Omunyekadi Geingos okuli mondjila

0
229

Osho sha popiwa komunyekadi woshilongo Monica Geingos shina sha nokutalela mefano lii, nokupangula ovo ve li kufa omateelelo oshi li mondjila.

Oshoshili, oomeme, unene ngoo ovanyasha nounona voukadona ove veli hanga momupya wokuninga omateelelo inaa longekidwa ova taalelwa unene koshiwana, osho iha shi li pulile ko kutya pamwe nee nakuninga eteelelo oku li monghalo ya fa peni pamadilaadilo na okwa li tuu ena ouyelele eshi aya momilele. Oshiwana vali iha shi dilaadila kutya okaana oko ile omukainhu oo ine li pa eteelelo yee mwene, sho shi pangule nakupewa eteelelo pamwe na naku liyandja.

Ashike oshinima osho sha fimana noshali sha tuwa omufindo kuGeingos osheshi kutya, ovakainhu kavena ouyelele, nokavena eyambidido lawana ngeenge ta shi ya koilyo yoidalifi, omilele nomateelelo a longekidwa.

Omolwa ouyelele oo uhe po, ovakainhu vahapu ohave li hange momupya wokuninga omateelelo inave a teelela. Ovakainhu luhapu ohava kala tave li pula noudjuu, shaashi, efimbo limwe omunhu oku li moluhepo, omunafikola, ile pamwe kali a teelela a mone okaana pefimbo olo molwa eshi ile shinya. Momalipulo oo mandjuu, luhapu omunhu iha kala naanaa ena kutya olyelye ta popi naye emu xunge omwenyo molwa oudjuu oo e li hanga muo shaashi keshe umwe moshiwana oku wete ena oufemba wokupangula. Luhapu eshi oha shi xulile nee momukainhu e li kufa edimo, ile ta mono okaana ndele teka ekele shi.

Omunhu oo nee elihanga monghalo yatya ngaho, onga oshiwana ohatu lotoka hatu mu pangula, hatu muula omalaka, nokuli ta patelwa modolongo, ashike iha tu dilaadila kutya osheetifi oshashike.

Shotete ngee owa tale momaumbo, oshiwana shetu kashi na omufyuululwakalo wokupopya sha kombinga yomilele. Osho ohashi eta opo okaana kokamati ile kokakadona keke li honge oinima yomilele moixwa, no ina ka hongwa kutya oda nyika oshiponga ngahelipi.

Oshitivali, ovadali vopaife inava hala okutambula ko onghalo nokuitavela kutya ounona vopaife ota ve li hongo oinima yomilele vashona neenghono, onghee ova pumbwa okupopiwa navo petameko elela.

Oshinima oshititatu, ovapangi koipangelo nokeekilinika inava hala okumangulukila ovanyasha ile oukadona ngeenge tava i koipangelo tava ka konga oingabekifi yoludalo.

Osha yela, omunhu ngeenge teuya koshipangelo ta kongo oingabekifi yoludalo, oku na nale ehalo ile etokolo nedilaadilo lokuya momilele.

Ove ngeenge omupangi oto anye oku mu kwafela ile to mu pula omapulo taa eta opo eheku mangulukile, oto mu taataele ashike kokule ye a xulife po okuuya koshipangelo a konge ekwafo. Ashike ita xulifa po okuya momilele, nokuli paife ota ka ya mwaadi ina di amenwa.

Omolwa omalihumbato oo onga oshiwana, onga ovadali, onga ovatekuli na onga ovapangi, ohatu imbi ounona voukadona novakainhu ovanyasha va ye momilele da longekidwa vena ouyelele wa wana, noveshi eshi tava ningi.

Fiyo efiku olo taku ka kala kuna ouyelele tau yandjwa pefimbo inau futamekwa momaumbo, ovapangi tave li humbata onga ovapangi ndele kave fi ovapolifi, noshiwana tashi yambidida ovo veli hanga momapuko omaufimba inaa longekidwa, otwa puka ngeenge hatu ka pangula ovo va ekela shi ounona ile ve li kufa omadimo shaashi ofye twa ya mepuko tete.

Hano ouyelele na u mangulukile keshe umwe, ounona nava longwe, voo nava yambididwe opo, oo teke li hanga mepuko a ha kale ena elipopilo.

LEAVE A REPLY

Please enter your comment!
Please enter your name here