Ondungethaneko yaHarambee yuuwanawa paliko ontompolwa ontine

0
299

 

Ekondjitho lyoluhepo nuulingilingi momahupilo oshinima shasimana. Osha popiwa noku endululwa poompito odhindji kutya okukondjitha oluhepo nokwaathikepamwe monkalamwenyo okuna okuningwa pamikalo dha yoolokathana.

Gumwe gwomomikalo ndhoka tadhi longo nawa, molugodhi nduka ogwo okuetapo uuyamba nenge eliko, naashika otashi ningwa mokukokeka omahupilo pamukalo gwaana ehulilo oshowo mokweetapo oompito dhiilonga yili nawa ano yina ondjambi tayi gwanene oompumbwe dhesiku kehe dhomuniilonga.

Sigo oompaka omahupilo ga Namibia oga kala taga ende nawa okuza kemanguluko. Kakele koomvula mbali moka ekoko lya li lya shonopala,  ndele olundji ekoko pamahupilo olya li nawa nopomimvo dhongashingeyi olya pitilile nookuli ekoko lyomahupilo giilongo yAfrika kohi yOmbuga yaSahara. Ekoko lyomahupilo olya nenepala wo sho iimpungu ayihe yomahupilo  moshilongo ya gwedhako kulyo. Eyokomeho pamahupilo ndika olya kankamekelwa komilandu omiwanawa oshowo ndhoka dhili nawa dhuuhupilo. Uumbangi kombinga yomilandu dhomahupilo omiwanawa owo mbuka kutya omuthika gwoongunga dhoshilongo oguli kohi yooperesenda 30 dhiilongomwa ayihe yomoshilongo [GDP] pamumvo gwembo lyiimaliwa 2014/2015  nonando pethimbo ndyoka omutengeneko ogwa li gwa gwedhelwa, sha landula uupyakadhi womahupilo mboka wa li wa taalela uuyuni.

Omuthika gwoongunga nguka oguli natango pevi shinene okuyeleka nomuthika gwopokati gwoongunga dhiilongo ya yooloka muuyuni. Oshilongo oshe shi pondola wo okuhila aapunguli yiimaliwa ya za kiilongo yilwe mboka ye ya okupungula moshikondo shoomina shaNamibia. Unene tuu sho onkalo yokupungula miikwamina moshilongo shetu ya talikako ongo oyo yotango ombwaanawa menenevi Afrika pashiyelekitho shedhina Fraser Mining Index momumvo 2014. Oshikwawo aaniimaliwa yomoshilongo nayo oya tsikila okuulika einekelo lyawo momahupilo goshilongo sho yo, wo ya tsikile nokupungula iimaliwa yawo muka miimpungu yuuhupilo , unene  tuu momaliko gopamatungo, moositola dhokulanditha oshowo momatungo goohotela nomahala gaayenda.

Shika osha ulikwa komwaalu gwomatungo, oohotela oshowo omandiki goongeshefa ngoka taga tungwa nenge ga egululilwa iilonga oshilongo ashihe. Okulonga kwomahupilo getu okwa pethitha oshilongo  eyalulo kolutu lwopaigwana  lwomahupilo niimaliwa lwedhina International Financial  Institutions  naashika osha fala sigo oompoka kutya oshilongo osha tulwa pomuthika guli nawa kehangano ndyoka hali tala omahupilo giilongo noku yi tula pomithika  hali ithanwa Fitch and Moody.

Nonando oshilongo osha adha oshindji pamahupilo otwa koneke kutya natango oshindji osha pumbwa okulongwa opo omahupilo ga lundululwe mombinga yiilonga  nomokutumina iilongomwa pondje , omanga uumwene  womahupilo  natango ouli miikaha  yomwaalu omushona gwaakalimo moshilongo. Onkene oshasimana, okutseya kutya uuna, ashike twa taambako elunduluko pamahupilo tatu vulu okukokeka omahupilo, okuetapo oompito dhiilonga noshowo okuhulithapo oluhepo .Onkene elunduluko pamahupilo oko ongudhi ya simana mondungethaneko ndjika ya Harambee yuuwanawa wopaliko.

Ihe iilongo otayi kumagidhwa opo uuna tayi etapo omalunduluko momahupilo yi kotoke opo yaa nkundipike  ombepo yuunangeshefa mokati kaakwashigwana moshilongo.

EITHIKAMENO PAMAHUPILO

Namibia oku shiwike kutya oye oshilongo shimwe muuyuni shina omahupilo gangungumana. Namibia okwa kala nomahupilo geli nawa okuza kemanguluko omumvo 1990 mekwathelo lyomilandu dhili nawa mokulongitha oshimaliwa. Shimwe shoka tashi yoolola Namibia kiilongo iikwawo osha kwatelamo ondjele yoongunga okuyitalela miilongomwa yoshilongo ndjoka yili pevi okuyeleka niilongo yilwe muuyuni.

