Ombelewa yoshikandjohogololo Oniipa ya tewa ku walye

0
291

Ku Maria Namupala

ONIIPA – Kansela gwoshikandjohogololo Oniipa Jerry Ngwena ota pula oshigwana opo shi longele kumwe nopolisi moku kwatitha mboka ya teya nokuya mombelewa yoshikandjohogololo ye. Oshiningwanima shika oshali anuwa sha ningwa uusiku wEtine lwopo 24h00 lwaampo. Nonande pombelewa mpono pwa li omugameni gomaliko ethimbo ndyoka aafekelwa oya li ya tete ondhalate kombinga yokuuzilo noya piti eta yeya meni.

Otaku hokololwa kutya ngoka a adhika eli miilonga ethimbo ndyoka okwali a uvu omainyengo nokwa kambadhala aye pondje ye a ka konge ekwatho molwashoka anuwa ka li ena ongodhi ethimbo ndyoka. Okwali a mono ohauto ya thikama pondje yolugumbo nokwa kambadhala oko a ka konge ekwatho a dhengele kombelewa yawo nopolisi ngaashi haya ningwa mehangano yawo moka. Nani anuwa pohauto mpoka a ka konga ekwatho oyoongangala, yo yamwe oyeli nale meni taya teya.

Kansela Ngwena tati oshinima shino oshiwinayi noonkondo no taya fekele kutya mboka taya longo iimbuluma mbika oyomoudhingoloko owala noya kala owala taya tala mpoka puna ngoka ali ta tonatelepo ethimbo ndyoka, noya dhini ngiika oshoka omukiintu. “Oongangala ndhika odhali dha tete ekende tadhi piti nokuya meni, odhayi mombelewa yomunambelewa omukuluntu moshikandjohogololo mono tashi ulike kutya oyali ya tameke taya hadha noyi itsu miipayululo yili mu kamwe komuusikopa mono mwali iipatululo yoombelewa dhilwe, oya hadha noku kuthamo oocomputa dhili mbali niilongitho yawo, oya kuthamo woo uundini woothewa nooplastika dhiiyagaya ndhiya oonduudhe tashi ulike kutya odho ya longitha oku humatamo iinima mbyoka,” Ngwena tati.

Nonande ya ka pondola oku nothelako opolisi shoka tashi inyenge, sho yaka thika oya adha oongangala ndhoka dhaya nale. Oyali ya kambadhala ya tale ngele ta ya mono oompadhi nenge omatayela gohauto mpoka gu uka ashike ayihe anuwa oya hulile komakwena ga thita, ashike kansela otati oye liwe mokashoka kopolisi. Opolisi pamwe na kansela otaya pula moshigwana ngele opuna ngoka a mona aafekelwa nenge omuntu ta landitha iinima mbyoka a kale a tseyithila ombelewa ya kansela mbala nenge opolisi meendelelo ngaashi tashi vulika opo ku kwatwe aantu mboka taya teya po oshigwana.

LEAVE A REPLY

Please enter your comment!
Please enter your name here