Aanangeshefa aashona mOmuthiya ya dheulwa

0
229
Aanangeshefa aashona noyopokati ya thanekwa taya ulike oonzapo dhawo ndhoka ya pelwe konima yomadhewo guule womasiku omugoyi.

 

OMUTHIYA – Omolwa onkalo yompumbwe yiilonga mokati kaaNamibia, elelo lyondoolopa yaMuthiya pamwe nehangano lyokugandja omadheulo kwaa mboka ya hala okuya mongeshefa hali ithanwa Performance Development Centre (PDC) oya li ya dheula aakalimo yomOmuthiya.

Omadheulo guule womasiku omugoyi (9) oga ningilwa aanangeshefa aashona naayehe yena ehalo okuya mongeshefa yeli 95. Omupopiliko gwelelo lyondoolopa David Israel okwe shi yelitha kutya omadheulo ngano oyali yega ningile owina opo aakwashigwana ya mone ontseyo  nkene taya wilike oongeshafa dhawo nokutseya shoka tashi pumbiwa kaalandi yawo.

“Ngaashi naanaa hashi ningwa konima yootundi omunasikola oha pewa onzapo ye natse osho twa ningi naanaskola mboka yali momadheulo ngaka sho twe yape oonzapo ndhono tadhi ulike kutya oya kutha ombinga melongo lyuunangeshefa. Nonande twali twa thaneka opo tu dheule aanangeshefa 120 otwa mono po owala yeli 95, no twa pandula oshoka oyali ya holoka nawa noya ulike eitulemo lyawo,” Israel ta ti.

Meya gwondoolopa yaMuthiya Toivo Nghilalulwa, pethimbo ta popitha engathithi lyaakuthimbinga momadheulo, okwe ya kumike ya longithe ompito kehe taya mono yo ya yambulepo oongeshefa dhawo unene mboka yena nale oongeshefa.

“Oonzapo ndhoka mwa pewa nena inamu kedhi tula kohi yookofa ashike dhi longitheni ngaashi shu uthwa, uunangeshefa owa simana moshilongo nomuuyuni awuhe oshoka owo hawu humitha komeho eliko lyoshilongo, longeni nuudhiginini no neitulemo opo mu humithekomeho oonkalamwenyo dheni , ne mu gwedheko kehumokomeho ndyoka lya pumbiwa mOmuthiya”Meya ati.

Nghilalulwa ta ti shino oyeshi ningi nomalalakano gokutya oyendji yomaakwashigwana ka yena ontseyo yuunangeshefa, noyendji mboka ya hala ya landule ondjila yuunangeshefa kaye shi mpoka taya tamekele. Ta ti elelo lyondoolopa olya mono ompumbwe yokwaahena uuyelele kombinga yuunangeshefa, nolya tokola li longekidhile aanangeshefa yawo aashona omadheulo, yo ya kondjithe onkalo yoluhepo nokwaana iilonga.

Konyala oyendji mboka ya mono omadheulo aanangeshefa mboka haya landitha uushikependjewo wawo, mboka haya longo moosalona, haya kulula, mboka woo haya longo poongalashe na yalwe wo mboka yu ulike ohokwe yuunangeshefa.

Aanangeshefa aashona oya li ya nyanyukwa noonkondo sho taya pewa oonzapo dhawo. Meme Lovisa Keshongo gumwe gwomaamboka ya kuthile ombinga momadheulo, okwali a yelitha nenyanyu kutya mootundi dhomasiku omugoyi, okwa likolamo oshindji, nuunongo mboka ali keena monkalamwenyo ye.

“Ngaashingeyi otuli mpaka nena twa nyanyukwa moku taambako oonzapo dhetu ndhoka twi ilongela, ka shali oshipu ashike otwe shi pondola, oondjodhi dhetu oyendji odha tsa no tatu pandula elelo lyondoolopa pamwe noPDC sho ya mono sho opala opo yi tu longekidhile omadheulo ngaka,” Keshongo ta ti a nyanyukwa.

 

 

LEAVE A REPLY

Please enter your comment!
Please enter your name here