TUYENI KOLUPALE LA TUYENI: Ndokotola a pange eepela dapuka

0
362

Namibia oshilongo shina eliko, novaningi voimaliwa pamikalo adishe otava monika tava mbombolokele kuNamibia opo va konge eliko

Moshilongo shetu otunamo eendokotola dadja pondje yoilongo, ashike,ava itashi ti eshi tava matuka okuuya okulongela kuNamibia ovena olukeno neemwenyo detu, ndele shapo okukufa eliko loshilongo shetu nokutwala koilongo yavo.
Nonatango otuna ovaNamibia ovapangi neendokotola nokuli vaka longela poilongo yopondje, shafaafana naana naava veya okulongela omu, ashike dimbulukwa ne kutya omunhu ngeenge otadi mo Namibia ndele taka longela ko Burundi, oshili eshi itashiti okuna olukeno novanamwenyo vaako, ashike shapo ohatuti ovaka yeleka eedjabi davo noilongo yopondje.

Opo ndi shininge shipu she tuude shihapu kombinga shinasha nouhaku moshilongo shetu, okwali ndaka talelapo meekulu Selima ya Hamutenya omupangi mukulukulu moshipangelo sha Katutura.
Ashike meekulu okuli moshipundi shefudepo oilonga molwaashi okwa pendjelwa hano mo 1993 moshilandopangelo tu omo.

