Oshikonga shopombela mOshikoto omolwomukithi gwaMalaria

0
226

KuMaria Namupala

 

OMUTHIYA – Omunambelewa omukuluntu gUundjolowele moshitopolwa shaShikoto, Peter Angala okwa li a tseyitha kuyele oshiwike shika kutya , mombelewa ye omweya olopota sho moshitopolwa shawo mwa ndhindhilikwa omukithi gwoMalaria tagu ende tagu indjipala unene. Ombelewa yuuministeli wUundjolowele oya li ya tokola oshiwike shika opo ku ningwe oshikonga shomeendelelo shokupombela momagumbo moka mwazi aavu mboka ya kwatwa komalaria.

Oshikonga shika osha kwatelamo aapombeli mboka taya pombele momagumbo oshowo aapangi mboka ta ya ende ta ya gandja uuyelele kombinga yomukithi gwoMalaria, noku konakona momagumbo moka mwazi aavu mboka ya kwatwa. Angala ta ti nonande omukithi nguno gwa konekiwa okuza petameko lyomvula ogwa kala ngaa omuhwepo, ashike omasiku ngano ogwe ende tagu indjipala unene moshitopolwa. “Iikandjohogololo mbyoka ya konekiwa yina omwaalu gwaantu ya kwatwa koMalaria ongaashi Onayena, Okankolo, Eengodi, Nehale lyaMpingana, Oniipa, oku tumbulapo owala yilwe, ashike ogwi indjipala noonkondo,” Angala tati.

Okwa gwedhapo kutya iikonga mbino oya tamekele Omaandaha goshiwike shika sho aapangi ya andjakanekwa kiikandjohogololo hoka kwa konekiwa kuna aantu ya kwatwa koMalaria no ta ya tsikile okugandja uuyelele mboka , noku pombela momagumbo, Angala indile nesimaneko enene opo aakwashigwana ya gandje elongelokumwe kaapombeli oshowo kaapangi, ko ku kondjithwe omukithi nguka gu shunithwe pevi.

Ta tsikileko ta ti oyali ya ningi iikonga mbika petameko lyomvula sho omukithi nguka natango sho gwali gwa konekiwa, ta ti sigo oompano  opwa lopotwa aantu yane (4) yasa mOshikoto okutameka Januali sigo ongaashingeyi komukithi ogo tuu ngoka, Yo aavu yamwe ohaya pangwa ngaa eta ya aluka, oya li ta ya lalakanene ando opo kwaa kale omuntu a hulitha koMalaria. Angala ta ti oosipana dhaapangi mboka taya gandja uuyelele naapombeli otadhi adhika pomahala gamwe ngaashi Elombe, Elavi, Ohahati na galwe woo, po opo haya meneka pomahala ngoka ta ya yi komagumbo nokomikunda hoka kuna aavu mboka.

“Otwa mona kutya iikonga mbika shampa ya ningwa oha yi eta omalunduluko unene, sho osho to mono kutya omukithi ohagu mwenapo e tagu tameke ishewe , ko ngele kwa konekiwa pehala lyontumba puna omukithi nguno ohaku yiwa mbala ko taku ningilwa omakonakono, okwa thaanekwa iikonga mbika yi ka hule mu gatatu (3) Juni omvula ndjika,” Angala ta gwedhapo ngaaka.

Ta ti aaniilonga yUundjolowele moshitopolwa oyi ipyakidhila ethimbo kehe okugandja omayakulo ngoka oshigwana sha pumbwa. Ta pula kutya ngele owa koneke omuntu itaa kothapo nawa nenge tau like omandhindhiliko goMalaria na thikithwe koshipangelo shili popepi mbala ye a mone eyakulo.

LEAVE A REPLY

Please enter your comment!
Please enter your name here