Omahangano ovanailonga otaa dimbwa kutya okulile po shike

0
166

Okamuvalu kovanhu, oko ka ongalele mefiku lovanailonga kokapale kemanguluko mOshakati Osoondaxa otaka tukulula elipulo ngeenge efiku lovanailonga natango ola pumbiwa tuu ile pamwe emanepo ashike lefimbo. Nongeenge ola pumbiwa pamwe opena umwe ile vamwe itava longo oilonga yavo.

Ota shi kumwifa oku tala oshigongi shili mefiku laaveshe (public holiday) tashi popifwa kOmupresidende ndele ovanhu ovo va holoka ota va valulwa, ovo nokuli vahapu vomuvo vali ounona vofikola ve he shi kutya efiku lovanailonga oshike.

Heeno oshili epangelo olo omutwe nola tula po efiku lo May Day, ashike ovawiliki vomahangano ovanailonga ovo velile po ovanailonga ovo vena okufya oshisho kutya efiku ola longekidwa nola longifwa naanaa ngaashi sha teelelwa.

Monale omanga oshilongo inaashi manguluka, nopeedula dopetameko okudja pemanguluko ovanapolitika ova li va longifa efiku lovanailonga onga shimwe shomoilongifo oku tandaveleka ondjovo yopapolitika noku lwifa oukoloni. Ashike paife nee eshi oshilongo sha manguluka, osha fa ovawiliki vomahangano ovanailonga va nyengwa oku lunduluka noku pepala va endele pamwe nefimbo, vo vamone kutya ekondjelo lemanguluko eshi la xula omahangano ovanailonga otaa twikile noku dana onghandangala yafa peni moku yambula po onghalonawa yovanailongo yefiku nefiku.

Halika sha halika toka ovanailonga otava i momakangha peenhele da yooloka, ndele luhapu omunhu oho ka uda vali kutya ekangha kala li paveta. Nomolwa omakangha ehe li pavate ovanailonga vahapu ohave ke li hanga va kanifa oilonga mwolwaasho inava landula omilandu, voo vati ove nangoo ovakaleli po ovo vena oku kala veshi eeveta. Ovakalelipo ovo vena ngeno oku amena, okupopila nokuyukifa ovanailonga mondjila noku va yukifa kefindano monhele yoilonga, tashi ningwa fiku nefiku.

Oshinima shotete, oshosho kutya efiku lovanailonga hano efiku lo 1 Mai, ola pumbwa oku talika ko ongefiku lepito letanda omo ovanailonga tave ya kumwe noku tyapula osho va ninga mewiliko lomahangano ovanailonga momukokomoko dula-muvalu (financial year).

Sha hala kutya omahangano ovanailonga na eli tule mo mokuningila ovanhu vavo oyoongalele-ilonga, unene tuu ovawiliki ve lile po omahangano ovanailonga peenhele doilonga. Ovawiliki ava voo veli honge okuongela ovanailonga vakwao voo va kundafane omikundu davo moilonga nonghee vena oku di kandula po. Kakele komukundu, omahangano ovanailonga okwa pumbwa yoo oku longa ovanailonga nghene vena okula tava tale oilonga yavo nombili noku ihafela, ndele haku tala ashike komikundu.

Shimwe shoyeetifi yomakangha noku haudafana pokati kovanailonga novayandji voilonga oshosho kutya eengudu edi mbali ode li tala ko ongovatondi, molwaashi kapena naanaa eudeko lokuli talela monhalelo yayela ile yombili.

Hano oinima aishe ei oya pumbwa oku kala haipopiwa moyoongalele-ilonga yovanailonga, no May Day eshi tai ka fika, ovanhu voo ota va tyapula nee osho va ninga po momukokomoko wodula.

Oshitivali, na li longifwe onga efiku lokuulika ovaleli vomahangano moshilongo ashishe.

Ovaleli vamwe vomahangano ovanailonga, ova nailonga ka veva shi kutya ovo oolye kutya nee oko madina ashike. Vamwe oha va i ashike kovanailonga ngee va hala okuhoololwa ile ngee tava kongo oilyo.

Oinima ei oyo hai etifa opo u hange ovanailonga tava lundile ovakaleli po vavo kutya ohava futwa kovayandji voilonga. Oinima ei otai holoka shaashi ovakaleli po vovanailonga inava tunga ekwatafano lakola olo tali eta elineekelafano pokati kavo naavo va kalela po, shaashi ina ve li ikilila, kave li shi.

Ngeenge nee oshe uya pefiku lovanailonga, omahangano ovanailonga na e li tule mo mokuxwaxwameka ovanailonga opo va dule oku fika keenhele oko taku tyapulilwa vaka shakene novanailonga. Ina ku ningwa vali eshi efiku tali ningwa mongula konena opo taku popiwa kutya ovanailonga nava ye kefiku lavo. Efiku lovanailonga paife ola tali ka ko ashike onga efiku omo ovanhu hava kala momaumbo vehe na eshi tava ningi.

Ovawiliki vomahangano ovanailonga nava shikule meemhadi dovawiliki ovo va kala ko nale pefimbo loukoloni, eshi va li va unganeka ovanailonga nova kala ve shiwike nawa voo ovo vali tava longo pefimbo li djuu. Venya ova li tava longo shili veli kwatelela kopolitika ashike oshimhungu shokulonga novanailonga osha kula nokashina efiku nashipwe, naku talike ashike kutya oshike naana sha pumbwa oku taalelwa omutwe pefimbo apa.

 

LEAVE A REPLY

Please enter your comment!
Please enter your name here