Uha pandula ngo vake ngoo

0
226

Otuli mounyuni omuokuyandja efimaneko li li ongo oshinima sha pumba noshi na ondilo. Mokukala kwange eshi nda tala keifano loulongi, onda didilika kutya osha pumba unene okuyandja efimaneko kovalongifikola nonande tava longo oshilonga sha fimana moshilongo oshoyo mounyuni aushe.

Ovalongifikola ovo elineekelo lonakwiiwa yokaana keshe, ovo oshikunino sheteyo lonakwiiwa kokaana keshe, novalongifikola ovo ovahambuli vovanailonga, ovanambelewapitifi, ovawiliki moshilongo (kutya nee opapolitika, opamifyuululwakalo, opangeleka nosho tuu), kandi uditeko kutya omolwashike itava ifanwa ovafimanekwa ngeenge ovo ovaetipo vovafimanekwa (Opresidende, ominisita, Obishopa, Ovafita, ondokotola oKansela).

Okudja nale, kapena shimwe sha etwapo shounghulungu inashi etwapo komulongifikola. Ovalongifikola ovo omumbwe yomunhu oshoyo okaana keshe aka ka hala oku kala okafindani monghalamwenyo yako ya keshe efiku. Ondina omukumo nelineekelo kutya elongo ola tameka nomulongifikola, exumokomesho ola tameka nomulongifikola, ewiliko ola tameka nomulongifikola.

Omunhu opo a kale nonghalamwenyo ina ouyelelele (ya minikilwa), elongo olo ouyelele wonghalamwenyo. Elongo lopetameko ola pumbwa oku kala la pama li dule onghatu yopokati oshoyo yopombada momundalongo. Ha atushe naana twa fimaneka elongo lopetameko, ashike elongo lopetameko olo ekanghameno oko kwa fikama eenghatu dikwao delongo, no li li oshinima sha fimana oko kuna oku tungilwa exumokomesho ile eputuko loshiwana.

Oshinima sha fimana melongo, osho ekanghameno oko kwa fikama elongo, nandi udiweko nawa apa, inandi hala kutya eendodo dimwe delongo hado naana da fimana ngaashi elongo lopetameko, ashike opo elongo lopombada li pame oshe li kwatela kongushu yelongo lopetameko, efindano lelongo lopombada ola fikama keenghono delongo lopetameko. Sho osho ne handi tu kumwe na Barbara ou a tile “ngeenge ounona oveya kufye va pama okudja momadimo ena elongo liwa, ohashi ningi oilonga yetu ipu. Ashike ngeenge ounona oveya kufye inava pama okudja momadimo avo, nokavena elongo la pama lopetameko, nena eshi otashi ningi oilonga yetu ikale ya fimana.”

Mewedelepo, ovalongifikola ovo ova etipo velunduluko, no hatu twala ounona vetu koshikola vaka longwe opo va ninge ovanhu ava twa hala va kale, ihava longwa ashike, ndele ovalongifikola ohave vape oshihopaenenwa shiwa, tava lundulula omadiladilo avo, noku longekida onakwiiwa younona ihena omalimbililo “Ovalongifikola nava pandulwe.!” Ngeenge owa tale nawa konakudiwa yoye nena, keshe apa to li hange paife ile monakwiiwa, keshe eshi to ningi paife ile to ke shi ninga monakwiiwa yoye, dimbulukwa kutya owa pumbwa oku pandula ovalongifikola, nove li longela oku ifanwa ovafimanekwa.

Paushili wovene, keshe omunhu okwa pumbwa oku fimanekwa, ashike ondi wete efimano linene nali pewe ovalongifikola. Ohaku tiwa efimaneko ohali tameke novakulunhu, ngeenge ovalongifikola ovo Meme oshoyo tate wakeshe eifano mounyuni, omolwashike itatu vape efimano eli veli li longela. Ngeenge omupresidende, ominista, ondokotola, ovabishopa, ongoloneya novafita, oidjemo yovalongifikola, omolwashike itatu va fimaneke nefimaneko olo la wana oshilonga shavo.

Paumwene wange, onda hala oku ulika pauyelele kovalongifikola va longange, vamwe va nwefangemo noshihopaenenwa shiwa, kutya onye ovafimanekwa, onye enyamukulo nena kutya omolwashike handi nyola oinyolwa tai leswa kovanhu, onye enyamukulo kutya omolwashike nena handi yandja eyakulo moshiwana na onye enyamukulo molwashi handi dulu oku ninga omupelesidente ile omubishopa mongeleka woshilongo shetu Namibia.

Ovalongifikola ova fimanekwa, onye shikwetepo shomapendulepo oshiwana moshilongo shetu, otamu longo oshilonga shafimana, oilonga yeni otu iwete notwe ididilika, itatu dulu okumu futa noimaliwa, ashike eteyo leni olo ondjabi yeni inene shaashi omwa dulikifa opo ovanhu va dule oku kala neenghalamwenyo dawapala, eli olo enangeko noupuna leni.

Pexulilo ovalongifikola ovafimanekwa, unene tuu pefimbo eli lofikola ya shita oshikako oshitivali nokuli, onda hala oku mu kwashili palekela kutya, oilonga yeni otwe i fimaneka, twikileni noku longa ovaleli, onye ovafimanekwa, otamu longo oshilonga shefimano, onye ovafimanekwa vetu! Kalunga nemu nangeke noupuna!

Didilika: Omadiladilo aa alongifwa omu kenasha nomuyandji wange woilonga, aange mwene.

Ku: Lasarus Nghifindwako Hakwaake (Senior Community Liaison Officer)

0813903040

Omunambelewa Mombelewa yonghalonawa moikumungungu inasha noHIV noAIDS mOhangwena Regional Council mEenhana, Nomulilongi wouteologi mongeleka yaANGLICAN moNamibia.

Private Bag 88011,

EENHANA

 

LEAVE A REPLY

Please enter your comment!
Please enter your name here