PLAN etanga lyaakwiita aa iyambi: Edhiko po lyo South West Africa Liberation Army 1964 -1970

0
265

 

Etanga lyotango lyaakwiita lyoSWAPO olya li ha li ithanwa South West Africa Liberation Army[SWALA]. Ndika olya dhikilwe po momasiku 17 Juni 1964 moTanganyika nenge Tanzania ngaashi oshilongo shika sha tseyika pethimbo ndika.Petameko etanga lyaakwiita ndika ka lya li lya longekidhwa nawa okuyeleka naandyoka lyo People’s Liberation Army of Namibia[PLAN] momutungilo oshowo moondjembo.Ihe nando ongaaka iilyo yo SWALA oya li yi ilongekidha noya hwama okukondjela emanguluko sigo oshilongo otashi zimo miikaha yaa kolonyeki.Omukumo nguka nomatokolo ogo ga hwameke aakwiita yoSWALA yi idhenge ondjila onde okuza koTanganyika[Tanzania] sigo otaya thiki pOmugulu –gOmbashe moshitopolwa shaMusati.Aakwiita mbaka oya pita muudhigu wondjala, enota osho wo omashongo galwe itaaga vulu okuhokololwa.

Aakwiita yo SWALA oyo yotango ya kondjitha omatanga gomukolonyeki molugodhi lwoondjembo pOmugulu-gOmbashe momasiku 26 Auguste 1966. Mewiliko lyakomanda ihaa tila nakusa Hailwa John Otto Nankudhu, iilyo yo SWALA oya zi koKongwa moTanzania ya pitile mo Zambia, Zambezi[Caprivi] noKavango omanga inaa ya thika mOwambo nale muumbangalantu waNamibia.Sho ya ende okuza pehala limwe okuya ke kwawo aakwiita mbaka oya kwathelwa kiilyo yoSWAPO osho wo kaa yambidhidhi yayo sigo ya thiki hoka ya li yu uka. Oya tameke noku sikumudha oshigwana  papolitika opo shi ya wayimine miita okukondjitha omukolonyeki epangelo lyokatongotongo lyaSouth Africa.

Omapenda ngaka goshilongo shika inaga shuna monima moonkambadhala dhago okumangulula Namibia.

Aakwiita yotango yaSWALA oya dheulwa moEgipiti momumvo 1961.Ongundu yotango ya dheulilwa uukwiita muEgipiti oyo

nakusa hailwa Tobias Hainyeko, nakusa Hailwa John Otto Nankudhu, nakusa Hailwa Lazarus Shanghala, nakusa Hailwa Peter Haitembu nakusa Hailwa Titus Mwailepeni na Leonard Nangolo Phillemon Shuuya ‘Castro”.

Aakwiita ayehe mbaka oya galukile koTanzania hoka ya ka tuminwa komadhewo go pa kwiita koChina oshowo koUSSR nale nenge koSoviet Union. Mboka ya tumwa komadhewo gopakwiita ko USSR oyo John Otto Nankudhu, Lazarus Shanghala na Leonard Phillemon Shuuya. Omanga Tobias Hainyeko, Peter Haitembu na Titus Mwailepeni oya ka dheulilwa uukwiita ishewe koChina. Mbaka oya galukile ishewe koTanzania momumvo 1964 omanga inaa ya pewa iinakugwanithwa yilwe.

Pethimbo SWALA a dhikwapo mo 1964 okwa li mewiliko lyaawiliki mbaka. Hailwa Sam Shafiishuna Nujoma Omukuluntu mokugandja omalombwelo, nakusa Tobias Hainyeko-Kommanda Ndjai, Leonard Phillemon Shuuya ‘Castro’ Kommanda yopevi, nakusa John Otto Nankudhu Uuyele, Esikumudho nokudheula, Petrus Hambiya Amushaga gopakwiita, Titus Mwailepeni omupevi Amushanga gopakwiita, Lazarus Shanghala Kommanda Ndjai yoPolisi,Simeon Shixungileni, Kommanda miilonga yomonanguwi  na ,Mesah Victory Namwandi Kommisala gopolitika.

