Iilonga yo Groot Group ya yiwa moshipala komalenga

0
247

OKAHENGE– Osha simana kaaleli yopamuthigululwakalo ya tseye nokudhiginina ooveta dhopamuthigululwakalo noshowo ya wilike nawa. Kapena mwene gwomukunda a pitikwa a ninge etokolo miipambele yoshigwana oye awike, nonando aaleli yopamuthigululwakalo otaya  popile ehumokomeho moshigwana.

Edhimbulutho ndika olya gandjwa kElenga enene lyokEfululula, Mbwiti Haufiku ndyoka lya tumwa kEleng’enene Amon Shipanga, konima yokukundana kutya opena ehangano lyedhina Groot Group PTY LTD anuwa tali kutu aaniilonga moshana shopOkahenge moshikandjohogololo shaKatana moshitukulwa Oshana lyo lyaana epitikilo lyopambelewa yomuthigululwakalo moshitopolwa shoka.

Ekuto miilonga neshango lyaaniilonga ndika okuza Etitano lya yi olyeeta omaipulo ogendji kaakalimo nokooyene yomikunda nomalenga.

Esiku ndyoka ongundu onene yaagundjuka yamwe oya kutwa nale naamboka ya hala iilonga oya gongalele moshana shaKahenge moshikandjohogololo shaKatana moshitukulwa shaShana taya kongo iilonga. Ongundu yaagundjuka ye vule 1 000 ya za momikunda dhopomudhingoloko  oya li pepatululo lyaaha shiiwike nawa esiku ndyoka.

Ehangano lyoGroot Group anuwa olya hala okupatulula ofaabulika yokuthitha omawe, nenge evi ndyoka tali ka longithwa okunduluka omakende noshowo oshilongomwa sheloya[ceramic].

Eegululo ndika olya thiminike Elenga lyomikunda ndhoka Onesmus Kalipi li tokole ku ningwe oonkundathana na mwene gomukunda Okahenge, Jacob Shinyengu oshowo noshigwana momikunda Oshidhilaadhila, Omusheshe, Omahahi, Ohendjele, Uupumako noKaandje ya pewe uuyelele kombinga yiilonga yofabulika, ye ya paantu anuwa inaa yi tseyithilwa oshigwana, nande taku ti otayi gandja iilonga kaagundjuka noku eta ehumokomeho. Oshigwana oshindji osha gongalele paandja mwene gomukunda omusamane Shinyengu.

Nguka okwa hokololele oshigongi nkene yuuvathana naawiliki yoGroot Group PTY LTD ya pewe ohectala yimwe ya tunge po ombelewa okugongela omavi taga zi komahala ga yooloka, taga thithwa, taga yogwa nokutumwa kofabulika yokuninga omakende ndjoka ya thanekwa okutungwa poTses ondoolopa yili ookilometa omilongo hetatu muumbangalantu wo Kaiti moshitopolwa sha//Karas. Omawe ngoka otaga ka longwa iilongomwa ngaashi omakende  uuteelesa, nomapoto guundjugo. Iilongomwa mbika ota yi ka landithwa muka oshowo okutuminwa pondje yoshilongo.

Aanambelewa yoGroot Group ya li poshigongi, Isack Nangombe naNdapandula Shikongo oya lombwele oshigwana kutya, oye eta ehumokomeho kusho taa kutu aaniilonga yopomikunda mpoka ye li 350 no yuuvanekela mwene gwomukunda Shinyengu oshimaliwa shomiilikolwa yehangano komumvo.  Iimaliwa mbika oya fatulula kutya  otayi kala ha yi futilwa moshiketha shomapendulepo goshiwana tashi totwa kumwene gwomukunda ngoka mpoka tapa longele ehangano ndika.

Ehangano ndika olye ya naaniilonga 950 ya za kiitopolwa yi ili, nolyu uvakena okutunga ombelewa moshana moka , nokukutha omavi komahala ga yooloka. Aawiliki mbaka oya yelithile oshigwana kutya shika itashi eta uuwinayi washa konkalonawa yomudhingoloko noshigwana. Kakele kuuyelele wa gandjwa kumwene gwomukunda gwaKahenge omusamane Shinyengu, aakwashigwana pomikunda mpoka, elenga lyomikunda ndhoka, pamwe nelenga enene keziko lyaNamutayi Amon Shipanga, oyu uvite kutya etungo lyombelewa yofabulika yo Silica[omawe] moshana shaKahenge inali kundathanwa noshigwana naaleli yomithika dha yooloka.

Onkene otapa ka ningwa oshigongi nehangano lyoGroot Group mpoka ndika tali ka yelitha ondjokonona yalyo nomauthemba agehe ga pumbiwa okugandjwa kumwene gwoprojeka uuna ta longele pehala lyontumba, ombapila yetsokumwe uvathano lyawo kaaleli mboka taa ka tsakaneka kOnamutayi momasiku 16 Mai 2016.Elalakano enene lyoshigongi opo Elelo lyomuthigululwakalo li tseye iilonga yehangano ndika , yo mbika yi tseyithilwe wo Omukwaniilwa gwoshilongo moka mbaka taya longele.

Elelo lyopamuthigululwakalo olya tokola kutya ekuto miilonga na li  tsikile, kakele iilonga yokugongela omavi ina yi tameka manga sigo aaleli ya tsakanene nooyene yehangano ndika nokumona okondalaka yalyo. Elenga Haufiku olya ti uuthemba woshigwana shoka sha tula aaleli kiipundi owuna okusimanekwa.

LEAVE A REPLY

Please enter your comment!
Please enter your name here