moliha oku ya koliha yopevi.

Aakalimo yokiitopolwa yokoNooli nando oya li yi ikwata pomutima sho kwa li kuna uutile kutya osipana ndjoka ya kalela po oshitopolwa moliha ndjika oya li yi li pokugwamo shika ina shika ningwa.

Young Chiefs ngoka ali a pumbwa iitsa yili ine opo a kale ke po ehala lye moliha ndjika okwa li a eta enyanyu enene kiipala yaatali Olyomakaya gazako sho ali a hanagulapo osipana yoUnited Stars nookoola 3-1 noku kala ashike a pumbwa oshitsa shimwe muudhano wawo mOsoondaha.

Ashike aayambidhidhi yo Young Chiefs oko nyala yi iyadhe muudhigu sho osipana yawo yali ya tulwa ookoola mbala mbala kosipana yo Julinho FC yokoRundu, sho omukwati Nalimanguluke Indongo ali atulwa omatanga geli ga tatu osheendelela medhingoloko lyotango. Sho oosipana ndhika dha li dha yi po ka fudhepo eyalulo olya li lya gwililapo Young Chiefs oshoka sho ya yi pokafudhepo oyendji oya li yi itaala kutya Young Chiefs oya li ta yi ka gwamo molihashi ikwatelela komaudhano goosipana dhilwe ndhoka dhali tadhi kondjele okukala moliha yopombanda ngaashi Young Chiefs na ye osho a li ta kondjele.

Ashike omudheuli Alex Itumba okwa li a ningi omalunduluko ga kwata miiti sho a tulamo aadhani yaali oshita medhingoloko etiyali moka mbaka ya li ya shendje uudhano.

Kennedy Paulus okwali a lapako okoola yimwe uuminute uushona okuza pokafudhepo noku eta eyalulo likale 3-2 ashike Young Chiefs okwa pumbwa natango okoola yimwe opo a kale moliha, aayambidhidhi oya li ye li poku teka omukumo sho oonkambadhala adhihe ndhoka Young Chiefs ali a ningi dhali dhafa tadhi hulile muunyengwi, unene tuu sho ethimbo lya li ta li hala okupwako.

Sho ashike kuna oominute ntano uudhano wu ye pehulilo omudhani gwokomeho Nuuyoma Castro okwa tulamo okoola ombwaanawa okuzilila kominga yokolumoho moka aayambidhidhi oyendji ya li yeshi etanga ota li yi kondje, ohaluka oye wete etanga lili monete nenyanyu olya li pombanda mokati kaayambidhidhi yosipana ndjika.

Eyalulo lyahugunina olya li 3-3 niizemo mbika oya li ya kuthamo osipana yoJulinho FC opamwe nomushiinda she United Stars ngoka ali a dhengwa ku Rundu Chiefs , osipana onkwawo ya gwamo moliha ndjika oyo Flamingos ya Rehoboth.

Moliha yo First Division ,Osipana yOngwediva City ndjoka ya kala ya tseyika Arsenal yaNgwediva oya li ya kalekepo ehala lyawo moliha ndjika sho yali ya dhenge Onambula United megumbo nokola yimwe monola.

Osipana onkulu moliha ndjika Golden Bigs yaNgwediva oya li ya adha okwena kwa hula moliha ndjika oshoka kOshikuku oya li ya ziko ompadhi ketako sho ya dhengwa koYoung Stars.

Osipana ndjika yo Bigs ita yi ka dhana we moliha ndjika ya kala yiigilila sho oliha ta yi ka tameka oshoka oya gwila koliha yo Second Division yaShana.

 

 

LEAVE A REPLY

Please enter your comment!
Please enter your name here