Mu Febuluali 1965 ewiliko lyo SWAPo mo Dar es Salaam olya tokola okuhanyeka iita yekondjelo manguluko okuhomona epangelo lyuukoloni moSouth West Africa pethimbo ndyoka. Omolwo shinima shika  ewiliko olya lombwele Hailwa John Otto Nankudhu  opo a Kommande ongundu yaakwiita aa iyambi  yoSWALA okuya moNamibia oku ka hwahwameka neitulomo oshigwana papolitika osho wo okushi dheula pakwiita. Onkene momumvo 1965 Hailwa Nankudhu “Koshiwanda” pamwe naakwiita yalwe yatano oya thigipo Tanzania nokuya koNamibia ya pitile moZambia.

Iilyo yongundu yaakwiita ndjika oya li Hailwa John Otto Nankudhu Kommanda gwayo, Simeon Lineekela Shixungileni “Kambo’ Kommanda gwopevi,Mesah Victory Namwandi Omunambelewa guunamiti noKommisara yopolitika, Patrick Israel Iyambo “Lungada” Iilonga yomeholamo nAmushanga, James Hamukwaya “Hangula” Shoonyeka  Kommanda gwomalongekidho naNelson Kavela “Sadrag Kavela” Kommisar gopolitika.

Mewiliko lyaHailwa Tobias Hainyeko ongundu ndjika oya thigipo Tanzania okupitila modoolopa yokoongamba ya Mbeya moka ya pelwa oondjembo niikondjitho yawo.Iikondjitho mbika oye yi pewa kokommanda onkwashigwana yaTanzania moshilando shoka.Iikondjitho yawo oya li ya thikama moondjembo mbali dholudhi lwo PPSH dhomashina, oombistoli mbali dholudhi lwoTT noomboma dhopeke osho wo oombele dhuukongo.Omuperesidente goSWAPO nale Hailwa Sam Nujoma oye a li a gandja oondjembo ndhika kokommanda ya Tanzania moMbeya. Oondjembo ndhika hailwa Nujoma okwe dhi pelwe kepangelo lyo Republika yaAlgeria mo 1963. Konima yo ku pewa iikondjitho yawo ongundu ndjika oya tsikile olweendo lwayo ya piti moLusaka,Zambia nomoshitopolwa sha Cuando Cubango moAngola sigo ya thiki koshitopolwa shaKavango.Momumvo 1965 aakwiita mbaka oya thiki mEndola pegumbo lya nakusa Eliaser Tuhadeleni “Kaxumba ka Ndola’omanga inaa ya ka tsikila nolweendo lwawo okuya kOngandjera.

Oya yungu ontanda yawo yotango pOtamanzi, ndjoka ye yi luku Oondaadhi. Konima yoku kala pehala mpoka omasiku gontumba aakwiita mbaka oya ka yunga ishewe ontanda yimwe pehala lilwe pUuvudhiya. Ndjika oye yi luku Ontanda yOndjokwe.Aakwiita oya thigi po ontanda yawo yotango sho ya ndhindhilike kutya ndjika oyi itsuwa kaalongithwa yomutondi, gumwe gwomwaaboka gwedhina Titus Mbango noo yakwawo.Ishewe aakwiita mbaka oya thigi po Ontanda yOndjokwe noku ka yunga ishewe onkwawo ya lukwa Oshiwa shOngombe.Oya lunduluka po ishewe pontanda ndjoka noku ka tota ontanda ontine pOmutse-gOmpugulu moshitopolwa Ongandjera.

Molwashoka aakwiita yoguerrilla ihaya kala olule pehala limwe, mbaka oya ka dhika po ishewe ontanda onkwawo pOmugulu-gOmbashe momudhingoloko moka, momasiku 26 Auguste 1966 ya kondjo naakwiita yomukolonyeki naashika osho sha ningi etameko lyiita ye manguluko mbyoka ya hingwa kuSWAPO okukondjitha epangelo lyokatongotongo lyaSouth Africa.

Konima yeso lya Kommanda Tobias Hainyeko mo 1967, ewiliko lyoSWAPO olya ulike nakusa Jerobeam Dimo Hamaambo oye a ninge Kommanda Ndjai goSWALA.Kommanda Hamaambo ngoka  a dheulilwa tango uukwiita moAlgeria okwa li wo a kutha ombinga medhiko po lyo SWALA oshowo mekoko lyetanga ndika sigo oosho lya ka lukululwa noku ithanwa PEOPLE’S LIBERATION ARMY OF NAMIBIA[PLAN] omumvo 1970.Hailwa Hamaambo okuza kwe koAlgeria okwa li a ulikwa kommanda yongundu yaakwiita yomwaalu gwontumba.Okwa ka pingenapo Leonard Nangolo Philemon Shuuya “Castro” ongo kommanda gwopevi goSWALA mo 1967.

