TUYENI KOLUPALE LA TUYENI: Ovanangeshefa hava ningi ngaipi vati?

0
377

Tatekulu Ndemulungila Salomo ya Kaimbi, okwa dalelwa kOkapangu mo Angola mEvale, adalwa mo 28 Febuluali 943, inakulu ou adala xe, Omunghumbi kedalo omanga meekulu ou adala ina, meekulu Nehepo la Mwashekuna Omukwanyama a tungila pOihole ya Mandume, Meekulu Nehepo eshi veli na Haufiku yaKasheta oveli namhedi yaye, umwe okwadja momulumenhu omanga umwe adja momukainhu.

Ashike meekulu Nehepo ya Mwashekuna, okwa fa taku hokololwa kutya omutekulu mekoto la Namadi ohamba, kwali yaUkwanyama eedula dii, oyo kwali ihole nashifye, Namadi kakwali haka nangala ina mona ohonde fiku olo, kutya ne oyoshinamwenyo ilo oya shike shima ashike amona ohonde ohaudu nawa.

Ye tatekulu Kaimbi ne ou nakudala tatekulu Ndemulungila, oo takuti omona womunghumbi, omushamane oukwali ashivika nawa pomido 1922 kwali a nukila onghoshi yomedi ina omwenyo nde teilutula.

Ye inakulu ne ou adala ina, meekulu Nehepo laMwashekuna, natango oye kwali ashivika nawa pOihole ya Mandume, kwali ena oudila womaxuvi! Hano sha hala okutya okwali ena ounongo efimbo olo wokukwata nokukanyatela ovanhu peefingo ngeenge vakofa, oshili Ndemulungila otaulike kutya okwa dja meehonde adishe dili mbali danyika oshiponga.

Salom ya Kaimbi, molwaashi naye manga ali omumati okwali ehole onghandeka, kakwali hadenge omunhu inaa ka tumbwa keumbo lavo, onghe kOkapangu okwa ka lekelwako koveta opo aye kOihole vaka tyatya leke ovanhu oufiku vo nainakulu omaufiku.
Tatekulu Salom ya Kaimbi, omunangeshefa kedalo, naashi a lekelwa kOkapangu, pOihole puinakulu okwapitililapo ndele ta tauluka eengamba da Namibia na Angola, noku fikila pOnekwaya ya Haitembu ili popepi nOdibo, peumbo opo aya pOnekwaya, mepya omo mwali inakulu Ndapona yaShikende ali ohamba yaUkwanyama nale, nayo okwali yomepata la Namadi, ashike epya okwa hanga ne muna ovanhu vamwe nale.

Ame mwene onda mona omhito yokuya meengundafana pangodi natatekulu Salom ya Kaimbi, molwaashi ounangeshefa okweutota nale efimbo opo eya mo namibia mo 1966,paife ngaha omunangeshefa vali wounamapya molwaashi okwakulupa ngo ne ita landifa vali ouleke.

Halou tatekulu Kaimbi opo ngo uli pongodi?
Opo ndili Ya TUYENI, ondi kuudite popya ashike natu ye komesho.
tatekulu Kaimbi, ova Namibia ovelipo ngo ne vatila paife omolwa omalinyengo tae linyenge moshilongo apuka amwe oo nokuli ta ku ti okukwetelwe komesho kovanangeshefa vomoshilongo hano mboli omwakala naana hamungeshefa ngaipi tatekulu?
YA TUYENI popya ashike oinima pauyelele mumati wange onda fa ngo nde he uditeko nawa kutya owa hala okutya ngaipi.
Aai tatekulu Kaimbi, nai ku pule manga shinasha novanangshefa ava vashona ava hava landifa otombo hano, eshi takuti keengoma deetombo ohakuxwelwa oinima opo eekastoma dingongole nawa opena ngo oukwashili apa tatekulu ilo opena omalundilo?

YA TUYENI hamba oto pula nge oinima yakula nena idule nouluvi wange mutekulu wange, she monale okwali hatu landifa Kalunga fulenge, ashike oludalo eli le ke ya konima yetu eli oshili otali xunu kaume wani ponhele yokulya ovanhu.
Aai! Salomo yaKaimbi, natango otaku hokololwa vati ovanangeshefa ohamu pula ovakainhu ava tava kongo oilonga opo muye navo momilele nye nokonima opo mu vape oilonga, oshili naandi omitoto ngoo ta di tongwa, hano oshinima oilonga ilo ondjala vali?

