Aanamibia yi indilwa ya holoke puudhano wetanga

0
196

Komutoolinkundana

WINDHOEK- Meya gwaKahandja okwa indile oshigwana oshiholi shuudhano wetanga lyokoompadhi opo shi kale tashi holoka pomaudhano gwetanga lyokoompadhi omwedhi tu uka ngoka taga ka dhanenwa muupale moVenduka.
Congo Hindjou okwa ningi eindilo ndika pethimbo lye uliko lyekopi lyoCOSAFA ndyoka lya tamekele oku ulikwa puudhano wa ningililwe pokapale ka Kuisebmund mOmbaye Olyomakaya ga yi.
Ekopi ndika lya sindanenwepo ku Namibia omvogu otali endithwa niilando ya yooloka ya Namibia noku ulukilwa oshigwana, nopethimbo tali ulikwa otapu kala uudhano wetanga lyokoompadhi gaadhani yatano oshowo uudhano woospana dhoomeme tadhi kondjitha ndhoka dhootate.
Hindjou okwa kumike aaholi yuudhano opo ya kale taya holoka kuudhano mbuka mpoka tapa ulikw ekopi ndika tashi ningwa komeho lyethigathano lyuudhano woCOSAFA mboka tawu tameke momasiku 11 Juni sigo 25 gomwedhi ogo tuu ngoka.
Hindjou okwa tumbaleke ongundulongekidhi yomegumbo sho ya etapo edhiladhilo lyoku fala ekopi ndika komahala ga yooloka nokwa indile ihe oshigwana opo shi holoke momwaalu omunene kuudhano mbuka oshowo shi holoke wo momwaalu omunene uuna uudhano wethigathano lyolyene wa tameke omwedhi tu uka.Okwa ti wo aatali naya holoke momwaalu omunene oku yambidhidha ospana yopashigwana yoBrave Warriors ndjoka oyo yili enyakwa lyuudhano mbuka pethimbo ndika. “Ethigathano lyekopi ndika otali dhimbulukitha ndje oshindji na ishewe ondi li hole oshoka onde li dhanena onkene ondina omadhimbuluko ogendji kombinga yalyo. Moku li guma onda dhimbulukwa omimvo dhomilongo omugoyi sho twali hatu li dhanene” Hindjou ta dhimbulukwa.
“Otandi indile aaNamibia ayehe ya holoke pomaudhano ngaka noku thaneka omathana ya kwata ekopi ndika oshowo oku ya ya tsakanene naadhani aanamadhina mboka ya dhana methigathano ndika omimvo dha ka pita.Namibia oye ta edhilile nokulongekidha uudhano mbuka onkene kehe omukwashigwana okuna oku kala oshitopolwa shelongekidho ndika”. Hindjou a dhimbulutha.
Pethimbo lyolweendo lwekopi ndika opena iinyangadhalwa oyindji ya kwatelamo omaudhano gaadhani yatano kombinga yimwe oshowo uudhano woomeme taya kondjithathana naadhani yaalumentu.Opena wo omagano taga gandjwa ku COSAFA oshowo esikumudho lyokukondjitha noku ngambeka okankela yo Cervic, komagundji oshowo koprostaata oku yi tidhamo muAfrika. Ehwahwameko ndika otali kambadhala okulonga oshigwana kombinga yoku keelela oshowo okudhimbulula uuvu mbuka. Oshikonga shika otashi yambidhidhwa kOmukukadhi gwotango gwa Namibia Monica Geingos. Nena ethigathano ndika neuliko lyekopi lyoCosafa olili mOkahandja, moka Hindjou ta waminwa ku Tico Tico Bucuane na China Utoni mehuliloshiwike.
Olyomakaya ekopi otali kala mokapale ka Legare Stadium moGobabis mpoka tapa ka kala ospana yo Brave Warriors oyo ta yi ende nekopi ndyoka.
Momasiku gane ga Juni ekopi otali kala pendiki lyoHope Centre moKatutura mpoka tapa kala omaudhano niinyangadhalwa ya yooloka. Naashika otashi pe aatali ompito okutyapula ehuliloshiwike ndyoka nawa.

LEAVE A REPLY

Please enter your comment!
Please enter your name here