Konima yoku ulikwa kwe ongoKommanda Ndjai goSWALA Hamaambo okwa pewa aapeha yatatu, Hailwa Solomon Dumeni Hawala, nakusa Jonas Haiduwa na nakusa Patrick Iyambo Lungada.Aapeha mbaka yatatu oya hogololelwe poshigongi sha ningililwe poKaunga Mash moZambia omumvo 1969. Omwaalu gwiilyo yoSWALA ogwa li gwi indjipala pokati komumvo 1964 nomumvo 1970 naashika osha fala meegululo lyombinga yomalugodhi moshitopolwa shokUumbugantu ninginino wa Zambia shoka sha palathana naNamibia nenge South West Afrika pethimbo ndiyaka.

Okupita kwongundu yotango yaakwiita okuya moNamibia okwa li kwa landulwa koongundu dhi ili no dhi ili kokutya ongundu ontiyali, ontintatu nontine.Ongundu ontiyali ndjoka ya li naakwiita omulongo oya thigile po Ontanda poKongwa moTanzania okuya koNamibia tayi pitile moZambia. Mbaka oya pelwa iikondjitho yawo poMbeya koongamba naZambia omanga inaa ya  enda noshihauto sho Land Rover okuya koLusaka nohugunina okuthika poCaprivi  nenge Zambezi ngashingeyi  ya pitile moLivingstone sha Zambia. Ongundu ndjika oya ka thika moshitopolwa sha Kavango konima yoku enda ondjila ondhigu  ndjoka ye ya pititha moshitopolwa sha Cuando Cubango muuzilo waAngola.

Ongundu ndjika oya li naakwiita mbaka, Rasarus Haidula Zacharia Shankala Kommanda gwongundu,Joseph Helao Shituwete  Kommanda gopevi,Julius Kashuku Shilongo Uundaadhi,Hidipo Jesaya Kambwa Haufiku, David Hamunime, Jonas Shimweefeleni Kaputu, Festus Nexale, Eino Kamati Ekandjo okuhanagula , Leonard Nangolo Phillemon “Castro” Shuuya na Elia Ndume kommanda guunamiti.

Iilonga yongundu ndjika oya li okuhwahwameka  oshigwana meni lya Namibia okuhwameka etsondumbo  lyawo nepangelo lyokatongotongo.Oshitiyali ongundu oya li noshinakugwanithwa okutothamo mboka taya ka dheulilwa uukwiita woguerrilla.Ihe molwashoka iilyo yimwe yomongundu ndjika oya li ya ende molukanda lwa Rundu  moKavango, mbaka oya monika kaakaleli po yomutondi.Onkene yamwe yomuyo oya kwatwapo.Mboka ya li inaa ya kwatwa oya ka kwatelwa muuninginino waKavango, na opwa hupile ashike Julius Shilongo molwashoka ali eshi okupopya oRukwangali.

Oohailwa omugoyi mboka ya kwatwa po oya li ya falwa nondhila ko Pretoria opo ya ka pangulwe. Ihe Castro okwa mangululwa nokushuna koZambia  a humbata iimaliwa oyindj.Okwa li a fundju aantu tati iimaliwa anuwa okwe yi yugu mostola yomuPutu lwokoongamba.

Ongundu ontintatu nayo oya ka landulamo pu Kotoba 1966. Ongundu ndjika  oya li yi ipumu mumwe naakwiita yomutondi ya Putu na South Africa, molugodhi nduka omwa kanene, hailwa Eliander Mwatale. Ye hailwa Ndadi okwa si omeya momulonga gwa Cuando omanga ongundu ya li tayi taaguluka omulonga ngoka.Mboka ya hupupo mongundu ndjika oya kondjitha omutondi apehe mpoka ye mu tsakaneke.

LEAVE A REPLY

Please enter your comment!
Please enter your name here