TUYENI KOLUPALE LA TUYENI

0
312

Ongudi yokaanda kopokati keumbo yatekapo.

Ndilokelwa yaKambidi kaHangula, ohombo yaye eidedaula medu yeemwene nde tashuna kooina vakatende eengongo davo noshiveli shavo.
Ndilokelwa ohamba yokakakadona oyo yadalwa nomumati wedina Haimbili yaKambidi, eehamba edi oda dalelwe pefimbo lokwenye omudo oo otakutiwa okwali kuna ondjala ilulila, Ndilokelwa eshi a ninga okakadona kakula, okwa kongwa po komumati waye ngaashi oukadona aveshe haveshiningi.
Momudo 1970 oshali omito yomumati wedina Sheefeni yaKamati opo a kaendele okakadona komo tate Kambidi ka Hangula oko kedina Ndilokelwa, ndele poima opali oixuna ne okakadona inaka hala okukongwa kaka hombolwe ngaashi ovanhu aveshe.

Oshityopokelo shaNdilokelwa osho shemweetela opo a kale inahala okukongwapo, omukulukadi ou kwali a tumwa a kaendele Ndilokelwa okwali ta pulwa omapulo kohamba ei ngaashi naana omunhu tapula oshinovele shikwao.
Pwilikina ne omukwanambwiyu eshi a tameka okupula oininima inaipya nawa.
Meekulu mwati umweenda wange nowahala shike tu? meekulu mukwanambwa tanyamukula tati, ame wani, ondimweenda woye nda tumwa ku Sheefeni ahala okakadona kokuhombola. Ndilokelwa ta pula, “Sheefeni yaKamati ou hakala kohambo mulaula fokofoko noshinoko shaye shihapu, okwe shi tula po naini eshi a hala nge?”
Meekulu Mukwanambwa ta nyamukula nonghumwe tati, “aayee oshinoko shaye kandi shishi ne kakadona kange ame omutumwa ashike momutwe womutumwa iha mu pandwa ombole.”
Ndilokelwa ta pula a lulika oshipala tati, “hano Sheefeni haye a mitika po Nelao nde na Shelima yaKakoto, ndee na Nangula yaHedimbi? Ame ondauda vati Nekwaya woko Shailemo okuna edimo laye. Ovo oteke va hombola po naini? Ile naame okwahala atulenge koshivalo shomahengu aye ngaho?”
Mukwanambwa tati, “Sheefeni yeemwene oshili ondi wete kutya okwa tokola okuhombola kakadona wange wani, na kandi wete nande ta ningi omashendjo.”
Ndilokelwa ta pula, “paife Mukwanambwa eshi wahala ndika hombolwe kuSheefeni oinona oyo ihapu ihapu adala yafa eemuku otai ka kala nalye, ile owa hala ashike u twalenge moheli yohombo ihena omundilo? “Mukwanambwa eshi una okaumbo koye hamba ha ta shiti eehombo dovashamane hado dilula dafa datulwa ondungu mboli?”
Meekulu tanyamukula aeta onghenda keendaka tadi popiwa kokakadona kohamba inadi tokoka nawa tati, “mumwange Ndilokelwa pounona va sheefeni hatokatekulapo ngo ava totekulapo, okwa tiwa kakale navo aveshe meumbo loye?” Ohamba tainyamukula natango ya lulika oshipala iwete yapula epulo ladenga eembwa noiyaxa taiti, “hano naana mukwanambwa shikahombolifa nge ku Sheefeni tashikufange moo tate mo muhena ondjala oshike, nongeenge omulumenhu ndahala Devi ya Mukwateni hapo eli opo ou wohonda yange?” Aayee oshinoko shohamba shapitako ne paife oyatameka ne okudimauka. Mukwanambwa okwanyamukula tati “kaanave kaKambidi ka Hangula hano oushi ngo eshi topopi mumwange, ngeenge taku popiwa omunhu una ohonda yoye osho vali to yeleke naau ahala oku ku hombola po, oushi ngo nokutya ohonda yoye ombudi ashike ikweni hamushakene nayo momilaulu?” Tula utale onhulo ndele to fikama ukahombolwepo ku sheefeni manga to lombwele ovanhu una ohonda yoye ngaho.
Ohamba yokakadona yomepata leehamba yo oyadalwa efiku limwe nohamba yomumati haimbili yakambidi ka hangula, oya tameka taitale pendu yo otaishoko medu. Ndilokelwa okwatameka taxukula omahodi momesho, ndele tanyamukula meekulu mukwanambwa manga ta xukula omahodi tati, ohandi itavele ndika hombolwe ku Sheefeni ngaashi toti. Ashike oshili mukwanambwa, eshi ohandishipopi ame ka ndi wete handi dimbwapo ohonda yange Devi yaMukwateni, ngeenge oshili ondaka hombolwa ondo kuiifana ngo nande efiku limwe yuuye italele nge po kohombo, omulumenhu ondi muhole taupumo omona waMukwateni.
Ndilokelwa yeemwene nghe a kala eli pepata lameme waye opo, oshili kena ashike nande omikalo nongeenge ta popiwa naye kumeme waye mokanya kaye omo ohamudi eenyamukudi dipyu ta nyamukula meme waye.

