Omalenga holokeni komalangeko gomalenga omakweni

0
249

KuMaria Namupala

OTATASHE – Elenga enene moshikandjo sha Amuteya tatekulu Vilho Sheetheni Kamanya okwa li a holola eyuvo lye lyonayi omolwa omalenga gamwe ngoka ihaa ga holoka komalangeko ga yakwawo. Ati shino oshili uunkundi uunene melelo lyaNdonga.
Tatekulu Kamanya ndhino okwali edhi popi pethimbo ta langeke mwene gwomukunda Otatashe moshipundi sha Akazulu, shono shili mewiliko lya tate Ananias Namene. Nonande aanamukunda oshowo mboka yopomikunda dhopuushiinda oya li ya holoka, ooyene yomikunda ka yali nande ya holoka opo ye ye ya ninge oombangi yo ya tseyathane.
“Oshinima shino osha uvitha ndje nayi noonkondo oshoka aluhe pomalangeko nga ngaka ohatu kala twa tegelela ooyene yomikunda moshipundi shoka muna omulangekwa, yo taya tulilathanako koombiga nonande oya ka tsakanena pehala lyontumba oye shaathane nale,oshinima shika shuunkundi wooyene yomikunda itaaya holoka komalangeko ohashi yematitha unene omalenga oshowo omulangekwa,” Kamanya ta ti.
Elenga enene olya kumike omulangekwa a kale ena amushanga oshowo kapatashu mboka taya kala taya longo muukumwe, okwa ti aantu na ya tseyithilwe oompango dhoshilongo oshowo dhomithigululwakalo yo ya kale aluhe haya iyutha kudho. Ta pula aluhe mwene gomukunda a kale ha ningile aantu ye iigongi yo ta ya kundathana oompumbwe dhoshigwana nomathaneko ga vule oku thikithwa ku kansela gwoshikandjohogololo shoka.
Okwa pula woo mwene gwoshipundi opo a tseyithile ooyene yomikunda mboka inaaya holoka, ye te ya lombwele kutya omolwashike sha simana opo ya kale taya gongala pomalangeko goombushe miilonga. Okwa indile ya kale ya ningilwa omutumba mbala yo ya tseyithilwe shoka. Omukunda nguka Otatashe oguna omagumbo 150 patengeneko, na ogo gumwe gu na omagumbo ogendji moshipundi. Tatekulu Shaalukeni Shidute oye a kala mwene gwomukunda nguka nomolwaa anuwa uukundi nuukulupe tawu endeleko okwali a tokola opo a inekele omutekulu Samuel Kamati oye a ninge mwene gwomukunda. Oyali anuwa ya yi kuuwa kOmukwaniilwa ngaashi hashi ningwa aluhe yo ya ka tseyithe oshinima shika nOmukwaniilwa Kauluma Elifas okwa li anuwa eshi taambako. Tatekulu Kamati okwa li a langekwa mOlyomakaya ya piti pOmukunda mpoka pOtatashe megumbo lye. Aanamukunda oshowo mboka yopuushiinda oya li ya holoka nokutaambako mwene gwomukunda gwawo ngaashi ya kala yeshi tegelela.
Tatekulu Kamati pethimbo ta taambako oshinakugwanithwa shika nokuzalekwa egala lyuulenga ngaashi hashi ningwa pamithigululwakalo okwa uvaneke taka longa kumwe nakansela gwoshikandjohogololo , yo ya kambadhale oku eta omahumokomeho ngoka ga pumbiwa unene koombinga ndhoka.

LEAVE A REPLY

Please enter your comment!
Please enter your name here