Egumbo lye lya fikwapo ku mwene gwomukunda

0
482

KuMaria Namupala

OTYOLO – Omulumentu gwoomvula 35 gomomukunda Ondoloma moshipundi shOtyolo okwa li a thigwa pomutenya sho egumbo lye anuwa lya tomekwa omulilo nokufikwa po ku mwene gwomukunda gwawo.
David Ndongo okwa lombwele Kundana kutya yo na mwene gwomukunda ngoka oya li yu uvathana mo 2014 opo e mu pe ehala moka ta tula egumbo lye, ye a kale ta longo iilya ye oshoka kena mpoka ta mono ekwatho.
Molwaashoka anuwa Ndongo ka li ena oshimaliwa pethimbo ndyoka mwene gwomukunda oye tuu ngoka okwa li emu lombwele kutya shono ka shina shilonga ota vulu eete ombandu ndjoka yekaya hayi gandjwa omuntu ngele a hala ehala uuna mpoka eyi monena ashike na tameke owala okukokola epya lye ndyoka a pewa.
Ndongo oya li ya lala egumbo lyawo nomukulukadhi na mwene gwomukunda okwali emu adha a ti anuwa kutya ina eta we oshimaliwa na gandje owala anuwa ombiga. “ Mpono opo nee iikolokosha pokati ketu na mwene gwomukunda ngoka ya tameke, ondali nda mono oshimaliwa shoka ashike sho nde shi falako okwe shi tindi ta ti ina hala we iimaliwa okwa hala ombiga, ondali nda shuna kegumbo noshimaliwa shoka oshoka okwa li ta ningilendje omatilitho, ye ta ti egumbo lyandje oteli fikepo kumwe nenkolo,” Ndongo ta ti.
Mwene gwomukunda oye tuu ngoka okwa kala anuwa te ende ta popi Ndongo, ye nani okwali a hala a kuthe Ndongo ehala ndyoka e mupa oshoka okwali a hala anuwa eli landithepo ku gumwe. Mu Apiilili oya li anuwa ya ka talelapo kegumbo kEenhana yali yaya nomukulukadhi nuunona.
“Onda dhengelwa ongodhi komushiinda shandje ta lombwelendje kutya egumbo lyandje nenkolo olya fikwapo thilu ku mwene gwomukunda, ondali nda ningi onkambadhala ndi zeko mbala ngame ndi tale ngele shono tashi popiwa osho shili, nonkumwe ondali nda kundwa oku tala egumbo lyandje lya lakatapo komulilo pamwe nenkolo lyandje,” Ndongo tati.
Ta gwedhapo kutya megumbo lye moka omwa pila iinima konyala yawo ayihe omauthemba niikutu yawo, ta hokolola kutya oya thigwa pomutenya no kayena po nenge shimwe otaya ka totolola owala anuwa. Ta ti oshiningwanima shika oshali sha ningwa pehulilo lyaApiilili.
Ndongo pamwe nomukulukadhi oya li ya tseyithile mwene gwoshipundi Otyolo kombinga yoshiningwanima shima. Molwaashoka mwene gwoshipundi tatekulu Onesmus Iyambo oha kala kuushimba okwali a tokola opo a zeko oshiwike shika ye a pulakene noku tala shoka sha ningwapo. Okwa li a adha okambindja ke kamwe ka tsilikwa puundingosho wopomudhingoloko no ina tseya anuwa kutya okeya po ngiini.
“Oshinima shika osha kumitha ndje noonkondo sho hasho shotango mwene gwomukunda ngoka ta longo iilonga ya tya ngaaka, otwa li twe mu kuutumbike molwa iinima yimwe ali a longa momukunda ashike nani natango ina tulapo, onda thaneka opo omutumba niihokolola mbyoka yi ka kaleko oshiwike tashiya tse tu potokonone omukundu nguka tse tatu uvu kutya okwa fikilepo shike egumbo lyamukwawo,” Iyambo tati.
Tati oshinima shino oshu uvitha omwenyo gwe nayi no ta kambadhala ya tale nkene omukundu nguka taye gu kandulapo mbala , yo ngele inaye shi potokonona taye shi fala koshikandjo shawo Onalusheshete shi ka ungwaungwe nasho komalenga omanene.

Burned2

LEAVE A REPLY

Please enter your comment!
Please enter your name here