Aakalimo yomUukete ta ya nyenyetele mwene gomukunda

0
261

 

UUKETE – Oshigwana shomomukunda Uukete ina shi nyanyukilwa mwenegomukunda gwawo, tashi ti ota vundakanitha omukunda no ka ye wete iilonga mbyoka ta longo.

“Otwa kundana kutya mwene gOmukunda anuwa okwa tokola a landithe ehala ndyoka tali  adhika posheelo shondama yaAmaneke, mundjoka ha munu iimuna yaakwashigwana ayehe pomudhingoloko ngoka ngele omvula oya loka nawa. Pehala opo tuu mpaka opo pena ompomba yomeya goshigwana yedhina Amanenge nongele opwa langekwa otashi kala oshidhigu opo oshigwana shinwethe iimuna yasho sha manguluka,” aakwashigwana taya popi.

Aakwashigwana mboka ya li ya gongala moshigongi shoka sha  ningilwe omasiku ga ziko oya holola kutya kaya uvite ombili omolwa mwene gomukunda gwawo ngoka ta tsikile nokulangeka omahala gomaulithilo , shono ya ti oshi indikwa kelelo lyomuthigululwakalo, noshowo epangelo.

Otaku hokololwa kutya etseyitho ndika okwali eli ningi puundingosho pOlyaambwa, nokwali inaa yamukula omapulo ali apulwa kaakwashigwana netompelo kokutya anuwa ye ota langeke omukunda gwe, no ina pumbwa okulongwa oompango komukwashigwana.

Mwene gwomukunda Uukete Tomas Shituku ngoka ta popiwa moshinima shika okwali a ekelehi omapopyo gaakwashigwana, ta ti ndhoka taya popi odhowala elela , ta ti manga inaa langeka ehala lyontumba oha gongala nookapatashu ye yomukunda yo taya kundathana.

“Momukunda gwandje omuna aantu ya hala okunyateka edhina lyandje ashike ndhoka tadhi popiwa ka dhina uushili odhanakalindi owala, otandi indile aantu yomukunda gwandje tu kale tuna elongelokumwe, tse tatu pangelwa koshili ndjoka tayi ke tu mangulula,” Shituku ta ti ngaaka.

Pandu Shitapako ogumwe gwomaakwashigwana, mboka yagumwa koshinima shika. Okwa holola kutya ehala lyapopiwa, olili kuukwanyama wondama, nolili mosheelo shayo onkene itali vulu okulangekwa omuntu netompelo kutya iimuna mbyoka tiizi kOniiwe yaNdapanda itayi mono uupitilo,

“Opuna woo okantuntu okashona, po opo pena opomba yomeya goshigwana ngoka geyapo molwa okukondjitha kwandje, Kandishi kutya omolwa shike aaleli yetu yapuka no inaaya hala okulandula omilandu dhatulwapo. Omuntu uuna teetwa pehala elenga olina manga okupopya noshigwana noshowo ookomitiye opo ya gandje omaiyuvo gayo, ashike shika maaleli yetu kashimo. Otatu tindi ngeyi kutya itatu kapitika omahala goshigwana noshowo iipemba yikale yatulwa momani gomankolo. Omukalo nguka ohagu eta woo uutondwe pokati kaashiinda, nokwaanambili ota ku teya oshilongo,” Shitapako ta ti.

Shipatako okuna eindilo kaaleli opo ya yande iilonga mbyoka iiwinayi tayi nyateke omaithano gawo, yo ya langeke pomahala ngoka gu uthilwa okulangeka, ta pula ooyene yomikunda ya kale yena omakwatathano omawanawa naantu yawo yo tayi i kundu aluhe naantu manga inaaya langeka ehala lyontumba.

“Aantu natu longele kumwe opo tu kondjithe iinima mbyoka yetu palamena tse tu ete mbyoka tayi eta ehumo komeho moshitopolwa, ngaashi ooprojeka, okutunga uuklinika tu tsakaneke epangelo ondjilakati, oku indila tu pewe oosikola noshowo omambwinda gaagundjuka.Osigo uunake tatu kala ashike twa matukila okulanditha shoka itaashi tu etele sha? Otuna woo oyana yetu tweya vala momagumbo, ndele kapuna nande ogumwe taka mona ehala, oshoka inatu hala okukalekapo uushitwe noshowo iinima yininge yokomongula” Shipatako ta tsikileko ngaaka.

LEAVE A REPLY

Please enter your comment!
Please enter your name here