Aanona na ya ningilwe oonzapo dhomavalo kuyele

0
296
Minista Pendukeni Ivula Ithana pethimbo a popitha aanambelewa ye.

 

OMUTHIYA – Minista yIikwagumbo Niiyelo yoKoongamba Pendukeni Ivula-Ithana sho a talelepo ombelewa yuuthemba wopashigwana  moshitopolwa shaShikoto omwedhi nguka okwa pula aakuluntu opo ya shangithe oyana mboka opo ya valwa.

Ithana metalelopo lye okwa li a pula opo aanona ayehe taya valwa ya kale ya ningilwa oonzapo dhomavalo mbala, ye kehe omuNamibia nakale wo ena uuthemba woshilongo.

Ithana okwa dhimbulutha woo aavali yaanona na yo ya kale ye na omauthemba goshilongo opo aanona ya wo ya monenwe uuthemba pwaana okuongaonga . “Otuna omashongo ogendji moShikondo shetu, mono aanona oyendji kaa ye na omauthemba, naavali yamwe ohaya kala owala ya mwena no itaya kongo uuthemba, uunona owuna uuthemba okutseya aavali yawo ongele he nenge yina,” Ithana ta ti.

Minista okwa ti woo okwa konekiwa oohe yuunona oyendji ha ya fadhukapo iinakugwanithwa yawo, yo yamwe oha ya tindi oku ningila oyana oonzapo dhomavalo, tati aalumentu oya pewa oshinakugwanithwa  shoku sila aanona oshimpwiyu ashike oyendji iha ya gwanithapo iinakugwanithwa mbyoka, oshoka ngele a gandja epunda oha yi ta thigi mukwawo ena epunda, nongele okanona ka valwa ite ka kwathele ye ota tindi noku ka ningila onzapo yevalo.

“Aalumentu  longeni oshinakugwanithwa shoku kwathela uunona ne mu shi yambuleko  komapepe gaakiintu e ta mu shi humbata komapepe geni, ne tamu kala muna oshimpwiyu no yana ye ni, oyendji oha ya tegelele owala uunona wu koke wo wu kale wuna oonkalamwenyo dha yela nena opo taya holoka oshoka oye shi kutya aanona oya pita oosikola ngashingeyi. Ne aakiintu ngele he yomunona okwa tindi oku ninga onzapo yevalo, ningila omunona onzapo to mu tula kedhina lyoye  ye he ngele iigaluluka tamu ningulula onzapo yimwe yo ofani yokaana tayi shendjele  ku ye,” Ivula Ithana a thaneke ngaaka.

Okwa gwedhapo kutya okwa konekiwa aaniilonga moombelewa dhuuMinisteli we itaa ya yakula nawa oshigwana, nolundji ota ya yamukula aantu nayi nonande ya tulilwapo okuyakula aantu nombili, ta pula aanambelewa mboka haya yamukula aantu na yi ya lundulule  omikalo dhawo yo ya gandje omayakulo ngaashi taga pumbiwa.

Minista okwa tseyitha  kutya oya thaneka opo ku ka tungwe ombelewa koshikandjohgololo Nehale lya Mpingana monakuyiwa, ko ku hwepopalekwe omalweendo, yo aakwashigwana ta ya kala ta ya ningi omauthemba gawo popepi.

Ngoloneya gwoshitopolwa shaShikoto Henock Kankoshi okwa li a tseyithile Ivula Ithana kutya moshitopolwa shawo omuna aantu oyendji yaana omauthemba shono sha konekiwa unene miikandjohogololo Nehale lya Mpingana, Eengodi, Onyaanya nOmuntele, ta ti  ombelewa ye oya li ya talelepo iikandjohogololo konyala ayihe mOshikoto neshongo lyaantu yaana uuthemba olyo ya mono ta li holoka  olundji.

Poombelewa dhuuthemba mpoka opwali pu udha aantu yaza kombinga noombinga dhoshilongo taya kongo omauthemba pethimbo Ivula Ithana a li metalelopo. Aanambelewa mombelewa ndjoka pOmuthiya  oya ti oha ya yakula aantu oyendji , nomolwa omwaalu ogundji aantu yamwe ohaya shuna komagumbo yo ya galuke esiku lya landula.

 

 

 

LEAVE A REPLY

Please enter your comment!
Please enter your name here