Elongo lopaungoba nali yambulwe po

0
218

Omanga tuli pefimbo opo Omupresidente a ingida ondungefaneko yoHarambee, nomanga oshilongo tashi tale kutya oshike tashi dulu okuningwa po, opo ku etwe efiko pamwe lopamaxupilo, elongo lopaungoba ola pumbwa oku talika nohokwe onga shimwe shomoinima yomeendelelo oyo ta i dulu oku kala osheendifo tashi endelele moku xwepopaleka omaliko oohandimwe noshilongo pauyadi.

Mongaha, omuvalu munene wovalongwanhu moNamibia owaavo va deulilwa oku kala ovanailonga, hano va deulwa oku kala va kutwa, ponhele yoku li longela voovene noku kuta vakwao voo va ete po eemhito doilonga.

Ashike elongo lopaungoba la kwatakanifwa kumwe nounangeshefa, olo ashike tali tu mangulula onga oshilongo sha hala oku kala shina eefabrika hano hatu dulu oku shita po oinima.

Monakudiwa ovanhu ovo hava fikola keefikola doungoba,ova kala va talika ko ongovanhu vena omitwe di kukutu. Nokuli ounona ovo va pita nawa moGrade 12 iha va ningile nowina va ningile ko omaindilo, molwaashi okwa tali ka ko kutya oVTC kaishi oshiputudilo shovanandunge. Vahapu have li hange koiputudilo oko osheshi ashike veudite kutya kave na nghee, nonando ohave ke li pandula monakwiiwa.

Ashike eshi ohashi ningwa nande oshiwana shi wete oyiimati oyo hai di koVTC. Vahapu ovo va longwa koVTC monena ove li ovayandji voilonga, ova eti po sha noveli yoo ovanhu ovo ve na eemiloyona meembaanga –oku yelekanifa navahapu ovo va pita mouniversiti.

Efano leefikola doungoba olo tali anye oku lunduluka momesho oshiwana sha Namibia, ota li ulike ashike kutya, omesho otuna ashike katu weteko. Omolwashike hatu twikile nokuyandja efano lii leeVTC ngeenge oiholelwa iwa omo ili moshiwana?

Ita ku tiwa elongo louniversiti kali wa ashike loVTC ina li talika ko lafa li li poshi ya likwao. Inaku talika ovo va longwa koiputudilo yopaungoba va fa veli pedu laavo veli ko universiti.

Ngeenge to dilaadila ngeno okaana keli mo Grade 10 taka lombwele nande omudali ile omuhongi wako kutya oka hala oku ka ninga omutungi efiku limwe, omukulunhu oo ota udu nai e wete okaana kaye ka kanifa ondjila. Na luhapu oto hange ovaleli tava kumaidile ashike ovanyasha oilonga oyo ta i longwa kwaavo va pita moniversiti. Ashike eearchitec, eenginia novatungi, aveshe oilonga yavo oya fimana, shifike pamwe, kape na imwe ya fimana i dule ikwao.

Kakele kwaasho, elongo loungoba moshilongo ola pumbwa yoo okunghonopalekwa. Hano ina tu kala ashike twa tala mokupangela eetuwa nokutunga noku fitulula ominino.

Oilongwa oyo i li po paife oya pumbwa oku wedelwa. Fiyo opapa katu na ofabulika yoku longa oiyata. Fiyo opapa iha tu longo nande omashina okuhondja fye vene moshilongo. Oku tula kumwe oiparte yoihauto hano tu shite po oihauto ka tu ku shi. Aishe oyo oshitukulwa shoilonga ta i dulu oku longwa moVTC. Otwa nyengwa oku i weda kelongo lopaungoba moshilongo opo tu nghonopaleke elongo olo.

Oiputudilo youngoba oyo tuna moshilongo nayo oya pumbwa oku indjipalekwa opo ku nghonopalekwe ovanyasha vahapu.

Shamha ashike ovanhu tava wedelwa po yoo noilongwa younangeshefa opo vaka ninge eengeshefa davo vene. Ngaha ita ku deulwa ashike ovatungi, ovafitululi vominino, ovahondji, ovalimimapya novapangeli, ndele otaku deulwa yoo ovanangeshefa ovo tava ka kala ovayandji voilonga novandulukipo voinima, ovo tava kala eengudi doshilongo.

 

LEAVE A REPLY

Please enter your comment!
Please enter your name here