Oshiwana osha pumbwa oku dinda ngee tashi ya peengeleka

0
284

Onghalo yeengeleka dipe tadi totwa moshiwana nota di hapupala efiku nefiku ota i limbilike noya pumbwa elidopemo lepangelo nolaavo veli hongela outeologi.
Oshiwana nasho yoo osha pumbwa yoo okulesha Ombiibeli, okutala nawa sho shi pule nande ovava ve li hongela outelogi va fatulule imwe yomoinima oyo tai ningwa meengeleka odo va hala, sho shi ye mo nee meengeleka omo sha yelelwa.
Sha hala kutya nonande otu na ovafita vomaongalo, oshilongo oshi na omhumbwe yokukala yombelewa mouministeli wonhumba ina ovanauteologi veli fikamena ina va ama kongeleka yonhumba ile yongadi, ovo tava kala tava pukulula oshiwana kombinga yoinima ya pamba oukwamhepo, omaitavelo, omifyuululwakalo neenghulunghedi.
Eheno shili okatendo okati-19 mOnhopolwa Onhinatu yEkotamhango laNamibia oyo ili le po oufemba womunhu, noke shi yeleka kutya omunhu keshe oku na oufemba wokuhoolola nokukala meitavelo eli a hala, mwa kwatelwa yoo okuhoolola omifyuululwakalo neenghulunghedi odo a hala. Ashike mokatendo oko tuu oko osha yelekwa nawa kutya, shamha ashike eitavelo olo ile omufyuululwakalo oo ita u kufa ile ita u piyaaneke oufemba womunhu mukwao.
Omolwa okatendo oko, epaneglo ola pumbwa okukala leli tula mo opo ku talike kutya hamunhu nande te ya po nongeleka ile nomifyuululwakalo odo tadi piyaaneke omaufemba ovanhu va kwao.
Omhanga omunhu ine ya po nongeleka, ovo ve lile po epangelo ova pumbwa okukala va yelelwa kutya ongeleka oyo ota i ka kala naanaa ta i ningi shike, omhanga ina i li shangifa.
Ngee otwa tale koshinima shitalala she linyenga moWindhoek omo ovakainhu va pewa omateelelo kwaao te li ufana kutya oye Jesus Kristus, omunhu oto dilaadila kutya ooina pamwe ova itavela shili va iwe navo momilele komubishofi oo. Ashike Ounona ovo tava ka dalwa, vamwe vomuvo omubishofi ou ina tambula ko pauyelele kutya oye xe. Ashike ounona ava navo ovena oufemba wokufilwa oshisho kovakulunhu vavo aveshe. Paife nee ngeenge opena nee umwe ita tambula ko oshinakuwavifwa osho kutya oye xe, nena oufemba wavo owa nyonaunwa.
Ngee owa lesha Ombiibeli Iyapuki, efimbo Jesus Kristus a li kombada yedu kapena nande opamwe pa nyolwa kutya okwa nyona shimwe shomoipango omulongo oyo ya tulilwa po ovakwadu kuKalunga. Ashike omolwashike mbela Jesus ou adja kOkongo ta nyono shipango oshitihamano, ta hondele, nonovakainhu vahombolwa, ye vali ta nyono ohombo yaye mwene?
Kakele koufemba, ongeleka oyo oili imwe yomeengeleka odo ta di ningi oinima tai halukifa.
Opena vali eengeleka dimwe omo vati ovakainhu ina va efiwa va ye mo va djaka oudolombuluku, vati opo va shitwe nawa komhepo iyapuki. Eshi nasho ota shi eta oshipulifo, kutya pamwe ongeleka yaPaulus oo teli ufana Jesus hayo aike ta ii momilele novakainhu komukalo oo.
Omafiku enya okwali yoo kuna eengeleka dimwe tadi hokololwa kopolifi, vati tadi xupile ovanhu nomashini.
Opena vali eengeleka dimwe moSouth Africa da holokele moikundaneki, omo ovanhu vati tava nwifwa omahooli voo vamwe tava lifwa omwiidi. Eshi sha eta nokuli vamwe vomovakwaneongalo oo vaka tameke tava ehama, konima yokulya omwiidi.
Hano okutya eitavelo oli li shimwe shomoufemba womunhu ashike, apa pa tameke oufemba waumwe opo pa xulila wamukwao.

LEAVE A REPLY

Please enter your comment!
Please enter your name here