YA TUYENI, oinima oyo imwe oya ningwa ashike oupyakadi ohaukala ne apa kutya, omunangeshefa umwe shima tu a udikwa koshiwana aninga oikoya yaye, nena oshiwana ohashiti ashike ovanangeshefa aveshe ovo tavaningi ngaho ndele hasho naana ngaho.
Aai! Salom sha Kaimbi, popya utale oshili wani ovaNamibia ovena ondjala yokuuda nawa, molwaashi oshili ovalimbililwa, opena omahokololo ta kuti vati opena ovanhu tava kulula ovanhu omaufiku nokuvateta keendjila omaufiku, ndele vati ovanangeshefa omwafa ngoo onye mu shilile komesho, aaye mu tu apa itamu lundilwa nee apa, oshili naadi odanakalindi tatekulu, natu dishune ashike apa twedikufa nokuli?

YA TUYENI, ounyuni owanyonauka ou, nomaliko paife otaa kongwa taapitile meemwenyo dovanhu, oshili ondi udite onghenda mokuuda oshiwana shaNamibia shimwe tashi ponokelwa sho shimwe tashi kanifa eemwenyo moinima yaa ha fele, ashike oshili oonakushininga ovateelela epangulo lavo meulu.

Natango otaku hokololwa ovanangeshefa vamwe mu hole okulanda oinima ei yavakwa komatungo avakweni, ndele ngeenge nye omwavakwa ohamukala vali mwanukifamo omesho, oshike muyele okutuwa nye muhole okutwa ovanhu, ngeenge ouhole okulanda oinima yavakwa nena naave vakwa ashike, olyelye ahala okukana vati kombada yedu oku mboli?

YA TUYENI, eshi osho naana omukifi wotete uli moshilongo nomovanangeshefa vetu, ovena oshiponga osheshi ovekwetele komesho oumbudi ashike ovadimbwa kutya navo ovena omaliko eli moshiponga kombinga yookalyamupombo ava have limange oukuni kumwe navo.

Tatekulu Salom ya Kaimbi, lombwela utale oshiwana shaNamibia osha hala okuuda nawa, hano eshi taku hokololwa ta ku ti ngeenge ovanangeshefa muna oimbofa yeni ili kopolifie ohaikaneneko nde ihaku monika apa ya ningina, engungule eli hali ka vakamo oikoya yeni meembonge do polifie eima lifike peni?

YA TUYENI, oshili ouli mondjila oshoshili ovanangeshefa vakwetu vamwe ohava kendambala okufuta eembubo ovo hava longo noikoya, opo oibofa yonumba ikana ashike ondiwete kutya omukifi wakula ouli kovapolifi ovo hava itavele oinima ili ngaha, vo ngeno ovo ovaameni voshiwana ndele otava nhupo vali oshiwana.

Aai! Salom sha Kaimbi, paife ne eshi ovanhu hamukala tamu va taataa omaufiku mwa hala oku va kulula noku vateta keendjila opo mu va kutule ominino vamwe tamu va nwefa oipolopolo, sho oshiwana osho ngo ne eekashitoma deni shemweeta pododo opo, paife omwateelela eengeshefa deni di ka landwe koolye,ngeenge ovanhu otamuvadipayapo?

YA TUYENI, ame shima ashike ndili poima andi lipula, oshili ondiwete kutya oshiwana shetu eshi shopaife ngaha eshi, oshauka momilema neengeshefa dasho kandiwete nande dili momepo youyuki osheshi ohashipula vali eemwenyo dovanhu opo vayambukepo, onghe ne ngeenge ngo itava tulapo ei, otuli moshiponga.

Uuuhu! Salomo sha Kaimbi, oshili nye mboli ngeenge nye ongo ovanangeshefa nde osho ngo tamui ngaha, otwa teelela oshilongo mushi mbuwaaleke ovanhu vapwapo okukululwa nokutetwa ominino, nye eengeshefa deni mbela tadi ka landwa komapumutu nokomadila ookaimbi vo ookakodi tava kala ne tava tale apa padalela eexuxwa.

she okwali hatu lipula hatu ti ovanangeshefa onye mukwete oshilongo, ashike mopaife otwa tila molwaashi onye vali ta mweende tamu tu kongele apa pena oomeendo opo mutu fudike nomwenyo, onghe ondiwete okuxuna kovanangeshefa vopaife, oshili eenghali dombadilila xwepo vali.

Salomo sha Kaimbi oilonga tamu longo kombada yedu oku oyapuka nye ndimbulukweni kutya eengeshefa deni odo mwaninga oikalunga baala tu kwafa, meulu oshili ita diimo omuna oku kalafaulwa nokunakaulwa nomapokolo kwaau eli pombada.

Ovanangeshefa vopaife nye oshili ovakolokoshi ashike muli poima, omutenya omwafa ngo ovanhu ndele shima ngo la ningine onye vali mwaninga eenghoshi dovanhu, nye mOshoondaxa omwa djala vali eeshuta tamu kaumba ongalo kongeleka hano Kalunga omwemuudako ngaipi?
JOHN YA TUYENI
MRTUYENI76@GMAILA
CELL 0812988

 

 

 

LEAVE A REPLY

Please enter your comment!
Please enter your name here