Meekulu owalalepo ngo nawa ndishi? aiyee nande owa ti Mukwaudimbe aame Mukwaudimbe wa Hamutenya wani, ondalelepo nawa kaume, hano olye ou tomonika ngo una olupe loko Shikishi ya Ndalumbumo?
Ahowe meekulu ame nghishi nande  ndokoShikishi ya Ndalumbumo, ashike ame omutekulu wa Hilima ya Mutilifa ndadja pOkadila popepi nOnekwaya ya Haitembu opo, tatekulu nakudala meekulu oyo u kwali ehehole meumbo laye tamu tukanwa nongeenge owa tukanamo, oto ningi omafiku 4 inoolya ouvalelelo.
Meekulu ame ondeya okukutalelapo ame nda kala ngo ne ndaunda nale kutya vati ove owali omupangi mukulu moshipangelo moVenduka, hano oshili meekulu onakudiwa yeni yoilonga youpangi oyali naana ngahelipi oshili, lombwenge utale nawa?
Mutekulu wange she monale manga twali moupangi, okwa li hatukala tuna ombili komwenyo unene tuu hatu kala kwali tuna ohole novanaudu ava tava vele, nefimbo limwe nokuli okwali hatu mono ovanaudu vamwe vafa ashike hava veluka kombili yokomwenyo ngeenge yayi mumwe nomiti odo kwali hatu vape.
aai meekulu lombwelenge utale nawa, haiti, nanye efimbo kwali muli moupangi weni omo okwali hamukala tamulongo neengodi dopeke odo hakutiwa eecelula, ngaashi tuudite mefimbo lonena ovapangi vamwe veli moilonga tava longo ndele ohava kala vali velipyakidila neengodi davo dopeke, vamwe tava vende ovanhu nokuli manga elipyakidila nokofacebok nanye osho ngo mwali ngaha?
Aayeee mutekulu wange YA TUYENI, she mounyuni wetu noilonga youpangi owali muwa shili osheshi neengodi odo topopi opo dopeke mounyuni wetu kadalimo, onghee oilonga yetu okwali ashike okulipyakidila novanaudu nokuvapa ombili yokomwenyo.
Meekulu owauda ngo ovapangi ava mwafiya moilonga mefimbo lopaife eshi tavalongo, vati efiku lopeyi yovapangi ovanaudu vamwe ohava kala ashike meelaina omo manga ovahakuli vaka konga oushike pengeyo vavo noimaliwa keebaanga, oshili naashi omwakala hamushipewa koshikondo shouhaku ilo ava otava ningi eshi vahala peenhele depangelo mboli?
Meekulu manga inoo nyamukula epulo olo, nandikupule ngaha, natango omwakala mwa pewa oufemba wokuhakula ovakwanedimo leni tete una vaya koipangelo ponhele yovanaundu aveshe ava tavavele, nongeenge ihashi yandjelwa oufemba, oshili ava mbela ohaveshiningile shike?
Mutekulu wange YA TUYENI, oilongo ndishi yamona nee eputuko, noufemba womunhu moshilongo ouli ngo ne ku keshe umwe naau eeheshi eshi haulongifwa, oshili mumati wange oshidjuu okuyeleka oilonga youpangi wopaife nefimbo lonale, osheshi she shotete okwali hatulongo tuli koshi yepangelo olo kwali tali kolonyeke oshilongo onghee kakwali naana hatu ningi eshi kwali twa hala molwaashi noumbada opo wali pushe.
aai paife meekulu eshi topopi ngaho owafa ne wahala okutya oukoloni novakolonyeki  ava vali omu navaaluke opo tulilonge eeveta doilonga  she tukale tuna oumbada nokufimaneka oilonga molwaashi mutu paife ouwete ngo ne tuli mondiikwatela yetu.
Natu shune ngoo ne poshitwa shetu meekulu wange, natango otaku hokololwa ovapangi vamwe hava kala vati tava hanyaukile ovanaudu nokuvaula ngo omalaka amwe oidilikwatya, nonande tushishi ngo nale kutya ovanhu oveli mouvela novapumbwa exungo mwenyo, meekulu okuhanyaukila ovanaudu nasho omwakala hamushi deulilwa koshikondo shouhaku, pamwe ovanaudu opo tavaveluka diva, ilo napamwe ovapangi ava ohava ningi ashike eshi sheya keemwenyo davo?
Ahowe YA TUYENI, oinima imwe oyo tai ningwa paife kovapangi ovo twafiya moipangelo omo, oshili kaina nande ekwatafano noshikondo shouhaku, onghe omalihumbato ovapangi ava ngeenge osho tavatwikile ngo ngaha, oshili oshilongo oshina okumona oixuna, molwaashi omupangi oye omunhu wotete atalikako tadulu okufindilamo omwenyo womunhu una ta waanye okuyamo?
Vati omo ne veli moipangelo omo tava monifa ovafimba oixuna vati vamwe efimbo tavafetwa tava lombwelwa vakaende kondje yoipangelo nolwanima ounona vamwe oko tava dalelwa oko, vati ngeenge ounona ngo ava veedula dishona nokuli, otava lombwelwa nawa, vati omupangi umwe otaula okafuko kamwe taka mono okaana tati, toweelelenge tu, apa papitila efundja opo ngo tapapitile eeshi.
uuuhu!  haikakama ame ohaidekweta koitya yakula tailongifwa kunakutulamo eemwenyo. Mutekulu wange YA TUYENI, hamba owauda oinima yakula tai ningwa mounyuni omu taidulu nokufitika omatwi omunhu, naame oshili ondaudile naana ehokololo talipopiwa vati okaana kwali taka dalwa ndele taka pitililepo ndele vati oshaetifwa molwaashi ovapangi kwali velipyakidila nokulya eembe davo.
Meekulu owa pumbwa mboli okutalelapo oipangelo aishe moshilongo shetu u pwilikine ovanaudu eshi tava ningwa ne, ovapangi vamwe ava havadi komaumbo va handuka novaholike vavo, ohaveya vali okufululukila movanaudu ponhele omahandu vaafiye komaumbo.
pwilikina omupangi ta ula omunaudu tati, tate kala utale nawa ndiku vende ame ngeenge oto kulukuta ohandikweefa ndele handii, oshili naapa ngoo tai ye eshi adja keumbo ovanaudu vemukufako alonge ye a mone oshimaliwa nawa.
Haiti meekulu naikupule vali, hano ovapangi ava vopaife ava ngeenge opo tava tameke oilonga ongula ohava ningi ngo ehandaxa longula ngaashi kwali hatu shimono hamushiningi mefimbo lonale. YA TUYENI, she efimbo twali moupangi okwali hatulongo nomhepo youkiliste onghe alushe kwali hatuuya koilonga okwali hatu alikana tuli ponhele imwe nokonima opo tu ka tameke oilonga, ashike okwali twapewa omadeulo nghee tuna okukala novanaudu meemito da yooloka kutya ne okuudite ngaipi ilo okweya moshipangelo meendelelo amona nande oshiponga.
Meekulu oshili eshi shi li moshilongo omu aayee, openi wa mona omupangi eli poima ndele ota shangele vali ovanaudu eepela dapuka, oshili paife ngeenge omunaudu oo okwakanwa eepela odo ndele takafya ohatukatya okwaliwa kulye??
Ya TUYENI, mutekulu wange ounona ava natu va popye utale manga vehepo wa, oupangi ava ne vomefimbo leni ava wa, oshahala kutya inava hala oilonga shili ndele ovahala ashike oimaliwa vo vakale taveende nounyuni aushe nena va longele apa mongula tava ka longela vali apa, ashike tate Kalunga eli meulu ngeno nevape ngo omhepo yokulongela oshiwana..
Mmeekulu ame mwene odadalwa mo 1976, ashike ohandidimbuluka nawa efimbo kwali ndikaana kashona kwali handii koshipangelo manga nokuli moipangelo kwali hamumonika ovatilyane vahapu, oshili ondamona omupangi teya pombete tapula omunaudu tati, penduka unwe eepela medina latate Kalunga ouna okuveluka, oitya ili ngaha okwali hailongifwa unene kovapangi ovo vovaSoomi. Onghee oshili omunaudu nande kwali hakala eli mouvela ululila okwali hamono ombili yokomwenyo.

JOHN. YA TUYENI
MRTUYENI76@GMAILA
CEL

LEAVE A REPLY

Please enter your comment!
Please enter your name here