Ounona voukadona ova pumbwa exungomwenyo

0
255

Oiningwanima ya halikasha halikatoka yokuekelashi ounona nokulikufa omadimo, oyo tai ningwa kovanyasha, nokounona ovo opo ashike tave uya mefimbo loukadona ota i ulike kutya oshilongo osha pumbwa exungomwenyo la kwata moiti

Omafiku kemale eshi omukainhu eheshivike a fiya okaana kafya mondjato yaMwaudako pEtango. Okaana oko fiyo onena inaka monika. Oshivike vali eshi ovakainhu ovanyasha va vali mwa kwatelwa okakadona keedula 19 ove li kufa omadimo.

Omunhu otoli pula kutya mbela oiningwanima yokutapa mo omadimo nokuekelashi ounona ya ningwa moitukulwa aishe 14, oyo ya lopotelwa opolifi naayo inai lopetelwa opolifi ya ningwa oshivike eshi osho ashike mbela oifike peni?

Luhapu oukadona nounona ovo va kufa mo omadimo ovo hava pewa ombedi. Eheno shili, ava ove na mo olunyala moshinima omu shaashi ovo have li kufa omadimo nokuekelashi ounona meyukilulo, ashike exungomwenyo, epukululo nouteku mounona aveshe voukadona noumati okudja ashike petameko otai ka kwafa neenghono.

Ounona ova pumbwa okulongwa efiloshisho lopailyo yoidalifi, oupyakadi wokuya momilele inadi longekidwa nodihena eameno, nokuninga omaufimba inaa longekidwa.

Ounona vopaife oveli poupyakadi unene shaashi vahapu ova dalwa kovakulunhu ovo navo ina va mona omhito yokuya mepukululo eli, kutya nee omofikola ile pamwe outeku womeumbo shaashi vamwe navo ovali va shona eshi veva mona. Ovakulunhu vamwe ponhele yokulongekida efimbo va pukulule ovana, ohava kala ashike keendingosho tava nwaanwaa omalodu. Nokuli vamwe ovo to hange tava kondekele ounona konima yomakuma nokuva hekela ounima vanafangwa ngaashi ouleke, outyepisa, eecellphona, oikutu nosho tuu.

Omukulunhu nee ngee owa hange ta ningi okaana kamukwao ngaha kaye mwene oko nee ta ka dula okutekula?

Kakele kokuiwa navo momulele komukalo wokuhekwa, ounona vamwe ohava kala va kwatwa onghonga ndele shaashi ova tilifwa voo kave na ekwatafano liwa nokulineekela ovadali novatekuli vavo iha ve shi popi kovakulunhu. Nokuli ovakulunhu vamwe ovo hava ningile ovana omatilifo, nande ookuva taata mo momaumbo ava ile oku va denga osho hashi eta ounona voukadona veli hange monghalo ya nyika ekano, vehewete apa tava yuka ngee va ninga omateelelo. Eshi ohashi eta opo va dilaadile okuekelashi ounona nopomhito imwe veli kufe nokuli omwenyo. Efimbo limwe okaana okadala nee okaana kako nawa, ndele eshi keli meumbo otaka tukaelwa ashike, nefimbo limwe ina ku talika kutya pamwe okena omadidiliko efindakano lomadilaadilo koo ka pewe exungomwenyo. Omolwa omaudjuu aeshe oo, ounona ihava dulu okufila oshimwiyu ounona vavo, oto hange tave va ningi nai, tava tula eemwenyo dounona vavo moshiponga, voo efimbo limwe tave va faduka po. Oshivike eshi shadja ko Kundana okwa nyola ashike ehokololo lokaana ka fiwa moshipangelo. Eheno shili oshili xwepo eshi ohanana oyo ina i dipawa, ashike ngeenge ngeno okaana kokakadona ile omunyasha okuna eyambidido lofamili yaye oinima aishe ei otai dulu okukeelelwa

Opo oshilongo shi dule okukondjifa nokuninipaleka omateelelo inaa longekidwa omalikufo omadimo nokuekelashi eehanana, oshikondo shonghalonawa, oshikondo shelongo, oshikondo shovanyasha nomalelo opamifyuululwakalo nosho yo ongeleka oya pumbwa okulongela kumwe i longe noudiinini, ta i longo ihe na edimbuko, opo ku nyumunwe po outeku, okulonga ovadali nounona vavo veli honge okuli hola nokulineekelafana, nokunyumuna po omifyuululwakalo odo tadi tungu. Ounona ova pumbwa okuhongwa efimano lokukwatela po oukadona wavo, nongeenge veli hanga momapuko ile moshiponga ngaashi mekwatonghonga va kale ve shishi kutya opena omunhu ile ovanhu ovo veli longekida okuva pwilikina nokuvakwafa.

Opa pumbwa yoo oku tulwa meendelelo eenhele opo ovakano ovo tave li hange vena ounona ina ve va hala tava dulu oku va fiya, tave shi ningi noupu, nonomapulaapulo a ninipikwa. Tashi ningwa memanguluko opo ashike eemwenyo dounona ta di xupifwa.

Okuekela shi ounona nokutapa mo omadimo oyo imwe yomomididimbe ile oshidjemo shaasho tashi linyenge momaumbo etu nomoshilongo shetu, ndele ei ota i kondjifwa ashike ngeenge pena exungomwenyo neyambidido lawana nekwatafano liwa pokati komudali nokaana, kongeleka noilyo nokepangelo noshiwana.

LEAVE A REPLY

Please enter your comment!
Please enter your name here