Ekwatonawa neyambulepo leedjo miitopololwa shaCuvelai nEtosha

0
200

Komutoolinghundana

OSHAKATI- Ongudu yovakufimbinga ve dule 100, va dja koikondo yopaumwene , yepangelo novanhu oohandimwe mwa kwatelwa ovawiliki moshiwana, oya ongala moshoongalele shokweeta po efaneko lokukwatela po omudingonoko noku u xumifa ko.
Osho oshikando shotete taku ongalwa kolutu la fikama movanhu va yooloka tava ngongopo omukalo tau kwafele mekwatele po leedjo doushitwe, omeva omwiidi, oimeno, oixwa oipuka noinamwenyo momudingonoko.
Ovakufimbinga va yooloka ova shakena oshivike eshi moHotela Oshandira mOshakati va ete po etwokumwe mekwatelepo leedjo momidingonoko detu.
Ouyelele owa yandjwa komunambelewa woshikondo shomeva Silvanus Uunona woshitukulwa shomomatondokelo omeva momilonga nomoishana, okwa yandja ouyelele koshifo eshi. Uunona okwa teelela oshoongalele sheete elunduluko mekwato nawa leedjo dopaushitwe. Ta yelifa kutya oshoongalele eshi oshotete sholudi eli tashi ongala.
Ovakufimbinga otava eta po etokolo lokukwata nawa omeva, nomiti oshoyo oipuka noifitukuti moitukulwa Cuvelai-Etosha-Basin omo omukalo womatondokelo omeva a yooloka moitukulwa.
Uunona ta weda po kutya, pefimbo loshoongalele ovanambelewa voshikondo shomeva otava fatulula eyooloko lomaukwatya womeva, nghee e na ondilo nohatu pumbwa oku longifa omikalo tadi kwata nawa omeva opo tu amene eshito.
Opa longikidwa yoo no va nambelewa va yooloka tava ulike oilongomwa noku yandja ouyelele nghee sha fimana oku kwatela po oushitwe. Imwe yomuyo oprojekka yoAdventure hai fatululile ovanafikola efimano leshito momikunda, na yo oya kufa ombinga moshoongalele omu. Ohava i komikunda ku na omalusheno okulonga ounona efimano lomudingonoko wee djo domeva noushitwe.
Ovanafikola okudja keefikola da yooloka moshilongo ngaashi va shivwa va kufe yoo ombinga moshoongalele, ova teelelwa va shiive oilyo yoprojeka ei opo i longe ounona efimano lomudingonoko. Uunona ta weda po kutya, kakele kelongo lovanafikola peefikola novanyasha, oprojeka ohai twala yo ounona mokuti okuke va longa nokuva ulikila oipuka noinamwenyo aishe moixwa nghee ya fimana monghalo yeshito. Okutalala oumbabale, oifitukuti, noudila opo ounona va shiive efimano le kwatafano loishitwa aishe meshito nonghee sha nyika oshiponga ngeenge owa dipaya po oinima meshito kutya, oilanduli ya shike twa teelela.
Moshoongalele mwa shivwa ovafitaongalo ovalongi veefikola novanyasha, otava deulwa nelalakano va kale ovo ovakwati nawa veedjo domeva.
Uunona okwa teelela kexulillo loshoongalele ongudu ei ya ongala lwotete i kule i file oshisho omiti domomudingonoko, oshoyo omeva, i kale nekwatafano noikondo ya yooloka yopaumwene nomepangelo.
Ongudu ei i ka longe oshiwana shi kaleke po omudingonoko u kale po fiyo okomapipi okomesho. Oshoongalele osha teelelwa shi kale nokwoongala keshe odula.

LEAVE A REPLY

Please enter your comment!
Please enter your name here