Yi itsu oplastika yuumbindja woRDP

0
425

 

OMUTHIYA – Yamwe yomaakalimo yomoondoolopa yaMuthiya oyali yi itsu oshako yuumbindja woRDP wa ekelwa hi petoto lyiiyagaya mondoolopa oyo tuu ndjoka.  Uumbindja mboka pamiyalu otaku hokololwa kutya wuli omilongo mbali nomugoyi.

Yamwe mboka ya toola oplastika ndjoka onduudhe oya hokolola kutya oyali ya limbililwa omolwa oplastika ndjoka onduudhe ya mangwa. “Molwaashoka sho ndamono ndjika ondali ongame awike onda li ndi ithana yamwe mboka ya adhika taya ende petoto opo ya talithe ndje,” ta hokolola ngaaka.

Aakwashigwana mbaka ya tindi oku tumbulwa omadhina gawo taya popi kutya oyali ya tokola, opo ya mangulule oplastika ndjoka yo ya tale shoka shi limo opo ya ze omalimbililo ngoka ya kala yena.

“ Nonkumwe sho twa talamo otwi itsu owala muumbindja wongundu yoRDP uupe no tawu ulike kutya inawu zalwa nando osha, mukwetu gumwe ngoka twa li naye okwali ati natu wu thige owala mpoka, ashike omolwa ngaa uuyuni uuwinayi otwa li twa tokola opo tu wu fale koombelewa dhongundu yoSWAPO ashike mondjila yetu otwa li twi ipula kutya pamwe otashi ka gandja ethano ewinayi moshigwana,” ta ya popi ngaaka.

Ta ya hokolola kutya shino oyali ando yeshi ningi omolwoveta noompango ndhoka dha tulwapo koECN dhoku gamenenapo omaliko goongundu, no ka yali anuwa ye wete tashi kala ondjo ngele oye wu thigi peha mpoka yewu adha.

“ Otwa li twa pula omadhiladhilo ku yamwe yomaakwashigwana no yetu lombwele opo tu fale oplastika ndjoka kopolisi, ethaneko olyali ewanawa shili notwa landula shoka twa lombwelwa, sho twa yi kopolisi otwa li twa gandja uumbindja mboka yo ya tale ngele  taya mono ngoka te wu ilepo,” aakwashigwana taya gwedhapo ngaaka.

Omukuluntu gosasiona yopolisi pOmuthiya Johannes Siwaya okwali a koleke kutya poombelewa dhawo mOmaandaha opwali pweetwa oplastika yi na uumbindja wongundu yoRDP naasho ya ningi omapekapeko, gumwe ngoka ali okandidate yongundu yoRDP mOmuthiya okwali ati anuwa otewu ilepo ye atale kutya ote wu fala peni oshoka omaliko gongundu ndjoka.

 

LEAVE A REPLY

Please enter your comment!
Please enter your name here