The Dogg ta imbi poMiss Face of Try Harder

0
243

KuPinehas Nakaziko

Windhoek-Omusindani gwomakopi moshilongo no ku li gumwe gwaahikingalo dhingi a tseyika nawa moongalo The Dogg, oye ta kala omuhikingalo omunene pethimbo lyeuliko netseyitho lyomukadhona dhingi Miss Face of Try Harder.
Oshituthi shika oshiliko mOlyomakaya yehuliloshiwike lyomasiku gane gaJuni nuumvo pehala ndyoka lyomainyanyudhilo lyo Dubai Lounge moDonkerhoek moKatutura.
Poshiindingili ota pu ka adhika uukadhona mboka wuna ondjelo ombwaanawa waadha po mulongo nuutatu, tawu ka ulika uunongo wawo tashi pitile mokweenda noku katuka kwawo.
Omuetipo gwoshiindingili shika, Hans Namutewa, no ku li oye mwene gwehangano lyo Try Harder, ndyoka hali nduluka oonguwo ngaashi uumbindja, oombulukweya nuugala, okwa ti elalakano lyoku etapo oshituthi shika, okukonga omukadhona dhingi ngoka ta kala oye oshipala sholudhi nduka lwoonguwo.
“Oshituthi shika otashi ka gandja ishewe ompito komanzuna ngoka omashona oku taandelitha uunongo wago mehangano lyokweenda no ku ulika uukadhona dhingi moshilongo mpaka naampeyaka,” Hans tati.
Oshituthi osha tengenekwa ishewe shika kale shanana engathithi lyaakwashigwana oyendji opo ye ye ya yambidhidhe osheetwa po shika.
“Noonkondo adhihe ota tu indile opo aakwashigwana ya kale ya holoka yo ya ka kale yetu yambidhidha,” Hans ta indile.
Kakele ku The Dogg, aahikingalo ngaashi Samuele Oshipuna, Black Dice, Skoplaza naPopcorn ota ya ka mwenyeka uusiku mboka.
Omainyanyudho okuza kooDj, eyotho lyonyama, Red carpet nomathigathano ogendji ga yoolokathana ota ga ka ningwa.
Try Harder ehangano ndyoka lyiizalomwa lya totwa po omvula ya zi ko ku Hans Namutewa na Sam Nekongo, nelalakano oku etapo noku ninga iizalomwa yomoshilongo yi na etumwalaka.
Ehangano ndika oli na etumwalaka ndjoka tali ti kambadhala shinene, mu kehe shoka to vulu okuninga.
Ehangano ndika pamwe nuukadhona dhingi mboka ta wu ka kondjela oshikoloni shika olyali lya mono ompito ombwaanawa okutopolela oothigwa dha adha pethele limwe iikulya, noku ya telekela, okuya pa oothewa dhoku iyoga, pOmbili Soup Kitchen ehulilo shiwike lya zi ko.
Uutekete woshituthi shika otawu ka adhika po Dubai Lounge kondando yooN$ 80 wo VIPs nooN$ 40 mboka wopokati, omiyelo otadhi keeguluka poheyali yokomatango.

LEAVE A REPLY

Please enter your comment!
Please enter your name here