Ositola yiikwankondo yeegululwa mOmuthiya

0
291

 

OMUTHIYA – Omupevi Minista mUuministeli wOomina nIikwankondo, Kornelia Shilunga okwa egulula ositola yiikwankondo nomalusheno mOmuthiya, kuyele oshiwike shika.

Etulo miilonga lyositola ndjika tayi landitha iikwankondo oyindji hayi longo koonte dhetango, olili oshipambu shomathaneko ga tseyika nawa nedhina Off-Grid Energisation Master Plan (OGEMP) kokutya iilonga yokugandja olusheno komahala ngoka geli kokule noongodhi dhomalusheno.Omathaneko ngaka ogeli metonatelo nomekwatelo komeho lyUuministeli wIikwankondo.

Shilunga okwa ti ngaashi shi li pamilandu dhuuministeli kehe, oshi li oshinakugwanithwa shawo oku etapo omahumokomeho, nokundulukapo iinima mbyoka hayi vulu okulonga koonkondo dholusheno nenge dhilwe.

“Ondu uvite etumba okutseyitha kutya melongelokumwe noNamibia Energy Institute (NEI) oshowo Namibia University of Science and Technology (NUST), otaku ka kala taku gandjwa omauyelele kombinga yiikwankondo, oshoka aantu oyendji momidhingoloko dhetu ka ye shi omauwanawa ngoka ge li miikwankondo,” Shilunga ta ti.

Ta gwedhapo kutya Uuministeli owuna omathaneko ando opo muule woomvula 20 komeho ku kale kwa totwa nokwa patululwa oositola dhiikwankondo dhili 180 oshilongo ashihe. Ta ti pethimbo ndino miitopolwa ayihe 14 moshilongo oositola ndhika odha tulwa miilonga, nokwa gandjwa omauyelele kiitopolwa niitopolwa, nuusitola mboka wa tulwa miilonga Shilunga ota ti otawu shi enditha nawa lela.

“Oshilongo shetu oshina uuyamba wiikwankondo moonzo dhopaunshitwe, ihe nonande twa yambekwa ngeyi otuna woo omashongo ogendji unene miitopolwa yokuushayi melongitho lyiikwankondo, otwa pumbwa tu longele kumwe, tse tu etepo omahumokomeho momidhingoloko dhetu,” Shilunga ta tsikileko ngaaka.

Omukwateli komeho gwoNATO Investment mboka oyo yi inekelewa oshinakugwanithwa shositola ndjika yiikwankondo, Victoria Iipumbu ota ti ota pandula unene epangelo lyaNamibia sho tali kambadhala oku eta omakwatho oshowo omahumithokomeho popepi noshigwana.

Ipumbu ta ti otaya kambadhala ya longele kumwe naakwashigwana oshoka oyo ayeke, yaana ekwathelo lyaakwashigwana itaye shi pondola nuupu. Ta ti otaya kala taya landitha kehe shoka sha pamba iikwankondo oshowo okugandja uuyelele moshigwana.

Iipumbu ta ti NATO okwi ilongekidha okugandja omauyelele, nota kwashilipaleke kutya aaniilonga ota ya ka gandja eyakulo ewanawa kaayakulwa yawo. Okwa pula aakwashigwana ya lopote mbala ngele taya pewa eyakulo lya ngonzonoka, ta ti aaniilonga oyi ilongekidha kehe ethimbo oku etapo omalunduluko.

Mositola muno otamu adhika ngaashi oopanela dholusheno lwoketango, omasiga ngoka haga longo koonte dhetango oshowo oolamba, uubiena nakehe shoka hashi longo koonte dhetango, omauyelele ogendji kiikwankondo omo taga adhika onkee aakwashigwana otaya pulwa opo ya kale ya talelapo ositola ndjika.

Energy-shop

 

LEAVE A REPLY

Please enter your comment!
Please enter your name here