Iimuna tayi napa moAngola ina yi zamo we manga

0
308

 

Komutoolinkundana

OHANGWENA –Omolwa omukithi gwekondo nelaka ngoka gwa tukuka moshitukulwa moBondo Caira sha Cuando Cubango moAngola, epangelo olya tseyitha kutya iimuna mbyoka yili ta yi napa moAngola ina yi za mo we manga.

Onkatu ndjika yomeendelelo oya tseyithwa komundokotola gwiimuna koshitukulwa shokoNooli, Kennedy Shoombe.

Shoomba ta okwa ti, onga onkambadhala okukelela opo omukithwa gwaataandele moNamibia, epangelo, okupitila mOshikondo shuundjolowele wiimuna, olya tameka netuntilo lyiimuna moshikandjohongolo shaKongo noshaKankolo mOhangwena nomOshikoto oku za petameko lya May.

Osha nika oshiponga kiimuna inayi tuntilwa ndjoka tayi zi ko Angola, oku napa mumwe niimuna yaaNamibia. Onkene Shoombe okwa yelitha kutya, etuntilo olya tamekwa meendelelo okukelela omukithi nguka kombinga hoka ku na iimuna hayi napa mumwe naambyoka inai tuntilwa.

Omundohotola Shoombe ota ti, aaNamibia kiitopolwa yokoNooli otaya kunkililwa ya fale iimuna kowenda yiimuna miitopolwa ayihe yokoNooli.

“Okuza Okavango East nOkavango West otaya tuntile oshikando oshitiyali, noospana dhaaniilonga yokutuntila dhili 16 odhi ipyakidhila moshitukulwa Ohangwena omanga moshitukulwa shaShikoto mu na oongundu hamano dhoka dha tegelelwa tadi ka mana olweetho lwotango moshiwike oshitiyali shaJune miitopolwa ayihe koNooli,” Shoombe ta ti.

Ndohotola Shoombe ta tsikile ko kutya, oshitukulwa shuundjolowele wiimuna oshi ilongekidha kutuntila oongombe dhi vule pomiliyuna yimwe okuza kiitopolwa iyali yaKavango sigo okoKunene, nepangelo otali ka tseya shoka lya longitha kutya oshi thike peni konima yiilonga ayihe. Shoombe ta yelitha kutya, iitopolwa Oshana, Omusati nOkunene otayi ka landula ko.

“Ashike nonatango ota ndi endulula nokukunkililo aanalaafalama kutya, iimuna mbi yi li moAngola paife, inayi za mo,” Shoombe ta ti

Ota ti omukithi nguka ogu li ashike moshitukulwa shaCuando Cubango moAngola, ashike kombinga yokouningino wOndjiva kagu ko. Aakali kiitopolwa yokuuzilo naa iyuthe komalombwelo okukelela omukithhi gwekondo nelaka. Ta gwedha po kutya, mboka taa hingi iimuna okuza komahala ga yooloka naa ka tale oombaila dhepitikilo koombelewa dhuundjolowele wiimuna miitopolwa. Ta yelithile oshigwana kutya inashi pumbwa okutila, ashike nashi iyuthe koveta yomalweendo giimuna.

LEAVE A REPLY

Please enter your comment!
Please enter your name here