Mungandjera a pe Malakia dhopomeho eta yalula oonyothi

0
238
Olugodhi pokati ka Immanuel Mungandjera na Peter Malakia kalwa li talu nuwa omeya.

OSHAKATI-Immanuel Mungandjera oye enyakwa mondjundo yo National Welterweight, konima sho ali a dhenge mo Pita Malakia medhingoloko etiyali ongulohi yEtihamano lyazako mOshakati.

Esindano ndika lyaMungandjera olya etele okalaba yaKilimandjaro ndjoka oyo yemu dheulila uudhengingonyo oshishani shayo shotango shopashigwana. Kilimandjaro sigo oompaka kali e na omudhengingonyo nando ogumwe a pewa epaya lyuudhengingonyo pomuthika gwopashigwana.

Uusiku owo tuu mboka omudhengingonyo Kapena Naindjala okwa li a dhenge mo omukondjithi gwe niitsa konima yomadhingoloko gahamano.

Michael Benhard okwa li a nyanyudha aatali konima sho ali a gandja dhakahandja dhuukilila moshipala sha Josua Mbwalala, moku hata pevi medhingoloko etitatu nokuthiga oyendji taya tsu omazima, taya ti omumati ota umbu oongonyo ngaashika ashike he Josef Benhard ngoka ali omudhengingonyo omwaanawa.

Uudhano mbuka owa li wuna omalugodhi agehe kumwe gahetatu nowa li wa ningilwa pehala lyomatala omape mondoolopa yaShakati uusiku wOlyomakaya gaziko.

Josef Benhard okwa pandula Aashakati sho ya li ya holoka momiyalu ominene okutala uudhano mbuka ati shika osheya kumike unene.

Okwa pandula wo Kinda Promotion na Sunshine Boxing Academy sho ya li ye ya kwatha mpaka naampeyaka opo ethigathano ndika li ende nawa, ta ti shika otashi ulike kutya onakuyiwa yomaudhano oyi li momake omawaanawa.

Uudhano mbuka owa li wa kwashilipalekwa kehangano lyoProfile Investment Holding ,nowa li wa kwatelwa komeho kaanambelewa yaza kolutu oluwiliki muudhano wokudhenga oongonyo lwoNamibia Boxing and Refereeing Control Board kohi yewiliko lya, Joe Kaperu.

 

LEAVE A REPLY

Please enter your comment!
Please enter your name here