Ovamati vahapu va kenghwa mefudo

0
201

 

OSHAKATI- Ovalumenhu 1 540 meefikola 30 moshitukulwa shaShana ova kenghwa mefudo. Oshikonga shekengho mefudo laMai 2016, osha kufa ko omwaalu munene wovalumenhu meefikola nova kali momikunda moshitukulwa shaShana. Ouyelele ou owa yandjwa kuAina Iitula omupangi koshikonga shekengho moshipangelo shaShakati moshitukulwa shaShana.

Iitula okwa ti, omwaalu waaveshe oo, owovalumenhu moshitukulwa shaShana va yakulwa eshi oshikonga sha tameka momafiku 27 Apiilili kate omafiku  27 -Mai neudo.

Moule womafiku oo oshikonga shi li metifa ovanafikola ova holola eudeko lavo eshi vahapu va yakulwa. Iitula ta weda po kutya, vahapu va yakulwa mefiku limwe noponhele imwe oveli 93. Ovanambelewa vouhaku inava fiya po nande omunhu inaa yakulwa. Eudeko eli , ola etifa neefikola daha li meshikulafano di va tumine kutya nado ode lilongikida . Oshikondo osha longikida oyeendifo okukatuta ovo ve li keenhele daha li momusholondodo.

Iitula okwa yelifa kutya, oshikonga eshi osha landula ikwao, shotete osha li muApiilili 28-Mai 26, 2015 sha kengha ovalumenhu 1 476. Nande pomafudo laAguste na Deseba 2015 opa li oikonga yoludi eli, inai yakula ovanhu vahapu okuyeleka naava.

Pauyelele wa yandjwa kuIitula, ekonaakono la ningwa moilongo yomuAfrica, South Africa, Kenya naTanzania ola koleka kutya, ovalumenhu va kenghwa ova amenwa shi fike pee 60% vaha kwatwe koHIV/AIDS. Onghee epangelo okupitila moshikondo shonghalonawa noundjolowele ola tula po omivalu dovalumenhu 26 885 va kale va kenghwa okufika 2017.

Omunambelewa woundjolowele okwa koleka kutya, nande oshikonga shekengho shomefudo osha xulila Mai, 28,2016,  ekengho keefikola da xupa ko otali ningwa mOmatitano nOmalomakaya keefikola da hoololwa mo. Omanga mokati koshivike ovayakulwa ova teelelwa moshipangelo shaShakati. Etokolo eli ola kufwa omolwa elitule mo li li pombada neudeko mokati kovalumenhu. Okwa weda po kutya, pefimbo loshikonga inava shakeneka oudjuu washa. Iitula okwa indila ovapambele nookaume kaavo inaava mona natango eyakulo eli, ve va twe omukumo va ye koipangelo tu kale noshiwana shi na oundjolowele.

LEAVE A REPLY

Please enter your comment!
Please enter your name here