2Pack ita ka ya we kOlimpika moRio de Janeiro

0
271
2Pack pethimbo ali ta taakana oshitopolwa shaMusati okugongela oshimaliwa opo a ye kuudhano ko Switzerland. Molweendo nduka okwa li a gongelemo ooN$5 000-00.

OSHAKATI-Omukayili gombasikela omunuulema Frans Panduleni ita ka kutha we ombinga muudhano woParalympics mo Brazil nuumvo.

Panduleni ngoka wo a tseyika nawa 2Pack ita ka kuthombinga muudhano mbuka wa simana, oshoka ina vula okuya a ka dhane nenge a kuthe ombinga methigathano lyuumbasikela ndyoka tali ningilwa moSwitzerland.

Muudhano mbuka wokoSwitzerland omo moka ye a li ta pitile opo a vule oku ka kutha ombinga muudhano woParalympics moRio de Janeiro sha Brazil.

2Pack ina mona ompito okuya koSwitzerland oshoka okakomitiye ko Paralympics moNamibia anuwa oka li ka tindi oku mu kwathela oshimaliwa opo a vule okuya koSwitzerland. Frans Panduleni okwa pumbwa oshimaliwa shooN$ 60 000 opo a vule okuya koSwitzerland.

Nonando omudhani nguka a li a kambadhala okugongela oshimaliwa moku hinga ombasikela ye yomagulu  gatatu miitopolwa yokuumbangalantu, ine shi pititha okugongela omwaalu ngoka.

Frans ngoka a tseyika nawa 2Pack okwa li a pumbwa okugongela okapandi koodola N$ 60 000, oku ya koSwitzerland kedhingoloko lya hugunina. Methigathano ndika omo mwali tamu ka dhindwa aadhani mboka ya longa nawa taya ka tulwa momusholondondo gwaamboka ya pitamo okuya kOlimpika.

Sho twa pula omupopiliko gwe Eva Josephat, okwa ti nando oya li shili ya longo nuudhiginini opo ya ete po oshimaliwa shi thike mpoka oonkambadhala adhihe ya li ya ningi odha li dha hulile muunyengwi.

Okwa ti oya li ya popi naanangesefa oyendji moNooli ashike kemanya kuza wo tu ontsi.

“Otwa li wo twa tumu ombaapila yimwe kombelewa yOmupresitende ashike nako ina ku tu zila eyamukulo”, Eva ta tsikileko.

“Naasho omasiku gwomaudhano ngaka gali ga thiki nena, ka twali we tuna sho tatu vulu ashike otwa iitaale kutya ondjodhi ya Frans yo ku ka kutha ombinga muudhano woOlympics 2016 oya adha okwena kwa hula” Eva ta tsikileko.

Eva okwa ti nando ina ye shi pondola okuya kuudhano mbuka otaya tsikile nokulonga nuudhiginini opo ya kale noshimaliwa moshiketha sha 2Pack naasho omaudhano galwe ta ge ke ya nena ita ya ka kala we noku ongaonga ngaashi nuumvo.

Onkene ota indile aakalimo yomositopolwa shaHangwena opo ya kale ya tegelela Olyomakaya gomasiku 18 Juni sho 2Pack ta ka kala  moshitopolwa Ohangwena.Pethimbo lyetalelopo lye  2Pack ota ka tsakanena naGavena gwoshitopolwa shoka Omusamane Usko    Nghaamwa.

Nando 2Pack okuli shili ena ehalo oku kutha ombinga muudhano wo Olyimpics ompito ye ota yi ende shili ta yi thinana oshoka omunamimvo 34 nguka sho ethigathano ekwawo ta li ka galukila mondambo konima yomimvo ne ota ka adhika ena omimvo 38 , onkene gumwe oku wete kutya ota shi ka kala oshidhigu kuye oku mona ompito opo a ye kuudhano mbuka wasimana noonkondo , na ompito ombwaanawa oya li nuumvo.

 

 

 

LEAVE A REPLY

Please enter your comment!
Please enter your name here