TUYENI KOLUPALE LA TUYENI: Nekongo oye atokola ondjeva yange, ine shidimbwa nande

0
473

Omutekulu wa Mukwahepo wa Shekudja a mitikwapo, molwaashi meekulu ine mu lombwela nawa kutya ngeenge taku popiwa ondjeva ya tokoka ovanhu ovahala naana okutya ngaipi.

Kaleinasho okwali ashike a tonatela oshilanda shaye eshi shili moshiya opo shi ha tokolwe kovamati molwaashi okwali eshi osho tashi tongwa.

Oshali omudo 1960 manga ashike etango opo ladi eemwengu, eshi   Nekongo la Ndeunyema kwali talifa popepi nokaumbo kaMukwahepo wa Shekudja omo hamudi Kaleinasho ya Kamudulunge.
Omwilwa oo Nekongo a li ta shiki manga talifa owaetela Kaleinasho a kale ta talele momiti nonande naye okwali ena oshinakuwanifa shaye shokuxutula, oilya oyo nghee ngo a tenekele poshini omwenyo waye owa pwaalala.

Ashike ye okwali ena oumbada wokuya mepya ku Nekongo ye eke mu kalele eshi talifa molwaashi okwa kala akoneka eshi a lombwelwa kuinakulu Mukwahepo kutya, na takamife povamati ihapeehenwa ohavatokolamo eendjeva dovanhu, ndele toningi ehengu.

Omwilwa wa Nekongo owa kala tau pula komesho osho shaetela Kaleinasho opo a fiye oilya poshini aye mepya omo muna omumati talifa aka tale naana kutya oshike ta longifa okudja mokanya kae eshi tamudi ewi talilinyenge nawa ngaha.  Ashike Kaleinasho kakwali naana ahala okweehena pu Nekongo pwoovene molwaashi okwa koneka eshi a lombwelwa kuinakulu eshi ovamati vanyika oshiponga pokutokolamo eendjeva dovanhu moshiya.
Okwa hovela taende kashona nakashona auka kuNekongo ye elikwete moshiya ekwetelemo ondjeva yaye, oshili okuhashiivasha nako oshiponga.

Nekongo okwa tameka ta lombwele Kaleinasho eendaka doihole manga kwali tatale pedu ye ta yolomo, ashike ye mokuuda omumati temu lombwele kutya okwe mu hala,okwanyamukula tati, naame ondikuhole.
Ashike ondatila molwaashi Meekulu okwa lombwela kutya inandi efa  nande ondjeva yange itokolwe kovamati omanga inaandi fukala ondina ne oumbada kutya pamwe ngeenge ondeku itavele oto ka kwatange ndele ondjeva tai tokoka.

Kaleinasho ondjeva ei tapopi oshilanda ashike osho hashi djalwa koukadona ovo inavafukala ashike meekulu waye paku mu lombwela kutya ina hetekela nande a tokolife ondjeva yaye manga inaa fukala, okwa diladila kutya inaya nande momilele novamati manga inaafukala osheshi otadulu okuninga edimo nokonima taningi ne ehengu.

Taa!  omukulupe oshili ina fatululila nawa okatekulu kaye, pwilikina ne Kaleinasho oinima eitileele omeva nde oudano taudi pondje. Nekongo mokuunda eshi a lombwelwa kuKaleinasho, okwa yamo tapopi nokaheka kovalumenhu tati, ame Kaleinasho ondikuhole no ngeenge owa itavelenge ita ndi ka tokola ondjeva yoye oshili.

Kaleinasho tapula Nekongo tati, mbela ngeenge onde ku itavele otuna naana okusheenda ngaipi molwaashi meekulu omukedi nai, nongeenge okwe ku mono otashishiva ekutee nande ekipa lombuda noikulumbwati.
Nekongo okwa lombwela kakadona ta ti, ito dulu nande okulombwela meekulu woye to ti oto katwa oshinangeka ku Mbwaduli wambuletu?

Kaleinasho okwa yamo tati, pokatoo koinangeka meekulu okweendapo nale kandiwete teshihale ndiuye ndinangale keumbo leni. Ashike ino tila paife onda dimbuluka oshinima shimwe sho osho ndiwete kutya otashipiti, meekulululwa wange ou adala meekulu vati okwaya koshipangelo onghela nde vati otautalwa pofingo ondiwete kutya mutu okuna okuxulifa ashike ye meekulu aye keenghali opo tu shikwate nawa.

Mmm oixuna younona vahala okulya oinyenye mboli haidule ngo shili eenghali, opa pita ashike omafiku eli avali ye omukulupe womutoko ou ta tongwa kuKaleinasho okwaxulifa ngo nee shili, mbela vemuxunapo ngo ne nohonda yaye. Aai!! Nekongo  a telekelwa ne nghee ngo a udu eenghali domukulupe molwaashi okwa hangika talifa, otanuka ngo ne eli konima yoshixwa shimwe tati, omukulupe wokulifange ngo nawa mboli nena ou.

Taa!! oshili okaana katyopokela taka hambelele eenghali dainakulu wamukwao, omo ngo utya kakadona oye mwene eetapo omangela yeenghali dainakulu, omalai kaanave oo mboli opo ngo taekelitonda.

pwilikina ne Kaleinasho a tendelwe eenghete ku Nekongo manga talombwele ovanhu oilanda yomoshiya shaye inai tokolwa mbela okushi oyo taitongwa kuinakulu, vati ekadona ne liishi eendunge noineya molwaashi olamona outeku wainakulu, mboli inalipwiikina  eshi tashitongwa.

