Efimano lefiku letanga leameno laNamibia

0
286
NDF soldiers;ovakwaita vetanga leameno laNamibia tava delela pakwaita peembelewa dakula doukwaita mOshivandi mefiku loku dimbuluka ekalepo letanga eli omido 26.

GROOTFONTEIN – Etanga leameno laNamibia ola dimbulukwa efiku ledalo lalo oshivike shaya. Pefimbo loku dimbuluka etotepo letanga eli momafiku a 2  June neudo ovakwaita ova delela pakwaita peembonge dakula dovakwaita mOshivanda.

Efiku olo Kommanda woitukulwa omuwoi yopakwaita Enos Lazarus Hakuna okwa fatulula omutungilo wEtanga lEameno laNamibia a ti  eli olina oitukulwa itatu.

Kommanda Hakuna okwa ti oilonga yetanga leameno oyo  okwaamena oshilongo novanhu vasho oshoyo okukwatela po ombili.

Hakuna, okwa fatulula efimano lakula lekalepo letanga leameno moshilongo okwaamena , okukwatela po ombili, okutula po elandulafano,  nokwaamena oshiwana noshilongo komutondi woludi keshe ngee ta ponokele oshilongo okudja meni ilo pondje. Okwa ti, omukwaita opo a dule okwaamena oshilongo shaye oku na kudeulwa tete nokushiiva odelela , okusaluta, okushiiva ondjebo  okwi ipangela nokwi ipangulula mo, oku yuumba a dule kulongifa oilwifo inini fiku ta i molwoodi.

Mokudimbulukwa efiku letoto letanga leameno ovakwaita ova delela odelela yopakwaita. Hakuna, oye komanda yomatanga ovakwaita vopedu moitukulwa omuwoi Zambezi, Kavango Ushilo naKavango Utokelo, Ohangwena, Oshana, Omusati, Kunene, Oshikoto naOtjozondjupa omo mu na eembelewa dakula detanga leameno moGrootfontein. Ota yelifa kutya, kakele kefimano lodelela hai delelwa kovakwaita momafiku owina nopeemhito da fimana, shimwe sha fimana metanga loukwaita omukonda oo wa longifwa nale moita manga ounyuni inau eta po oilwifo yopashinanena. Omukwaita keshe e li pondodo yewiliko ngaashi wetanga lopedu, lomomeva ilo lokedu mokupewa oshinakuwanifwa eshi oha pewa omukonda oo tau ulike eenghono dewiliko.

Kommanda Hakuna ta yelifa kutya, etanga leameno laNamibia ola tukulwa momatanga ngaash; oshitukulwa shovakwaita vomomeva, shovakwaita vomomhepo noshitukulwa shovakwaita vopedu osho oshinene. Mokudimbuluka efiku letanga leameno, omatanga ovakwaita vokedu, vomomeva novomomhepo ohave ya pamwe okukufa ombinga momaudano. Okudja Mai 22-Juni 02, ovakwaita ova shakena mOtjiwarongo moshitukulwa shaOtjozondjupa.

Ta weda po vali kutya, kakele kedimbuluko lefiku letototo letanga muJuni 02, oitukulwa ei yetanga lomomeva nolomomhepo natango oi na yoo omafiku owina okudimbuluka etoto loshitukulwa shalo ngaashi naanaa Septemba 03 haku dimbulukiwa etoto letanga lovakwaita vopedu. Komanda Hakuna okwa yelifa kutya etanga leameno oli lile po oshilongo ashishe. Onghee ngeenge moshilongo mu na ombili, ovakwaita ohava kwafele meeprojeka doshiwana ngaashi mokufindikila eetenga domeva koshiwana ilo okuyakula pomafimbo oiponga yeshito ngaashi efundja. Onghee oshiwana osha teelelwa nasho shi kale noku yandja ouyelele wa pumbiwa kovakwaita.

 

 

LEAVE A REPLY

Please enter your comment!
Please enter your name here