Pwilikina ne eshi te lipopile ta ende a yuka kepata tati, Mukwanambwa takondjifilenge ngo ndika hombolwe ku Sheefeni yaKamati nowii waye wafa wepumumu la hanga ookashima vashita. Okwa ninga ne muwa naini hano, ame noxo eehombo odo kandi shi ou wa wado tu, novakulukandi ava nda mona vaka hombolwa vopomukunda apa ova nana mo ashike omakandja vafa veli moipangelo, neemati dilikombada dafa domambulunganga.
Ohango yaNdilokelwa osho ne yafiki ndele Ndilokelwa takumwifa ne ovanhu pomukunda wavo. Ina yaNdilokelwa okwalombwela Ndilokelwa tati, oto longekinda ne oinghumbi yoye kakadona kange yovamati noukadona.
Ndilokelwa okwa lombwela ina tati, “oshinghumbi shange shotete koukadona, oNaituwe ya Shikongeni, oshinghumbi shange shakula kovamati sho osho ndiwete kutya otashi kakwatela oshivilo shange komesho, o Devi ya Mukwateni.” Naituwe ou ta tongwa oye kwali emuholela Devi yaMukwateni.
Ina okwa pukapuka komutwe molwaashi oikala yomona okui shi nale, nekuni lako. Tati, mmmmm Ndilokelwa mumwange wokukahombolwa ngo ndele toka teya po nongudi yokaanda kovanhu yopokati keumbo. Ndilokelwa okwanyamukula a manamo omesho tati, ngeenge oyateka ohandi ufana ngo Devi yaMukwateni ndele tekeika ndele teidiki manga mwene weumbo ineya.
Oshili Ndilokelwa okwa tyopokela ou, efiku lohango yaye manga ashike ovafuko veli polupale, Ndilokelwa ngeenge ahala okuya mepya oha ifana po Devi oshinghumbihonda shaye oye eke mu teelele ponele yoku ifana nande oNaituwe. Kushi nee eshi hashi ke likundwa vali manga mepya ovanhu veli mohango, odino ilulila nee.

Ohango eshi yapwa, Ndilokelwa okwaya kouhombolelo keumbo looSheefeni. Paife efimbo laSheefeni lokushuna kohambo olafika nee Ndilokelwa okwalombwele Sheefeni tati, efiku to shuna ohandi ku pe okambapila uke ka pitike poo tate Mukwateni mwinya hamudi Devi ou ali oshinghumbi shetu.
Mboli ngeenge kushi okulesha nako okwanyika ngo oshiponga. Sheefeni kali eshi okulesha ashike okwali ashike eshi okuvalula eengombe, ngeenge eli kohambo.
Mombapila oyo yapewa sheefeni kundilokelwa ekeipitike ku Devi yaMukwateni omwashangwa takuti, “Devi kaholike kange, opo ngo uli mwali wange? Oshili Devi omwenyo wange inaumanguluka nande eshi ndili kohombo oku wani osheshi ohandi kala unene ndeku tula komwenyo, sheefeni laKamati ololo lauka kohambo oko, tali shuna, onghe ne Devi dimbuluka kutya ame itai kala handili oifima inaivelelwa mumati wange manga uli po. Nda hala hano okutya omito oyoye muholike.
Devi ya mukwateni oshili yeemwene eyoka nande ihe li pweda pedu. Eshi amona Sheefeni tadi kwinya oye a hovele temu hambelele ndele temu yelula po tati, mumati mukwetu mufuko wange ngheengo nde ku lixula eshi ndemu twalele kongeleka, hamba tu shakena ngo vali shiveli wani. Meme opo ne eli, okuli nawa?
okambapila aka apewe opo eka leshela opo manga Sheefeni eli po ndele ta tameke ta menye mo, ta pula Sheefeni tati, vati omukulukadi woye vati okwahala oku tu mona atushe ava twali oinghumbi yeni, ndele oshili otapenge ne oilonga opo ndike va lombwele aveshe wani molwaashi vamwe paife oveli kokule. Sheefeni ta tameke ta menyemo ewete omukulukadi waye a hala okwoongela edimo lavo.
Vanamibia kotokeni ehonda deni, nye muhaninge ovanhu oinghumbihonda, sheefeni eshi akadja kohambo okwa hanga Ndilokelwa a pewa po edimo ku Devi yaMukwateni, ye Ndilokelwa eshi a tewatewa kohombo, okwa hanga vali Devi ta hombola a kongelwa okakadona. Ye Ndilokelwa noufimba ina u dalwa uheshi wokohombo. Ame ohaikala hai di omaxwilili ngeenge ndi udite oinima ili ngaashi ngaha.
Vanamibia amushe nyamukuleni utale epulo eli taliti, paife olye a kanifila Ndilokelwa ohombo yaye, oye mweni ilo oshinghumbihonda shaye Devi ya mukwateni?

LEAVE A REPLY

Please enter your comment!
Please enter your name here