Omanga ngo omulongo woufiku inau denga, molwaashi Nekongo okwali amona etango tali anye okutoka sho osho kwali oshikando shaye oshitivali taka mona odula tailoko kuhena oilemo, onghe oshali ehafo kashona kuye, Nekongo okwa endeleko auka kokaumbo kainakulu ya Kaleinasho.Oo mokuuda eembwa tadi weda omwenyo waye owa tameka taudi omaxwilili noku dimbulukwa kutya eli mutu tali wedwa ehewa laye lopoihole, molwaashi kakadona okwakoneka eembwa dambulavo kutya nado odihau dafa inakulu, okwadimbulula kutya Nekongo otashishiva atuwe oshiti ku Shekunangela ombwa imwe yefona ihaili omate nande.
Kaleinasho okwadjamo moduda opo aye mepya ye aka shakeneke Nekongo waye, pwilikina ne Kaleinasho a tameke okudimauka eliwete ne vati omunandunge hawanifapo eemango dainakulu, waye.

okwatameka ta lombwele Nekongo tati, ohatui naave meumbo omo, ndele hatui monduda yange yokunangala, ashike ohandikupe epitiko uka kwatenge keshe apa wa hala, ashike kwafenge kwafenge mumati wange ngeenge to kwatange hetekela uhakwate koshilanda shange eshi shili moshiya omu ondjeva yange hano, molwaashi otaidulu okutokoka ndele pamwe handi ningi ehengu.
Aaai!!  Nekongo ota yolele ngo ne ketayoo molwaashi okuwete kutya okuli nashikofela waye, ovanhu osho vai vakanangale ashike oiyolifa noinenenima oyali ne apa kutya, Kaleinasho kakakwali atonatela oshinyenye shaye shihaliwe ku Nekongo ngaashi oukadona aveshe hava kala vena oumbada okuya momilele novamati, aayee Kaleinasho okwali ashike ekwetelemo ondjeva yaye moshiya eudite kutya pamwe Nekongo otaka tanauka nande epuko ndele taitokoka.

Keengula kwinya Kaleinasho ota pendula Nekongo  ta ti penduka ndiku findikile mepya omolwa Shekunangela iha li omate , manga vauka mepya Kaleinasho ota lombwele Nekongo tati, ta!   Ondeku pandula wa okwali ndishi ototokola ondjeva yange, ye telitale ne moshiya shaye nawa.

Aayee okamati kokoo Ndeunyema otaka yolele ngo ne ketayoo molwaashi eshi kwali ahala ye osho eendela okweshimona pehena oumbada washa hano shahala okutya Kaleinasho ponhele akelele  vaahaye momilele ye okwali elipyakidila nokukwatelamo oshilanda shaye , ashike Nekongo ota tatula ngo nee oikola ewete a telekelwa kekadona.

Konima yomafiku  ane, meekulu Mukwahepo keenghali okwakadjako ne paife oshaningila ne vali Nekongo shidjuu opo vashakene na Kaleinasho, okwe ke mu hanga ne ta tyava popepi nongumbu yavo ye Nekongo ota tameke tapula Kaleinasho tati, haiti wa hano kapena ngo vali omukulupe umwe akulupa napamwe tai nande okoshipangelo she tumone omito?
Mboli manga ashike taveli pula ngaho, efiku ngo lotete Kaleinasho vaya moikumbafa, olo ngo fiku a tokolelwa ondjeva yaye shahala okutya hano apewa oufimba ku Nekongo nonande vo aveshe kakwali veshishi.

Opapita omwedi umwe, ye Kaleinasho okwa tameka ta kungu ngeenge tavali nainakulu, meekulu tapula okatekulu kaye kaanave hano oumufimba?

Ye ota nyamukula heeno mutu meekulu ondimufimba molwaashi okwali ndamonapo omumati umwe ngo shili meekulu, ashike ondakala ndemu tonatela eshi twaya naye opo aha kwatenge kondjeva yange molwaashi napamwe otaitokoka, ame ndi ninge ehengu ashike oshili meekulu oikulombwele omumati oo ondemupa oinima aishe ashike kondjeva oku inakwatako nande.
Mukwahepo inamanapo efimbo okwaufana omushamane umwe wopomukunda wavo mEngela ya Haihambo oo ashivika nawa mokutwala oukadona ovo vaninga omahengu komaumbo oku vamitikwa, mEngela tapitula Kaleinasho vaye taende ne takwena a handuka vati molwaashi otaulwa ehengu noku tokolelwa ondjeva nonande ye asho eshi uditeko ngaho.
Eshi vafika peumbo okwa popifa meumbo tati, mwalelepo omu? ovanhu tavaitavele, ee otwalelepo wani, ye otaimo vali tati vakwetu otuvaenda endeleleni muuye mutu kunde osheshi otweya twa ningwa ashike omo ngo twaningwa nai meumbo omu, ashike ame inainingwa mukwetu ou tuli naye oye  ndaeta oye ngo aningwa meumbo omu.
Hano osho ngaho ekadona lameekulu Mukwahepo lamitikwapo mokuu hashiivasha omanga kwali taleende talipopi nopuvakwao taliti, ame, nghina fiku nditokolelwe ondjeva yange komumati nande ndafa handidulamo ndele handiteneke penya.

Ovadali ngeenge tamu kundafana nounona voukadona, shotete inamukala hamufutike oinima nye inamukala hamufiyeko
oinima imwe osheshi oshanyika oshiponga paife oyo hamufiyeko otamu ke valombwela naini, Mukwahepo ngeno okwa lombwelele okakadona kaye oshili tati takamisha ovalumenhu momilele, ngeno Kaleinaso ina mitikwapo.

JOHN YA TUYENI
MRTUYENI76@GMAILA
CELL 0812988549

LEAVE A REPLY

Please enter your comment!
Please enter your name here