Ehokololo lyaluhupe

0
220

OSHAKATI – “Ando okwa li iita hayi shuna mo, ando kape na ngu taka hala okutala eso moCassinga. Nando kapu na eso ewanawa, shoka sha ningwa mokamba yoCassinga mEtine lyomwedhi nguka omumvo 1978, kashi shi kwiidhidhimikilwa”. Oshihupe shomoCassinga Abel Hofni ta hokolola.

Oya li ongundu yaantu ye vule po 400 taa yi komadheulo komahala ga yooloka moCassinga oya lala mo lwotango. Ohaluka manga ye li pokapale komadhewo esiku lya ningi edhigu mondjokonona yekondjo lyaNamibia. Oondhila dhiita dhaSouth Africa odha andjakana kombada yokamba dha tameka okuumba omuku guuzigo, oomboma nokupiyaganeka oontauki mokamba. Hofni ngoka a adhika a dheulwa oomwedhi ndatu okwi igidha muule: “Laleni! Laleni!”

“Ukeni kuuzilo, komatrencha okoushilo” Ondu uvu ewi lya kommanda Dimo Hamaambo tali lombwele oontauki mokamba moka mwa tsimagana ontsi, omiti dhomingaalipi omileeleka otadhi teka, yamwe ya gwilwa kiitayi yamwe taa yahwa, iitandu yooholo tayi kina mokati kaakwashigwana, ngu ta kugu, ngu ta matuka mokati koomboma ta pononoka oombinzi, mba ya tsuwa noobayonete koombulu, oonakusa ya napakana mokamba nomudhingoloko, ontsi oya li ya tsima!”Hofni ta hokolola.

Ewi lya kommanda Hamaambo tali igidha natango: “Yukeni komulonga, komulonga, yukeni komatrencha mepya lyomapungu“ Hofni ta tsikile ko. Yamwe ya ka holama momapungu, yamwe ya hita komakwena goonyamanyama, oomwahe odhindji odha napakana momudhingoloko gwokamba, dhimwe dha sigulwa noombele dhokoondjembo, ontauki odhindji sho dha  thiki pomulonga kadhi shi okuyoga, otwe endelele okudhi tagulukitha omulonga omalweetho gaali”.Natango komanda Hamaambo okwi igidha aakwiita ya taambe oondjembo, mokuthika popepi nondunda yomwiidhi mwa li iilwitho , onduda ya tema omulilo nokufadhuka po.

Aakwiita sho ya ka galuka hoka ya li ya holama, oya adha aanamwenyo oyendji ya mona iiponga ya kwatwa po,nokulondekwa momaKasperi, noyendji  oya si molwekanitho lyombinzi, oyu umbilwa miihwa,nomidhimba dhimwe dha mangelwa komaKasperi. Mesiku lya landula sho aakwiita aaKuba ye ya, oya tameke okugongela omidhimba dha adhika dha halakana nokudhi tula melambo limwe. Ndhoka dha adhika dha napakana momudhingoloko gwokamba odha fumvikwa mpoka dha adhika.

Hofni ta tsikile ko ta ti, okuza mokamba yaCassinga oombulu odha yi koVietnam nokutsikila nokudhipaga aaNamibia, nooluhupe oyendji oya hepekwa mondjila, okuya koNamibia hoka ya ka thika mesiku lya  landula.

Ye pamwe nokangundu okashona kooluhupe konima yokufumvika omidhimba uule womasiku gatatu monkalo ya li ondhigu lela, oya lundulukile kehala lyi ili.

Ta gwedha po kutya, aaNamibia oyendji a aaakiintu, aanona naakulupe ye vule 4 000 taa tengenekwa ya li mokamba, ye thike 1 000 oya sila mo, oyendji ya lemanekwa, yamwe  ya kana yamwe ya lemanekwa. Hofni ta ti, aaNamibia naa simaneke esiku eti-4 Mai nota pula epangelo lyaNambia kutya, opwa pita oomvula 26 oshilongo sha manguluka nehala mpoka pwa lala aakondjelimanguluko moCassinga noVietnam inapa tulwa omandhindhiliko “Konima yoomvula 38, natango inatu dhimbweni kutya, emanguluko ndika tatu tyapuleni nena olya tikila ombinzi yaaNamibia oyendji yaa na ondjo, tu li kwateni nawa”.

LEAVE A REPLY

Please enter your comment!
Please enter your name here