Oyendji mOshikoto inaya mona eteyo ewanawa nuumvo

0
300
Omusamane Haitange pamwe naanegumbo lye taya ulike nkene iilya yawo ya fikwapo komutenya nokuulumbu wonuumvo.

 

OTATASHE –Oomvula mbali sho kwa kala kwaana omuloka nawa konyala oshilongo ashihe, oyendji oya kwatwa koshikukuta nokaye wete shoka ye na okuninga.

Aakalimo oyendji moshitopolwa shaShikoto otaya hupu nuudhigu, unene sho inaaya mona eteyo ewanawa nuumvo, omolwomvula ndjoka inaayi loka nawa. Oyendji oya ti oya taalela oshikukuta oshidhigu tashi gumu aantu oshowo iimuna.

Omikunda odhindji mOshikoto odha dhengwa unene sho momapya gawo inaamu za nande osha nonande ya kambadhalele ya longe.

Efraim Haitange  gumwe gwaamboka ya dhengwa koshikukuta  okwa holola kutya epya lyawo olyali tali ulike omumeno omwaanawa ashike iimeno yawo oyasipo owala no inaayi tulako omitse. “ Oshinima shika osheetwa komvula ndjoka inaayi gwana nongashingeyi otwa taalela onkalo yondjala yaantu niimuna, momapya gamwe inamu zasha nande mo mu gamwe iilya oyasi owala koluteni,” Haitange ta ti.

Aanafaalama mboka ya tseyika nawa mokulonga omahangu oyali woo ya yelitha kutya oshikukuta nondjala ndjika oya tameke unene konima yoomvula mbali, taya holola kutya momapya gawo ihamuzi we sha noya kumwa kutya otaya hupu ngiini.

“Oshinima shika oshetu limbilika unene iimuna yetu ka yi na shoka ta yili momalundu oshoka omwiidhi ka gupo , shino sha hala kutya natango otwa tegelela okukanitha iimuna oyindji ngaashi omumvo gwaziko oshoka, katuna shoka tatu yipe, otwa kambadhalele tu longe momapya ashike iilya yetu oyazi owala iipele yimwe ya tulako omitse kaadhina oomuma,” taya popi ngaaka.

Taya gwedhapo kutya momapya gawo oya hepekelamo oombuto odhindji oshoka oya kala taya kunununa taya ti pamwe omvula ona yi ka loka ngaa ashike oya hulile moluteni. Nonande ya dhengwa pevi koshikukuta oya ti oyena einekelo kutya omumvo tagu ya otaya ka mona omuloka guli nawa yo ya longe nuudhiginini ngaashi haye shi ningi shito.

Komikunda dhimwe ndhoka dha dhengwa unene noonkondo koluteni nokuulumbu aantu oya hendemo iihenguti momapya opo ya ningile iimuna yawo iikulya. Oya indile epangelo opo li ya dhimbulukwe moshikukuta yo ya vule ya okuhupa.

Epya limwe lyomomapya muuzilo woshitopolwa shaShikoto ndyoka lya li lyamena nawa ndele molwompumbwe yomeya iilya mbika inayi koka yi vule okutulako omitse.
Epya limwe lyomomapya muuzilo woshitopolwa shaShikoto ndyoka lya li lyamena nawa ndele molwompumbwe yomeya iilya mbika inayi koka yi vule okutulako omitse.

 

LEAVE A REPLY

Please enter your comment!
Please enter your name here