Ishewe omwaalu omunene gwoongunga dha Namibia ogwa indilwa nenge ogwa hehelwa okuza komahangano gomoshilongo, noonzo ndhika otadhi yambidhidhwa koshikondo shoombaanga shopashinanena, komahangano gomapungulo oshowo komalutu omapunguli giimaliwa.Oshikwawo omutengenekothaneko gwiimaliwa mbyoka Namibia ha longitha okufutila omayakulo nayilwe ayihe, mbyoka oha yi gongelwa moonzo dhomeni lyoshilongo omanga ookuume ketu meyokomeho ohaya kwathele ashike mokugwedhako komutengenekwa gwehumithokomeho. Eshonopeko mekwathelo kookuume moopoloyeka dheyokomeho olyeetwa kokuyalulwa kwaNamibia ongoshilongo hashi mono iiyemo yondjele yili pombanda miilongo mbyoka yiiyemo yopokati meliko pandjele nomautho gOmbaanga Yuuyuni. Eyalulo ndika olya dhimbwa okutala keandjagano lyiiyemo miikaha yaaNamibia, ndyoka lyuulika kutya mbika oyili ashike momake gomwaalu omushona goshigwana sha Namibia.

Mokuyamukula komaupyakadhi gopamahupilo gomumvo 2009 Namibia okwa li  a tulapo ekwathelo lyopamutengenekwa mwaalu. Noshilanduli ooshika kutya  obudgeta oya kwatelemo enenepeko  lyiimaliwa ya longithwa pankalathano oshowo yokuhumitha komeho oshilongo, noshikwawo opwa tulwa wo omilandu dhilwe dhiifendela . Oshikwawo iihohela yoombaanga yoongunga oya kalekwa pevi. Nando iizemo yomilandu ndhika oya etapo shoka shali sha halika , kokutya enenepalo momahupilo oshowo oompito dhiilonga , shika osheendele pamwe nelando oshowo embesitelo lyiinima mbyoka oyindji ihaa yi longwa muka naashika osha hwameke oku etamo mbika okuza kiilongo  yopondje  naashika osha yeluthapo omuthika gwoongunga mekwatathano niilongomwa yomoshilongo [GDP] okuza pevi lyoopelesenda 15 omanga omutengenekwa mwaalu inaagu nenepekwa okuya koopelesenda 37 ndhoka odho dha thanekwa  pambo lyiimaliwa lyonuumvo.

Shagwedha kwaashika omwaalu gwiimaliwa yopaigwana mbyoka yi li moompungulilo dhaNamibia ogwa shuna pevi noonkondo sigo okonyala ashike piimaliwa yoomwedhi mbali okufutila iilandomwa okuza pondje yoshilongo.[Imports]

Okukalekapo engungumano pamahupilo oshowo eyalulo lyopaigwana, epangelo olya tameke okuopaleka omulandu gwopashimaliwa.Nonando oongunga dha Namibia odhili pevi okuyeleka noongunga dhiilongo mbyoka yili momuthika gwopaigwana gwo BBB oshowo kohi yomuthika goSADC goopelesenda 60, otuli muuyuni womakuyunguto mwa kwatelwa naangoka gonkalo yombepo naangaka otaga vulu okunwethamo  onkalo yoshilongo shetu ethimbo kehe. Oshikwawo inatu pumbwa  okwiiyetela omaupyakadhi tseyene, oshoka uuna omaupyakadhi goshili ngoka haga ziilile pondje ga holoka tse otashi vulika tu kale twaana iikuti ya gwana oku ga kondjitha ngaashi miiningwanima yomomumvo 2009. Onkene otwa ngungumaneke onkalo yopashimaliwa yetu opo tu tungepo einekelo oshowo okutulapo eshigongamba ndyoka tali kwatha omahupilo uuna pwa holoka omakuyunguto gomahupilo muuyuni ngaashi ngoka gomomumvo 2009.

Otwi itaala kutya  meshongo kehe omuna  oompito dhontumba. Onkene otatu ka longitha oompito ndhoka opo tu etepo omalunduluko noku opaleka omahupilo opo ga kale ga kola no ge li nawa. Mwaashika otatu lundulula omikalo dhetu dhokulongitha iimaliwa oshowo omikalo dhilwe dhoku imonena iiyemo, noku etapo omalunduluko momahupilo okuga koleka opo ngaka ga koke nomuthika gwopombanda.

Omalalakano gaHarambee niizemo mbyoka ya tegelelwa kombinga yeyokomeho lyomahupilo.

Iizemo mbyoka ya tegelelwa kombinga yomahupilo ga ngungumana  otayi kala. Oku kaleka omuthika gwoongunga pakuyeleka niilongomwa ayihe yomoshilongo poopelesenda 30[GDP] okuya pehulilo lyethimbo lyo Harambee.

Okukalekapo omwaalu gwiimaliwa yokulanda iipumbiwa okuza pondje yoshilongo yethimbo lyuule woomwedhi ndatu pethimbo lyoHarambee ta yi tulwa miilonga.

Okukalekapo oshowo okuopaleka omuthika gwopaigwana gokukala niimaliwa okugukaleka pomuthika gwo BBB mwaza.[-minus].

 

 

 

 

LEAVE A REPLY

Please enter your comment!
Please enter your name here