Swartbaster naOgopa butterfly ya topoka

0
315
Ogopa 1: Omuhiki nonkulungu momusiki yoHouse , Allan Jonathan, eshiwike nawa Swartbaster okwa thigipo ehangano lyokunduluka oongalo lyoOgopa Butterfly.

 

Omuhikingalo gwoongalo dhoHouse noKwasa Kwasa Allan Jonathan, a tseyika nawa Swartbaster okwa topoka nehangano lyokunduluka oongalo lyOgopa butterfly. Etopoko ndika Swartbaster okwa ti olye etwa molwashoka ehangano ndika lya ndopa okugwanitha po omauvaneko galyo pauvathano.

Omuhikingalo nguka a mona omasindano ngoka a holokele moshimpungu shomusika momumvo 2003 okwa holola oku uva nayi kwe newiliko lyehangano ndika ndyoka lya kala tali mu wilike uule womimvo ne, onkene okwa tokola oku li thigapo.

Omvalele yaRundu Swartbaster ngoka a li a shaina nokukoleka euvathano lyomimvo ntano nOgopa okuza momumvo 2013 okwa lombwele Kundana kutya okwa li a uvanekelwa omauvaneko gowala okuza kehangano ndyoka.Okwa ti ndika olya li lyemu uvanekele kutya otali ka nduluka nokutseyitha  oalubuma ye  ndele sigo oosho aeli thigipo oalubuma ndjoka inayi tseyithwa. Okwa lundile ishewe ehangano kutya anuwa iahli mu futu iimaliwa ye uuna a imba poshiithanene shontumba. Uuna ishewe iimaliwa mbyoka ya futwa ohashi kwatokelwa noonkondo.

“Onda li ndu uvanekelwa oshindji, oya tile otaya ka tseyitha oalubuma yoongalo dhandje kehe omumvo gwokondalaka, ihe sigo oompaka ondina ashike oalubuma yimwe. Ishewe ngele onda mono ompito yokudhana oongalo dhandje pehala lyontumba ohandi ka futwa ashike pehulilo lyomwedhi naaluhe oyena omaipopilo kutya kapena oshimaliwa,” osho a ulike.

Swartbaster okwa ti eimbilo nenge ongalo ye yimwe ndjoka yedhina  ‘Chiporoporo’ndjoka iimba pamwe naOteya  okwa li kwi itaalwa kutya oyili moalumbuma ye omvogu ihe oalubuma ndjoka inayi tseyithwa we, ye Ogopa anuwa ongalo ndjoka okwe yi tula  moalubuma yOteya, naashika Swartbaster oku shi uvitile nayi noonkondo. Okwe shi geela molwashoka Oteya okwa yalulwa nokwa pewa omapole omolwa ongalo ndjoka.

“Onda li ndi uvite nayi sho ya lombwele ndje kutya itandi  vulu okutseyitha oalubum yandje , nangame kanda li tandi vulu okuninga sha molwashoka onda li natango kohi yewiliko lyawo.Oteya okwa li ta ende niilando oshowo nomahala ga yooloka nokutalela po noku imba ongalo yandje manga ngame kaandi po.

Okuyamukula komapopyo ngaka mwene gwoOgopa Butterfly  Sula Kyababa okwa ti kashishi oshiwanawa ku Swartbaster okuninga omalundilo ngoka  konima yokuthigapo ehangano ndika unene tuu ye inee mu laleka.

“Onde shi uvu ashike miikundaneki kutya ye keshiwe oshitopolwa shoOgopa. Kena esiku limwe twa kuutumbile ishewe ina tumina ndje oshinyolwa shoku ikutha miilonga,” Kyababa a ti.

Kombinga yongalo ombwaanawa yimwe Chiporoporo, Kyababa okwa ti ndjika kayi shi ya Swartbaster oye awike ndele oyawo na Oteya. Okwa ti ye haye ha hogolola oongalo nenge ha tokola kutya ooalubuma yini yina  okutseyithwa, oshinakugwabnthwa shika oshomu nduluki gwiikelengendjo nomawi.

“Aandanisi yaOteya oyo ye etapo edhiladhilo ndyoka nongalo ndjika oya li yin a okukala moalubuma adhihe mbala, ndele nee sho oalubuma yaSwartbaster inaa yi tseyithwa we ,ndjika oya holoka ashike mwaandjoka yaOteya. Ngame ihandi gandja omalombwelo ga hugunina kombinga yooalubuma.Omuinginia gomawi oye ena etokolo lya hugunina kutya oalubuma otayi ningwa nenge ahawe. Sho etokolo ndyoka lyali lya ningwa ngame onda li nde li pula kutya omolwashike lya ningilwa.Ihe ye okwa li a tseyithilwa noku uvuko kutya omolwashike sha ningilwa.”

“Ngame kandishi omunduluki. Ondina ongundu ndjoka hayi tokola kutya omulye tatu tula oshimaliwa noonkondo dhetu. Okweya a nyenyete kiikundaneki koshinima shaningwa nale momumvo 2014.Tse aapunguli yoshimaliwa ihe katushi okangundu kuudhano. Otwa pumbwa okumona oprifita tayi tu galukile uuna twa tula iimaliwa yetu momuhikingalo” Kyababa a ulike.

Kombinga yofuto, Kyababa okwati kehe omuhikingalo oha futwa pehulilo lyomwedhi.

“Otwa longitha iimaliwa oyindji muye ndele inatu monamo sha. Oha ithanwa oku ka imba poompito ooshona, nohandi mu pe oshimaliwa nookuli omanga inaa ka imba, handi mu pe oongunga.Ohandi mu etele ohenda sho heyi indile.Uuna inaa mona ompito yoku ki imba oheya kungame ndimu kwathe, nota shi etitha ohenda unene sho ta popi omalundilo gatya ngaaka nokwiiyaneka puuyelele” osho a to noku gwedhapo kutya mu Swartbaster omwa longithwa oshimaliwa oshindji ndele inamu etela sha ehangano omanga Oteya ota etamo oshindji okupitila mooshowu dhe, oshoka olundji okwi ithanwa oku ka imba, niishewe oku imba kwe ohaku landwa kaaholi yoongalo dhe.

Okwe shi yeleke nawa kutya ye keshi omuwiliki ihe ye omupunguli. “Ngame ihandi wilike oonkulungu moondjimbo ndele nee ohandi  pungula iimaliwa miitalendi yawo , yo oyena aawiliki yawo . Ngele omuwiliki gwoye okwa ndopa okukuhumitha komeho nena ngame otandi kuthamo iimaliwa yandje . Iilonga yandje okutula aahikingalo noongulungu momusika puuyelele ya monike koshigwana. Onda uvithwa nayi keihumbato ndika. Oshitalendi shomusiki hasho ashike shasimana ihe nomaihumbato wo, oshoka ngele kuna omaihumbato geli nawa nena kapena ngoka ta hala okuku fala komeho muunkulungu woye.”

 Swartbaster okwa ti oku uviteko kutya okondalaka oya utha kutya ota thigipo oalubuma kehe yandulukwa kuOgopa. “Onda thigipo oalubuma ndjoka notandi nduluka ngashingeyi omaimbilo  gandje mwene.Onda kwata nale gamwe gomomaimbilo gandje oolimwe sigo oompaka. Onda hala ashike aayambidhidhi yandje ya tseye kutya ngame kandi li we kohi ya Ogopa, ihe ondili kungame mwene nehangano lyandje mwene na otandi ka uvathana naahikingalo aape mbala” oshow Swartbaster ati.

 

LEAVE A REPLY

Please enter your comment!
Please enter your name here