Aashikondailwa onkene ta ya lili enota

0
264

KuMaria Namupala

OSHIKONDAILWA – Aakalimo yomomukunda Oshikondailwa oshowo omikunda dhopuushiinda natango onkene yeli mompumbwe yomeya ondhigu. Aakwashigwana ndhika oya li ye dhi tseyitha oshiwike sha piti sho ya mono ompumbwe yomeya tayi ya hepeke , yo itaaya mono anuwa omayamukulo taga mbilipaleke.

Oyendji ohaya ende oondjila oonde no haya meneka omausiku opo ya yande omikweyo omile puupomba womeya. Oya hokolola kutya omikweyo ohadhi kala omile unene naantu ohaya teke okuza potundi ontihetatu ongulonene sigo omutenya lela ngele inapu udha unene. Omikunda ndhoka dhina ompumbwe onene yomeya ongaashi Oshikondailwa, Oshaataha, Onanyege, Okoloti na dhilwe woo.  Paulus Andreas gumwe gomaakwashigwana mboka ya eta olukeno no ta hokolola kutya konyala omikunda adhihe hoka odhili mompumbwe yomeya ondhigu no taya hupu shokadhila oshoka omahumokomeho koombinga dhawo inaga thikako.

“Ohatu ende oondjila oonde opo tu ka konge omeya gokunwa oshowo giimuna yetu, ngaashi ngame ohandi zi kOshaataha no handi ende ookilometa 20 lwaampo, molwaasho itandi vulu okuhumbata ondini komutse omolwa oshinano ohandi longitha uundoongi mbono kamwe haka humbata oondini 4,” Andreas tati.

Aakwashigwana yaza komikunda dha yooloka moshikandjohogololo Eengodi oya li yi itsuwa pu kamwe komuupomba hono keli komukunda Otatashe, noya hokolola kutya ohaya ende oondjila oonde no itaya vulu okuya ko kolupadhi ya konge omeya. “Olundji nopendji ohatu longitha oondoongi nenge ngele twa mona esilohenda kwe enda oohauto tatu futu aantu mboka opo ye ke tu talele omeya, nonande pomidhingoloko dhetu puna oomboola yimwe owala yina omeya omalulu dho dhimwe ihadhi longo nande nande otatu hupu nuudhigu notwa hala tu popilwe, kansela gwetu ihatu mu mono nonande  twe mu hogolola no twali twe mu inekela etu kwatele komeho ye a kandulepo dhimwe dhomoompumbwe dhaakwashigwana ndhoka yena,” Yamwe taya popi ngaaka.

Komukunda Ofilu hoka anuwa kuna uupomba natango omeya ihaga ende nkene wa tulilwepo konima yoomvula ntano lwaampo, nopomahala mpono puna uupomba omeya ohaga pata olundji oshoka niimuna yawo omo ta yi nu moopomba. “Otatu mono iihuna oshowo iimuna yetu olundji ohatu lala owala nongala molwaashoka thimbo limwe ohapu piti ethimbo ele inaaku enda oohauto, nomomagumbo ohatu kala twaana omeya, twa tala owala pombanda, otwa pumbwa tu popilwe moshinima shika oshoka omeya ogo omwenyo,” Taya popi ndhoka. Kansela gwoshikandjohogololo Eengodi, Valde Sheyavali okwa ti oshinima shenota omukundu omunene moshikandjohgololo she oshowo shoka shopuushiinda Nehale lya Mpingana, ta ti otaya kambadhala ya tale shoka taya vulu okuningapo, yo aakwashigwana kaaya endewe oondjila oonde taya kongo omeya.

 

LEAVE A REPLY

Please enter your comment!
Please enter your name here