Eta lohonde tali ti sha

0
220

WINDHOEK -Nande Namibia ota dimbuluka efiku lokuyandja ohonde mounyuni, momafiku 14 Juni, moshilongo omu na omhumbwe yohonde yeeUnit 135.

Edi ngeno keshe efiku otadi yandjwa kovanhu va yooloka okudja keembinga doshilongo, ku kandulwe po omhumbwe yohonde moshilongo. Ouyelele ou owa yandjwa  kuTitus Shivute omunamabelewa koshitukulwa shomapukululo mEhangano loku yandja Ohonde moNamibia [Blood Transfusion Service of Namibia].

Shivute ta yelifa kutya, ehangano ola pumbwa meendelelo eeUnits 267 dohonde yoO+, eeUnits 11 dohonde yoO-. Omhumbwe oya etifwa okudja momafiku omafudo opashiwana a dimbulukiwa moshilongo ngaashi efiku lemanguluko, opaasa, enyumuko  kwa wedwa omafiku makwao omafudo opashiwana. Ovanambelewa vokwoongela ohonde ina va ongela ohonde ya sha momafiku oo noiponga onghee tai tane.

Nande ehangano eli li na eembelewa moWindhoek, koSwakop noWalvisbay natango otali pumbwa kukala neeklinika koitukulwa ya yooloka li wanife ohonde.

Omunambelewa wehangano lokwoongela ohonde okwa yelifa kutya omolwa oiponga tai holoka keshe efiku, omikifi hadi eta ovanhu va kanife ohonde ngaashi okankera, omalaria, ekano lohonde molutu, etando, oludalo, ilo ouhanana hava dalwa vehe na oikondjifo molutu ohava pumbwa ohonde. Shivute okwa weda po kutya ohonde yoO- ohai kwafa ovo ve li keshe umwe e na ohonde yoludi loO- nouhanana, nonande omaludi eehonde adishe edi odo unene da pumbiwa shaashi ohadi longifwa pamhumbwe domaludi ado ngaashi ovo ve na eehonde do+ keshe tai ya po. Osha etifa moshilongo mu kale omhumbwe yohonde yeeUnits 800, no ina ku yandjwa  ku keshe ou a monika ei pumbwa.

Shivute ta fatulula kutya, Namibia oku na ovayandjihonde ve fike pomayovi 16000 ve lile po eepelesenda oshinkwanyu nola hetatu dovakalimo. Okwa indila keshe ou e na oukolele e na eedula 16-65 noku na odjundo yeekilograma okudja 65 aka yandje ohonde. Kakele kaavo ve na omikifi ngaashi osuuka ilo hava nu omiti donhumba itava dulu kuyandja ohonde.

Blood Transfusion Service of Namibia otaka talela po eefikola eekilinika da yooloka okudja oshivike shotete shaJuli. Moku dimbuluka efiku leyandjo lohonde mounyuni, ehangano ola shiva ovayandjihonde aveshe hava yandje ohonde lune modula naavo va pewa ohonde ve uye ketyapulo dimbuluko keembelewa dakula dehangano di li mepandaanda laTal Street moWindhoek.

 

 

 

LEAVE A REPLY

Please enter your comment!
Please enter your name here